ek bhi aaftaab ban na sakaa — Yusuf Zafar

saans lene ko hi jiinaa nahin kahte hain 'zafar'
zindagi thi jo tire vasl kaa imkaan hotaa

un ki mahfil mein 'zafar' log mujhe chaahte hain
vo jo kal kahte the divaana bhi saudaai bhi

zahr hai mere rag-o-pai mein mohabbat shaayad
apne hi Dank se bichchhu ki tarah mar jaaun

aa mire chaand raat suuni hai
baat banti nahin sitaaron se

paani ko aag kah ke mukar jaanaa chaahiye
palkon pe ashk ban ke Thahar jaanaa chaahiye

thak ke patthar ki tarah baiThaa huun raste mein 'zafar'
jaane kab uTh sakun kyaa jaaniye kab ghar jaaun

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

aansu falak ki aankh se Tapke tamaam raat
aur subh tak zamin kaa aanchal bhigo gae

sitaara kyaa miri taqdir ki khabar degaa
vo khud faraakhi-e-aflaak mein hai khvaar o zubun

'hasn-jamil' tiraa ghar agar zamin pe hai
to phir ye kis liye gum aasmaan mein tu hai

kisi sitaare se kyaa shikaayat ki raat sab kuchh bujhaa huaa thaa
fasurdagi likh rahi thi dil par shikastagi ki nai kahaani

tumhaari saalgirah par yahi du'aa hai tumhein
falak pe jitne sitaare hon utni khushiyaan milein