Ghazal

"nayaa khilaa hai shagufa koi bahaar mein kyaa gundhaa huaa hai miraa dil kisi ke haar mein kyaa uDaane phuul hasin aae hain bahaar mein kyaa lagi hai aag si ye aaj laala-zaar mein kyaa kisi se kahne ye aae hain vo sahar hote tamaam-raat kaTi mere intizaar mein kyaa tumhaare khaal kaa bosa nahin hai ginti mein zaraa si chiiz hai aaegi ye shumaar mein kyaa utaar li sar-e-baazaar jis ne rukh se naqaab hijaab aae use sau main kyaa hazaar mein kyaa ye surma chashm-e-adu ke liye uThaa rakkhein vo khaak Daalte hain chashm-e-etibaar mein kyaa banaaeinge dil-e-pur-daagh jama kar ke unhein chamakte dekhe hain zarre mire ghubaar mein kyaa ye mere dosh se hote nahin judaa dam-e-naza gaDeinge mere farishte mire mazaar mein kyaa hai intizaar ki mai-nosh khum liye pahunchein ghiri hain kal se ghaTaaein ye sabza-zaar mein kyaa jo dekhe saanp ke kaaTe ki lahr use aae bharaa hai zahr ab aisaa bhi zulf-e-yaar mein kyaa sharaab se bhi sivaa khush-gavaar hai ham ko bataaein kyaa ki mazaa paD gayaa udhaar mein kyaa kanaar-e-shauq mein aa kar hasin nikal na sake asar khudaa ne diyaa hai hamaare pyaar mein kyaa 'riyaaz' tauba karo din khizaan ke aae hain tum aae piine ko jaati hui bahaar mein kyaa"

"ku-e-dushman se use chhup ke nikalte dekhaa ham ne naqsh-e-qadam-e-yaar ko chalte dekhaa haae kyaa haal dam-e-vasl hamaaraa hogaa bosa lene mein tumhein rang badalte dekhaa abr ban kar jo baras paDne ko aayaa vaaiz be-tarah ham ne khum-e-mai ko ubalte dekhaa ye bhi piinaa hai koi chaal hai ye bhi koi har-qadam par unhein sau baar sambhalte dekhaa yahi aankhein hain ki jin mein nahin ab naam ko ashk inhin aankhon se kabhi khuun ubalte dekhaa hashr ke roz na taab abr-e-karam ko aai mujh gunahgaar ko jab dhuup mein jalte dekhaa gesu-e-hur kaho sabza-e-turbat kaisaa qabr-e-dushman se dhuaan ham ne nikalte dekhaa kucha-e-ishq mein allaah re paa-mardi-e-dil Thokarein khaa ke use ham ne sambhalte dekhaa ghair ke ghar se jhijakte hue tum nikle the rukte dekhaa tumhein phir chhup ke nikalte dekhaa dil mein kyaa jaan thi kyaa qatra-e-khun ki thi bisaat malte dekhaa use haathon se masalte dekhaa phuul laale kaa khilaa thaa ki shafaq shaam ki thi vasl ki raat ko bhi rang badalte dekhaa kabhi kuchh raat gae yaa kabhi kuchh raat rahe ham ne in parda-nashinon ko nikalte dekhaa khun-e-dil par hai abas rashk tiri mehndi ko apni hi aag mein ham ne use jalte dekhaa dil-e-betaab thaa yaa aag ki chingaari thi kis qadar jild unhein paa-posh se malte dekhaa vaah kyaa rang hai kyaa khuub tabiat hai 'riyaaz' ho zamin koi tumhein phulte-phalte dekhaa"

