kise yaqin ki tum dekhne ko aaoge — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

tum nahin aaoge khabar hai hamein
phir bhi ham intizaar kar leinge

davaam paaegaa ik roz haq zamaane mein
ye intizaar nahin intizaar-e-vahshat hai

isi khayaal mein har shaam-e-intizaar kaTi
vo aa rahe hain vo aae vo aae jaate hain

intizaar aap kaa aisaa hai ki dam kahtaa hai
nigah-e-shauq huun aankhon se nikal jaaungaa