vo ek lamha jise tum ne mukhtasar jaanaa — Taleef Haidar

ye shahr apni isi haav-hu se zinda hai
tumhaari aur miri guftugu se zinda hai

ye teraa divaana raat gae maalum nahin kyuun pahron tak
aansu ki lakiron se kitne naqsh-e-jazbaat banaae hai

use kahaan hamein qaidi banaa ke rakhnaa thaa
hamin ko shauq nahin thaa kabhi rihaai kaa

bahut mushkil thaa mujh ko raah kaa hamvaar kar denaa
to main ne tai kiyaa is dasht ko divaar kar denaa

aksar mire sheron ki sanaa karte rahe hain
vo log jo ghaalib ke taraf-daar nahin hain

safar hi bas kaar-e-zindagi hai
azaab kyaa hai savaab kyaa hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

ghurur bhi jo karun main to aajizi ho jaae
khudi mein lutf vo aae ki be-khudi ho jaae

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai