uThaa ye shor vahin se sadaaon kaa kyun-kar — Umar Ansari

aksar huaa hai ye ki khud apni talaash mein
aage nikal gae hain had-e-maa-sivaa se bhi

baahar baahar sannaaTaa hai andar andar shor bahut
dil ki ghani basti mein yaaro aan base hain chor bahut

buraa sahi main pa niyat buri nahin meri
mire gunaah bhi kaar-e-savaab mein likhnaa

chhup kar na rah sakegaa vo ham se ki us ko ham
pahchaan leinge us ki kisi ik adaa se bhi

us ik diye se hue kis qadar diye raushan
vo ik diyaa jo kabhi baam-o-dar mein tanhaa thaa

musaafiron se mohabbat ki baat kar lekin
musaafiron ki mohabbat kaa e'tibaar na kar

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

allaah re be-khudi ki tire ghar ke aas-paas
har dar pe di sadaa tire dar ke khayaal mein

palkon pe gham-e-hijr ke sab diip jalaae
nindon ke shabistaan mein bhaari miri aankhein

us ki khamoshiyon mein nihaan kitnaa shor thaa
mujh se sivaa vo dard kaa khugar lagaa mujhe