"zarur paanv mein apne hinaa vo mal ke chale na pahunche aaj bhi ghar tak mire vo kal ke chale ye dosti hai ki hai saath aag paani kaa jo nikli aah to saath ashk bhi nikal ke chale lahad se laai qayaamat hai paanv paD paD kar Thahar Thahar ke chale ham machal machal ke chale hazaaron Thokarein har ik qadam par us mein hain ye raah-e-ishq hai kyuun kar koi sambhal ke chale ye mujh ko vasl ki shab haae maut kyuun aai hinaa lagaa ke jo aae the haath mal ke chale tumhaari raah mein chalne ki hai khushi aisi ki saath naqsh-e-qadam bhi uchhal uchhal ke chale mazaa to aae jo lein rind baDh ke haathon-haath mazaa to aae kahin se jo mai ubal ke chale adaa se naaz se chalnaa qayaamat un kaa thaa jo mal ke dil ko kaleje masal masal ke chale chale vo shama jalaane mazaar par kis ke ki saath saath adu aag ho ke jal ke chale tumhaare gesu-e-pur-pech ne liyaa ham ko ki munh mein saanp ke yaa munh mein ham ajal ke chale uThaa janaaza to boli ye khaana-bardaari nayaa makaan hai kapDe nae badal ke chale hazaaron daagh hain dil mein jigar mein laakhon zakhm 'riyaaz' mahfil-e-khubaan se phul-phal ke chale"

"baalaa-e-baam ghair hai mein aastaan par chaahein jise chaDhaaein huzur aasmaan par kyuun naa-muraad aah gai aasmaan par TuuTe na aasmaan kahin meri jaan par rusvaaiyaan hain saath vo chhup kar hazaar jaan sau sau ke sar jhuke hain qadam ke nishaan par aanaa use zarur go hon laakh ehtimaam aashiq hai un ki niind miri daastaan par thaa raaz-daar-e-husn vo kaafir jo kah gayaa maashuq dil ki baat na laaein zabaan par un ki gali mein raat mein is vaza se gayaa ghabraa ke paasbaan gire paasbaan par naazuk si tegh-e-yaar hai kyaa zahr ki bujhi khaae hue hai zahr mire imtihaan par bante hain shokhiyon se vo suraj bhi chaand bhi naqsh-e-qadam bhi aap ke hain aasmaan par khalvat mein bhi chali hain kahin sina-zoriyaan is tarah aap tan ke uThe kis gumaan par zikr-e-mai-e-tahur ne taDpaa diyaa 'riyaaz' jaanaa paDaa hamein kisi unchi dukaan par"

"zamin mai-kada-e-arsh-e-barin maalum hoti hai ye khisht-e-khum farishte ki jabin maalum hoti hai pari uDne mein zulf-e-ambarin maalum hoti hai ye kaali shakl bhi kitni hasin maalum hoti hai miri hasrat tabassum-aafrin maalum hoti hai chhupi tere tabassum mein nahin maalum hoti hai shafaq kah le koi chaahe shafaq-gun aasmaan kah le hamein to ku-e-qaatil ki zamin maalum hoti hai chali hai tegh to kis naaz se tham tham ke ruk ruk kar ye kuchh un se ziyaada naaznin maalum hoti hai are saaqi zaraa meri sharaab-e-talkh to laanaa mai-e-kausar to bilkul angbin maalum hoti hai chhupi hai vo nigaah-e-shokh bhi mizhgaan ke saae mein chhuri bhi aaj zer-e-aastin maalum hoti hai ubhaaro to zaraa shaayad miraa Duubaa huaa dil ho koi shai bahr-e-gham mein tah-nashin maalum hoti hai nahin ab dard-e-dil lekin abhi tak hai asar kuchh kuchh chamak rah rah ke pahlu mein kahin maalum hoti hai asar Daalaa hai hasrat ne nigaah-e-shauq par kitnaa ki vo ab bhi nigaah vaapsin maalum hoti hai ye ai sayyaad rah rah kar chamakti hai kahaan bijli jahaan meraa nasheman thaa vahin maalum hoti hai lapak us ki chamak us ki vahi dam-kham vahi aalam ye bijli koi aah-e-aatishin maalum hoti hai 'riyaaz' aisi mire dil se lagi hai jaam-e-kausar ki mai-e-angur ab achchhi nahin maalum hoti hai"

