musallaa rakhte hain sahbaa-o-jaam rakhte hain — Wali Aasi

dosto DhunD ke ham saa koi pyaasaa laao
ham to aansu bhi jo piite hain to paani ki tarah

dariyaa dikhaai detaa hai har ek reg-zaar
shaayad ki in dinon mujhe shiddat ki pyaas hai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

sameT bikhre hue kaaghzaat ko apne
koi sadaa tujhe vaapas bulaane vaali hai

sab bichhDe saathi mil jaaein murjhaaein chehre khil jaaein
sab chaak dilon ke sil jaaein koi aisaa kaam karo 'vaali'

main jis kaa javaab na de paaun
aisaa bhi koi savaal karnaa

faqiron ke gharon mein lutf ki raatein bhi aati hain
ziyaarat ke liye aksar musammaatein bhi aati hain

mandir gae masjid gae piron faqiron se mile
ik us ko paane ke liye kyaa kyaa kiyaa kyaa kyaa huaa

na durveshon kaa khirqa chaahiye na taaj-e-shaahaanaa
mujhe to hosh de itnaa rahun main tujh pe divaanaa

kisi darvesh ke hujre se abhi aayaa huun
so tire hukm ki taamil nahin karni mujhe

jis ahd mein luT jaae faqiron ki kamaai
us ahd ke sultaan se kuchh bhuul hui hai

tere haathon mile agar murshid
chaae piinaa savaab lagtaa hai