yuun mohabbat se na de meri mohabbat kaa javaab — Zafar Iqbal

yuun bhi hotaa hai ki yak dam koi achchhaa lag jaae
baat kuchh bhi na ho aur dil mein tamaashaa lag jaae

kyaa khabar jis kaa yahaan itnaa uDaate hain mazaaq
khud hamein bhi kabhi is rang mein Dhalnaa paD jaae

apni marzi se bhi ham ne kaam kar Daale hain kuchh
lafz ko laDvaa diyaa hai beshtar maani ke saath

haath pair aap hi main maar rahaa huun filhaal
Dubte ko abhi tinke kaa sahaaraa kam hai

aakhir 'zafar' huaa huun manzar se khud hi ghaaeb
uslub-e-khaas apnaa main aam karte karte

raaste hain khule hue saare
phir bhi ye zindagi ruki hui hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mujh mein thoDi si jagah bhi nahin nafrat ke liye
main to har vaqt mohabbat se bharaa rahtaa huun

karvaTon se bus ki bus mein aur halchal ho gai
daastaan-e-ishq kitnon ki mukammal ho gai

khuddaariyon pe ishq ki ilzaam aa gayaa
kyuun be-khudi mein lab pe tiraa naam aa gayaa

pahli si lazzatein nahin ab dard-e-ishq mein
kyuun dil ko main ne zulm kaa khugar banaa diyaa