"ye sidhe jo ab zulfon vaale hue hain hamaare hi sab bal nikaale hue hain tabassum-fazaa mere naale hue hain zaraa shokh ab sharm vaale hue hain mire haath par khele hain afi-e-zulf ye saanp aastinon ke paale hue hain nahin ham ko laghzish kaa Dar mai-kade mein ki do do farishte sambhaale hue hain ulajhte hain sote mein zulfon se kyaa kyaa vabaal un ko kaanon ke baale hue hain chhupaa kar bahut pi hai masjid mein vaaiz ye zarf-e-vuzu sab khangaale hue hain shab-e-vasl bole na ab dil mein aaein jo armaan mere nikaale hue hain alag hai khudaai se kuchh saakht un ki ye but aur saanche mein Dhaale hue hain jo yaad ab tak aate hain ahl-e-chaman ko qafas mein vahi naghme naale hue hain kisi par dam-e-hashr kyaa aankh Daalun hasin sab mire dekhe-bhaale hue hain junun rang laayaa hai phir fasl-e-gul mein nahin laala sab zakhm aale hue hain charaagh ab shab-e-vasl jalne na deinge vo gesu jo bal khaa ke kaale hue hain nazaakat ne teri giraayaa nazar se sab kitne bhaari doshaale hue hain ye ai shaikh gumbad nahin masjidon mein khum-e-mai hamaare uchhaale hue hain bhari bazm mein lutf-e-khalvat nahin hai vo nashshe mein hain ham sambhaale hue hain ye kahti hai mast aankh un ki shab-e-vasl kai aaj khaali pyaale hue hain bahe hain jo furqat mein aankhon se meri vo dariyaa to aankhein nikaale hue hain are kaanTo jo ashk mizhgaan se Tapke vahi paanv paD paD ke chhaale hue hain subu aab-e-zamzam se dho kar bhari mai achhute hain jitne khangaale hue hain javaani mein kyuun sar uThaaein na gesu ki ab Dasne vaale ye kaale hue hain vo mahshar mein kyaa aib kholeinge mere jo rahmat se ab parda Daale hue hain sunaa hai 'riyaaz' apni daaDhi baDhaa kar buDhaape mein allaah vaale hue hain"

"mere pahlu mein hamesha rahi surat achchhi main bhi achchhaa miri qismat bhi nihaayat achchhi aap ki shakl bhali aap ki surat achchhi aap ke taur bure aap se nafrat achchhi hashr ke din hamein sujhi ye sharaarat achchhi le chale khuld mein ham dekh ke surat achchhi tujh se kahtaa thaa koi yaa tiri tasvir se aaj aankhein achchhi tiri aankhon ki muravvat achchhi ham ne sau baar shab-e-vasl milaa kar dekhaa ai falak chaand se vo chaand si surat achchhi na bane kaam to kis kaam ki naazuk shaklein naazuk achchhe na hasinon ki nazaakat achchhi us se koi nahin achchhaa jo tujhe pyaar kare main bhi achchhaa tire sadqe miri qismat achchhi teri madfan se jo uTThe vo bari ai vaa'iz un ke Thokar se jo uTThe vo qayaamat achchhi jaur tere bahut achchhe sitam-e-gardun se aur un se tiri aankhon ki nadaamat achchhi munh mein jab baat ruki chuum liyaa pyaar se munh dam-e-taqrir kisi shokh ki luknat achchhi dekhte hi kisi kaafir ko bigaD jaati hai main jo chaahun bhi to rahti nahin niyyat achchhi husn-e-surat ki tarah husn-e-sukhan hai kam-yaab ek hoti hai hazaaron mein tabi'at achchhi tujh se jaltaa hai jo vo aur jalaate hain use mire haq mein mire dushman ki 'adaavat achchhi aate jaate nazar aati hai jhalak chilman se parde parde mein nikal aai ye surat achchhi khugar-e-gham ke liye kuchh bhi nahin 'aish kaa khvaab aisi raahat se hamesha ki musibat achchhi de ke vo bosa-e-lab shauq se lein dil meraa 'uzr kyaa hai jo mile maal ki qimat achchhi sun ke ash’aar mire sab yahi kahte hain 'riyaaz' is ki qismat hai buri aur tabi'at achchhi"

