kaun hai jo itne sannaaTe mein hai mahv-e-safar — Zia Faooqui

mat puchhiye kyaa jitne niklaa thaa main ghar se
ye dekhiye kyaa haar ke lauTaa huun safar se

badan ki qaid se chhuTaa to log pahchaane
tamaam 'umr kisi ko miraa pata na milaa

ye safar ye Dubte suraj kaa manzar aur main
jaane kab ho paaeinge baaham miraa ghar aur main

shu’ur-e-tishnagi ik roz mein pukhta nahin hotaa
mire honTon ne sadiyon karbalaa ki khaak chumi hai

aankhein hain ki ab tak usi chaukhaT pe dhari hain
detaa huun zamaane ko magar apnaa pata aur

pahle thaa bahut faasla baazaar se ghar kaa
ab ek hi kamre mein hai baazaar bhi ghar bhi

jhaankte raat ke garebaan se
ham ne sau aaftaab dekhe hain

shor din ko nahin sone detaa
shab ko sannaaTaa jagaa detaa hai

raushni ho rahi hai kuchh mahsus
kyaa shab aakhir tamaam ko pahunchi

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

bahut hasin raat hai magar tum to so rahe ho
nikal ke kamre se ik nazar chaandni to dekho

kab tak paDe rahoge havaaon ke haath mein
kab tak chalegaa khokhle shabdon kaa kaarobaar