sameT bikhre hue kaaghzaat ko apne — Wali Aasi

dosto DhunD ke ham saa koi pyaasaa laao
ham to aansu bhi jo piite hain to paani ki tarah

dariyaa dikhaai detaa hai har ek reg-zaar
shaayad ki in dinon mujhe shiddat ki pyaas hai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

musallaa rakhte hain sahbaa-o-jaam rakhte hain
faqir sab ke liye intizaam rakhte hain

sab bichhDe saathi mil jaaein murjhaaein chehre khil jaaein
sab chaak dilon ke sil jaaein koi aisaa kaam karo 'vaali'

main jis kaa javaab na de paaun
aisaa bhi koi savaal karnaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

kah rahaa thaa main nahin hai dukh kisi bhi baat kaa
aur chhalak ke gir gayaa ik aansu pichhli raat kaa

raahat ki justuju mein khushi ki talaash mein
gham paalti hai umr-e-gurezaan nae nae

de hausle ki daad ke ham tere gham mein aaj
baiThe hain mahfilon ko sajaae tire baghair