baad-e-tark-e-aarzu baiThaa huun kaisaa mutmain — Tilok Chand Mahroom

buraa ho ulfat-e-khubaan kaa ham-nashin ham to
shabaab hi mein buraa apnaa haal kar baiThe

uThaane ke qaabil hain sab naaz tere
magar ham kahaan naaz uThaane ke qaabil

fikr-e-maaash o ishq-e-butaan yaad-e-raftagaan
in mushkilon se ahd-baraai na ho saki

ba-zaahir garm hai baazaar-e-ulfat
magar jins-e-vafaa kam ho gai hai

talaatum aarzu mein hai na tufaan justuju mein hai
javaani kaa guzar jaanaa hai dariyaa kaa utar jaanaa

gadaa nahin hain ki dast-e-savaal phailaaein
kabhi na aap ne puchhaa ki aarzu kyaa hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

kabhi kabhi chup ho jaane ki khvaahish hoti hai
aaise mein jab tir-e-sitam ki baarish hoti hai

naakaam hasraton ke sivaa kuchh nahin rahaa
duniyaa mein ab dukhon ke sivaa kuchh nahin rahaa

dil ki tamannaa thi masti mein manzil se bhi duur nikalte
apnaa bhi koi saathi hotaa ham bhi bahakte chalte chalte

khaak bhi lutf-e-zindagi na rahaa
aarzu ji mein ho vo ji na rahaa

ruuh hai mahv-e-tamannaa husn hai mast-e-tarab
ik niyaaz-o-naaz kaa barpaa hai mahshar saamne