ek muddat mein parakhne kaa shuur aataa hai — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

kisi tarah din to kaT rahe hain fareb-e-ummid khaa rahaa huun
hazaar-haa naqsh aarzu ke banaa rahaa huun miTaa rahaa huun

ghair to aansu pochheinge
dhokaa deinge apne log

ham to tamaam umr tiri hi adaa rahe
ye kyaa huaa ki phir bhi hamin bevafaa rahe

pyaar ki khud-farebiyaan tauba
miTte miTte bhi aas rahti hai

fughaan ki mujh gharib ko hayaat kaa ye hukm hai
samajh har ek raaz ko magar fareb khaae jaa

khud-farebi rahe to achchhaa hai
khud-shanaasi tabaah kar degi