"kaafir buton ke naam hon kyunkar tamaam hifz itne khudaa ki ho na sakein jin ke naam hifz matlab na khabt ho koi fiqra na chhuT jaae qaasid ne harf harf kiyaa sab payaam hifz ronaa miraa ho aur bhi baais savaab kaa paDhtaa huun soz main ne kiye hain salaam hifz dozakh kaa Dar nahin hai to patthar ki aag kyaa kaafir buto hamein hai khudaa kaa kalaam hifz piite hi yaad aa gae bhule hue sabaq puchho kisi maqaam se hai har maqaam hifz maikhaane mein namaaz jo ki tu ne jald khatm suura baDaa na thaa koi tujh ko imaam hifz tujh ko qafas mein teri sunaaungaa guftugu sayyaad baatein ki hain tiri zer-e-daam hifz kis ko nahin hai qadr hamaare kalaam ki logon ko hai 'riyaaz' hamaaraa kalaam hifz"

"le gayaa ghar se unhein ghair ke ghar kaa taaviz ham ne dekhaa na sunaa aise asar kaa taaviz de ke bu zulf ki rakh lo tah-mahram dil ko khvaab mein phir na Daroge ye hai Dar kaa taaviz sadqe tere mujhe taskin se taskin hui khat tiraa thaa ki mire dard-e-jigar kaa taaviz ho mubaarak tujhe aankhon mein samaanaa din-raat zeb-e-baazu rahe har-vaqt nazar kaa taaviz rah gayaa ghair ke ghar jaaiye bhi laaiye bhi aap ke sar ki qasam aap ke sar kaa taaviz baandh le bahr-e-khudaa apne bhare baazu par nazar-e-bad se bachaaegaa nazar kaa taaviz ghar gae apne bataa kar vo hamein raah-e-adam vasl ki shab ki nishaani hai kamar kaa taaviz haath bhi aaein to hai haath lagaanaa mushkil sar-e-baazu hai bandhaa khaas asar kaa taaviz Dar se un ke bhare baazu kai kaaghaz utre haath thaamaa thaa shab-e-vasl ki sarkaa taaviz dil hai ab maang ke aaghosh mein din-raat 'riyaaz' ye to sar chaDh ke banaa yaar ke sar kaa taaviz"

"aati thi pahle dil se kabhi bu kabaab ki raushan hai ab to siine mein bhaTTi sharaab ki itnaa itaab surkh hai rangat naqaab ki taar-e-naqaab hain ki nigaahein itaab ki dekhe koi jhalak na rukh-e-laa-javaab ki sattar hazaar pardon mein Thahri hijaab ki kyuun hashr mein ho fikr azaab-o-savaab ki sohbat hai ye bhi ek sharaab-o-kabaab ki kahte hain vaada raat ko hogaa vafaa zarur allaah jald shaam ho roz-e-hisaab ki bijli vo chiiz hi nahin jis se hasin Darein kuchh dard ki chamak hai jhalak iztiraab ki vo shaam-o-subh sadqe ho jin par bahaar-e-gul chun chun ke saath laae hain raatein shabaab ki jannat ke khvaab dekh ke aati hain ham ko yaad rindaana sohbatein vo kabaab-o-shabaab ki aaina dekhte hain mujhe dekh dekh kar ye daad mil rahi hai mire intikhaab ki le apne sar vabaal na auron kaa hashr mein baar-e-gunah uThaae na mizaan hisaab ki ai taur soz-e-barq samajhte hain ham tujhe tujh mein to shokhiyaan hain kisi ke hijaab ki daave hai hamsari kaa sar-e-kaj-kulaah se ai dast-e-mauj utaar le Topi habaab ki bijli giraaein tuur par aavaaz hi se vo Thahre kabhi to ham se savaal-o-javaab ki phir bhi to kuchh sabaat ko us ke zarar nahin ulTi ravaan hai bahr mein kashti habaab ki mai se kahin sivaa hai pas-e-tauba mai-kasho aa jaae duur hi se kahin bu sharaab ki so hashr nazr-e-gosha-e-daamaan hain har-nafas ai shauq-e-did had hi nahin iztiraab ki talkhi kaa nazaa ki to kuchh ehsaas ho sake itni to mere munh mein ho talkhi sharaab ki tum kyaa ho ham ne qulqul-e-minaa se vaaizo baatein bahut suni hain azaab-o-savaab ki daur-e-mai-e-kuhan kaa asar hai ye ai 'riyaaz' hai aaj bhi javaan tabiat janaab ki"

