kyaa lutf-e-id hai jo agar tum se duur hon — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

sau iid agar zamaane mein laae falak va-lek
ghar se hamaare maah-e-muharram na jaaegaa

mah-jabin iid mein angusht-numaa kyuun na rahein
iid kaa chaand hi angusht-numaa hotaa hai

aap idhar aae udhar diin aur imaan gae
iid kaa chaand nazar aayaa to ramzaan gae

pahle Daali tire chehre pe bahut der nazar
'iid kaa chaand to phir baa'd mein dekhaa main ne

miri nigaah ko gar teri diid ho jaae
qasam khudaa ki miri iid iid ho jaae

kahin hai iid ki shaadi kahin maatam hai maqtal mein
koi qaatil se miltaa hai koi bismil se miltaa hai