fikr-e-maaash o ishq-e-butaan yaad-e-raftagaan — Tilok Chand Mahroom

baad-e-tark-e-aarzu baiThaa huun kaisaa mutmain
ho gai aasaan har ik mushkil ba-aasaani miri

buraa ho ulfat-e-khubaan kaa ham-nashin ham to
shabaab hi mein buraa apnaa haal kar baiThe

uThaane ke qaabil hain sab naaz tere
magar ham kahaan naaz uThaane ke qaabil

ba-zaahir garm hai baazaar-e-ulfat
magar jins-e-vafaa kam ho gai hai

talaatum aarzu mein hai na tufaan justuju mein hai
javaani kaa guzar jaanaa hai dariyaa kaa utar jaanaa

gadaa nahin hain ki dast-e-savaal phailaaein
kabhi na aap ne puchhaa ki aarzu kyaa hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

itnaa hairaan na ho meri anaa par pyaare
ishq mein bhi kai khuddaar nikal aate hain

mujh se kab us ko mohabbat thi magar mere baad
us ne jis shakhs ko chaahaa vo mire jaisaa thaa

is se pahle ki ye aazaar gavaara kar lein
aa miri jaan mohabbat se kinaara kar lein

safir-e-ishq hamein ab to ham safar kar lo
hamaare paas to saamaan bhi ziyaada nahin