meri khaamoshi pe the jo taana-zan — Azhar Inayati

ghazal kaa sher to hotaa hai bas kisi ke liye
magar sitam hai ki sab ko sunaanaa paDtaa hai

shikastagi mein bhi kyaa shaan hai imaarat ki
ki dekhne ko ise sar uThaanaa paDtaa hai

raasto kyaa hue vo log ki aate-jaate
mere aadaab pe kahte the ki jiite rahiye

kisi ke aib chhupaanaa savaab hai lekin
kabhi kabhi koi parda uThaanaa paDtaa hai

vo jis ke sehn mein koi gulaab khil na sakaa
tamaam shahr ke bachchon se pyaar kartaa thaa

har ek raat ko mahtaab dekhne ke liye
main jaagtaa huun tiraa khvaab dekhne ke liye

main baDaa ho gayaa huun magar bachpanaa
mere dil se kabhi bhi gayaa hi nahin

chupke chupke raat din aansu bahaanaa yaad hai
ham ko ab tak aashiqi kaa vo zamaanaa yaad hai

aalam-e-masti mein mere munh se kuchh niklaa jo raat
bol uThaa tevari chaDhaa kar vo but-e-mai-khvaar chup

ab to chup-chaap shaam aati hai
pahle chiDiyon ke shor hote the

gung hain jin ko khamoshi kaa mazaa hotaa hai
dahan-e-zakhm mein khud qufl-e-hayaa hotaa hai

jo ashk surkh hai naama-nigaar hai dil kaa
sukut-e-shab mein likhe jaa rahe hain afsaane