"fariyaad-e-junun aur hai bulbul ki fughaan aur sahraa ki zabaan aur hai gulshan ki zabaan aur kaT jaae zabaan teri to ho garm zabaan aur hai allaah ne di hai tujhe ai sham' zabaan aur jannat bhi hai dozakh bhi hai siine mein hamaare ye daagh-e-nihaan aur hai ye soz-e-nihaan aur ho jaae sach iflaas mein suntaa huun rahegaa do-chaar mahine abhi maah-e-ramazaan aur aaghaaz-e-mohabbat mein ye dil khuun huaa hai roeinge abhi dida-e-khun-naaba-fishaan aur duniyaa mein ab aisaa qadar-andaaz nahin hai hote hi hadaf dil ke chaDhi un ki kamaan aur jo piite hain piite nahin vo bhi ramzaan mein suntaa huun koi band hui mai ki dukaan aur achchhaa hai rahein jaa ke lag donon-jahaan se 'ushshaaq ke rahne ko bane ek jahaan aur piine kaa mazaa jab hai ki munh khum se lagaa ho mujh rind se saaqi ye kahe jaae ki haan aur niklaa hai miraa naam ki benaam-o-nishaan huun mujh saa bhi na hogaa koi benaam-o-nishaan aur suntaa huun musalmaanon mein ab maang bahut hai Dartaa huun mai-e-naab na ho jaae garaan aur pahunche dar-o-divaar ko nuqsaan to kyaa gham rone ke liye leinge kiraae kaa makaan aur tez aatish-e-sayyaal hai pahle se ziyaada ab aag lagaae na zaraa pir-e-mughaan aur di ham ne jagah dil ko bhi aankhon ke baraabar aankhon mein samaate nahin vo ho ke javaan aur marne kaa 'riyaaz' apne zaraa naam na lenaa jiinaa abhi mar-mar ke tujhe hai miri jaan aur"

"gul muraqqaa hain tire chaak garebaanon ke shakl maashuq ki andaaz hain divaanon ke na rukeinge dar-o-divaar se zindaanon ke khud-bakhud paanv uThe jaate hain divaanon ke peing vahshat mein baDhe hain tire divaanon ke ab bayaabaan bhi unhein sahn hain zindaanon ke ek kyaa jin ke har ik zarre mein gum hon sau hashr ham bagule bane aise kai maidaanon ke kaaba-o-dair mein hoti hai parastish kis ki mai-parasto ye koi naam hain mai-khaanon ke kuchh is andaaz se aa baiThe hain vo shama ke paas dekh kar duur se par jalte hain parvaanon ke le gayaa aap ke divaanon ko saudaa-e-bahaar dar-o-divaar hain TuuTe hue zindaanon ke jaam hai tauba-shikan tauba miri jaam-shikan saamne Dher hain TuuTe hue paimaanon ke haath kyuun khinch liyaa pher ke khanjar tu ne sar jagah se nahin uThte hain giraan-jaanon ke dar se baDhne nahin detaa hai mujhe zauq-e-sujud main huun naqsh-e-kaf-e-paa hain tiri darbaanon ke nahin ginti main magar bazm-e-sukhan hai raushan aaj main sham' huun majmea mein sukhan-daanon ke qatre hain kausar-o-tasnim kaf-e-saaqi mein khum-e-aflaak to paimaane hain mai-khaanon ke vusat-o-zaat mein gum vahdat-o-kasrat hai 'riyaaz' jo bayaabaan hain vo zarre hain bayaabaanon ke vaah kyaa naama-e-aamaal hain divaanon ke ki farishte liye TukDe hain garebaanon ke hosh uDte hue dekhe nahin insaanon ke lutf mai-khaanon mein aate hain pari-khaanon ke naqsh-e-paa rah nahin sakte tire divaanon ke ai junun sahn bahut tang hai zindaanon ke par-e-parvaaz bane khud sharar-e-shama kabhi sharar-e-shama bane par kabhi parvaanon ke apne kuche mein jo dekhaa to vo hans kar bole chhaanne vaale kahaan aae bayaabaanon ke zikr kyaa ahl-e-junun kaa ki jab aati hai bahaar vo to vo rang badal jaate hain zindaanon ke aaj but baiThe hain taqdir ke maalik ban kar ab jo likkhaa ho muqaddar mein musalmaanon ke baam tak tere zari'aa hai rasaai ki yahi duur se jhuk ke qadam luun tire darbaanon ke un ke bikhre hue gesu nahin haTte rukh se aaj nikle hain vo jhurmuT mein nigahbaanon ke saath vaalon mein mire kohkan-o-qais bhi hain mere qisse nahin TukDe koi afsaanon ke chashm-e-yaaqub bane halqa-e-zanjir ki aankh kabhi taqdir se din phirte hain zindaanon ke ghairat-e-haq ko ho kyaa josh jab aa'maal ye hain kam hai jo kuchh ho muqaddar mein musalmaanon ke duur se dekh ke phirnaa vo miraa ulTe paanv uf vo badle hue tevar tire darbaanon ke mah-o-anjum se Tapaktaa hai yahi raaton ko un mein TuuTe hue saaghar bhi hain mai-khaanon ke inhein Thukraate chalo hashr mein lutf aaegaa inhin qabron mein hain maare hue armaanon ke nikli jaati hai zamin paanv ke niche se 'riyaaz' kyuun du'aa ko na uThein haath musalmaanon ke"

