dhokaa khaane pe ro paDaa hogaa — Tauheed Zeb

ek hi din milaa mohabbat ko
saal bhar ki thakan utaari gai

daftar-e-husn khole baiThe hain
'aashiqi rozgaar hai un kaa

kyaa huaa husn-e-jaavedaan ko tire
tu to mujh se bichhaD ke khush thi bahut

rumuz-e-vaqt ki pahli class mein bhi miraa
tamaam dhyaan thaa sarkaari naukri ki taraf

haiat se maavaraa hai lisaani jamaaliyaat
paani kaa asl zaaiqa zer-e-namak to hai

apni tasvir chuum li us ne
phuul par phuul khil gayaa jaise

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

jo husn-o-ishq kaa ham-vazn imtihaan Thahraa
vo be-dahan nazar aayaa mein be-zabaan Thahraa

aisaa kyaa 'ishq jo rusvaai 'ataa kar na sake
aisi kis kaam ki rusvaai ki shohrat bhi nahin

ik mohabbat ke sivaa aur na kuchh maangaa thaa
kyaa karein ye bhi zamaane ko gavaaraa na huaa

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa