chheD kar jaise guzar jaati hai doshiza havaa — Zeb Ghauri

main payambar tiraa nahin lekin
mujh se bhi baat kar khudaa mere

jaag ke mere saath samundar raatein kartaa hai
jab sab log chale jaaein to baatein kartaa hai

talaash ek bahaana thaa khaak uDaane kaa
pata chalaa ki hamein justuju-e-yaar na thi

dil ko sambhaale hanstaa boltaa rahtaa huun lekin
sach puchho to 'zeb' tabiat Thiik nahin hoti

jagmagaataa huaa khanjar mire siine mein utaar
raushni le ke kabhi khaana-e-viraan mein aa

uDaa ke khaak bahut main ne dekh li ai 'zeb'
vahaan talak to koi raasta nahin jaataa

main baDaa ho gayaa huun magar bachpanaa
mere dil se kabhi bhi gayaa hi nahin

mire kalaam se behtar hai meri khaamoshi
na jaane kitne savaalon ki aabru rakh li

bachpan ne hamein di hai ye shirini-e-guftaar
urdu nahin ham maan ki zabaan bol rahe hain

vo bhi hain udhar chup chup khaamosh idhar main bhi
is tarah se milti hai tanhaai se tanhaai

meri khaamoshi pe the jo taana-zan
shor mein apne hi bahre ho gae

dar kunj-e-sadaa-band kaa kholeinge kisi roz
ham log jo khaamosh hain boleinge kisi roz