koi dastak koi aahaT na sadaa hai koi — Waseem Malik

shaakh se kaT kar alag hone kaa ham ko gham nahin
phuul hain khushbu luTaa kar khaak ho jaaeinge ham

lutf ye hai ki usi shakhs ke mamnun hain ham
jis ki talvaar ne qiston mein hamein kaaTaa hai

kal saath thaa koi to dar o baam the raushan
tanhaa huun 'vasim' aaj to ghar kaaT rahaa hai

lagtaa hai judaa sab se kirdaar 'vasim' us kaa
vo shahr-e-mohabbat kaa baashinda nazar aae

jo shakhs miraa dast-e-hunar kaaT rahaa hai
naadaan hai shaadaab shajar kaaT rahaa hai

main is liye zinda huun ki main bol rahaa huun
duniyaa kisi gunge ki kahaani nahin likhti

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

us hijr pe tohmat ki jise vasl ki zid ho
us dard pe laanat ki jo ashaar mein aa jaae

dilon pe dard kaa imkaan bhi ziyaada nahin
vo sabr hai abhi nuqsaan bhi ziyaada nahin

asir-e-zulf ko shaayad yahin rihaai hai
pukaartaa huun jise vo sadaa mein aayaa hai