"koi munh chuum legaa is nahin par shikan rah jaaegi yunhi jabin par giri thi aaj to bijli hamin par ye kahiye jhuk paDe vo ham-nashin par lahu bekas kaa maqtal ki zamin par na daaman par na un ki aastin par balaaein ban ke vo aaiin hamin par du'aaein jo gaiin 'arsh-e-barin par ye qismat daagh jis mein dard jis mein vo dil ho luuT dast-e-naaznin par rulaa kar mujh ko ponchhe ashk-e-dushman rahaa dhabbaa ye un ki aastin par uDaae phirti hai un ko javaani qadam paDtaa nahin un kaa zamin par are o charkh dene ke liye daagh bahut hain chaand ke TukDe zamin par nazaakat kosti hai mujh ko kyaa kyaa tabi'at aai achchhi naaznin par tamannaa-e-asar uu chashm-e-hasrat uThaa rakh ab nigaah-e-vaapsin par dhari rah jaaegi yunhi shab-e-vasl nahin lab par shikan un ki jabin par khudaa jaane dikhaaegi ye kyaa rang du'aaein jam' hain 'arsh-e-barin par nigaah-e-shauq garm itni ki bijli na aanch aae kahin us naaznin par mujhe hai khuun kaa daa'vaa mujhe hai unhin par daavar-e-mahshar unhin par 'riyaaz' achchhe musalmaan aap bhi hain ki dil aayaa bhi to kaafir hasin par"

"mai rahe miinaa rahe gardish mein paimaana rahe mere saaqi tu rahe aabaad mai-khaana rahe hashr bhi to ho chukaa rukh se nahin miTti naqaab had bhi aakhir kuchh hai kab tak koi divaana rahe kuchh nahin ham dil-jalon ki be-qaraari kuchh nahin teri mahfil vo hai jis mein sham-e-parvaana rahe gore haathon mein bane chauDi khat-e-saaghar kaa aks tere dast-e-naaz mein naazuk saa paimaana rahe kam se kam itnaa asar ho jo sune aa jaae niind bekason ki maut kaa honThon par afsaana rahe raat jo jaa baiThte hain roz ham majnun ke paas pahle an-ban rah chuki hai ab to yaaraana rahe hashr ho tum sharm ke putle na bannaa hashr mein chaal iThlaai hui andaaz mastaana rahe taab us ki laa nahin sakte kabhi naazuk dimaagh baar sar hai duur sar se taaj shaahaana rahe un ke kahne se kabhi yuun kah liye do-chaar sher raat-din fikr-e-sukhan mein koi divaana rahe un buton ke chalte ham ne dil ko patthar kar liyaa but rahe koi na yaarab koi but-khaana rahe tuur par aa main na mere saamne yunhi sahi haan zaraa tarz-e-takallum be-hijaabaana rahe zindagi kaa lutf hai uDti rahe har-dam 'riyaaz' ham hon shishe ki pari ho ghar pari-khaana rahe"

