samundar ho to us mein Duub jaanaa bhi ravaa hai — Yasmeen Hameed

musalsal ek hi tasvir chashm-e-tar mein rahi
charaagh bujh bhi gayaa raushni safar mein rahi

ek divaar uThaai thi baDi ujlat mein
vahi divaar giraane mein bahut der lagi

parda aankhon se haTaane mein bahut der lagi
hamein duniyaa nazar aane mein bahut der lagi

jis samt ki havaa hai usi samt chal paDein
jab kuchh na ho sakaa to yahi faisla kiyaa

apni nigaah par bhi karun e'tibaar kyaa
kis maan par kahun vo miraa intikhaab thaa

raste se miri jang bhi jaari hai abhi tak
aur paanv tale zakhm ki vahshat bhi vahi hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo saari baatein main ahbaab hi se kahtaa huun
mujhe harif ko jo kuchh sunaanaa hotaa hai

rahe hain chaand-raaton mein bhi tanhaa
hamein khuddaariyaan mahngi paDi hain

dahliz par sar khole khaDi hogi zarurat
ab aise mein ghar jaanaa munaasib nahin hogaa

kitnaa aasaan thaa tire hijr mein marnaa jaanaan
phir bhi ik umr lagi jaan se jaate jaate