meri divaangi-e-ishq hai ik dars-e-jahaan — Wahid Premi

uf gardish-e-hayaat tiri fitna-saaziyaan
apne vatan mein duur hain ahl-e-vatan se ham

baad taklif ke raahat hai yaqini 'vaahid'
raat kaa aanaa hi paighaam-e-sahar hotaa hai

gul ghunche aaftaab shafaq chaand kahkashaan
aisi koi bhi chiiz nahin jis mein tu na ho

kisi ko be-sabab shohrat nahin milti hai ai 'vaahid'
unhin ke naam hain duniyaa mein jin ke kaam achchhe hain

aazaad to barson se hain arbaab-e-gulistaan
aai na magar taaqat-e-parvaaz abhi tak

shakhsiyyat-e-fankaar muamma nahin 'vaahid'
fan hi mein huaa kartaa hai fankaar kaa partav

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

thaa muqaddam ishq-e-but islaam par tifli mein bhi
yaa sanam kah kar paDhaa maktab mein bismillaah ko

rindaan-e-ishq chhuT gae mazhab ki qaid se
ghanTa rahaa gale mein na zunnaar rah gayaa

manzil-e-ishq ki hai rah hamvaar
na bulandi hai yaan na pasti hai