"mujh ko na dil pasand na dil ki ye khu pasand pahlu se mere jaae dil-e-aarzu-pasand tujh ko adu pasand hai vaz-e-adu pasand mujh ko adaa pasand tiri mujh ko tu pasand roz-e-azal the Dher hazaaron lage hue chupke se chhaanT laae dil-e-aarzu-pasand tum ne to aastin ke sivaa haath bhi range aayaa shahid-e-naaz kaa itnaa lahu pasand ai dil tiri jagah shikan-e-zulf mein nahin khu bu tiri pasand na kaafir ko tu pasand pahunchaa jo main to dhuum machi bazm-e-yaar mein aae hain aaj ek baDe aarzu-pasand masjid mein zarf-e-aab na thaa koi le chale aayaa jo mai-kade mein achhutaa subu pasand jannat ki huur jaise koi meri qabr par ai shama is tarah mujhe aai hai tu pasand aataa pasand kaash kuchh un kaa kalaam bhi bazm-e-sukhan mein aae kai khush-gulu pasand ho aks aaine mein tiraa yaa ho koi aur aayaa hai ik hasin tire ru-ba-ru pasand din mein shabaab ke vo bhare hain shabaab mein maski hui qabaa mein nahin hai rafu pasand meraa mazaaq aur hai mujh ko to ai kalim parde ke saath duur se hai guftugu pasand mai kaa na mai-kade kaa nahin kuchh rahegaa hosh aae khudaa kare na koi khub-ru pasand kis tarah us ne roke milaayaa hai khaak mein aayaa na aankh ko bhi hamaaraa lahu pasand kuchh shauq hai to ahl-e-kharaabaat se milo ai sufiyo nahin ye hamein haav-hu pasand aaegaa mai-kasho bat-e-mai kaa shikaar yaad jannat mein aa gai jo koi aab-ju pasand sau baar sar se shaikh ke Takraa chuke jise ham ko to mai-kade mein vahi hai subu pasand jab pi lagaa ke munh dam-e-iftaar rind ne botal ke munh ki aai farishton ko bu pasand ho jaaun main bhi gum kahin teri talaash mein teri tarah mujhe hai tiri justuju pasand"

"ye gavaaraa ki miraa dast-e-tamannaa baandhe apni mahram ko na kas kar koi itnaa baandhe baDh ke aae nigah-e-shauq balaaein le le koi baiThaa hai kis andaaz se juuDaa baandhe shohrat-e-be-asari koi miTaae kyuun kar ho na dard aah mein to koi havaa kyaa baandhe dhajjiyaan kyaa mire daaman ki mire kaam aaein baiTh kar dasht mein sab aabla-e-paa baandhe hai buri baat kaho khol ke botal rakh de shaikh pagDi mein na baazaar kaa saudaa baandhe ik zaraa khaa le havaa najd ki ThanDi ThanDi kah do lailaa abhi mahmil mein na pardaa baandhe bikhri zulfein yunhi lahraaein rukh-e-raushan par kabhi juuDaa na miraa gesuon vaalaa baandhe jab main dekhun miri aankhon mein miraa ghar phir jaae chakkar itnaa to bayaabaan mein bagulaa baandhe ham ne dekhaa taraf-e-mai-kada jaate the 'riyaaz' ik asaa thaame abaa pahne amaama baandhe"

"jo un se kaho vo yaqin jaante hain vo aise hain kuchh bhi nahin jaante hain baDe jannati hain ye mai-khvaar zaahid mai-e-talkh ko angbin jaante hain javaani khud aati hai sau husn le kar javaan koi ho ham hasin jaante hain shab-e-maah banti hai har shab mire ghar ye sab baada-vash mah-jabin jaante hain banaavaT bhi ik fan hai jo jaantaa ho tiri saadgi kuchh hamin jaante hain nigaahein na aankhon ke ghunghaT se niklein adaaein ghazab sharmgin jaante hain tiri kam-nigaahi se ubhre hain fitne tujhe ghair chin-bar-jabin jaante hain miri jaan par raat ban ban gai hai miraa haal kuchh ham-nashin jaante hain jo vaaqif nahin lutf-e-tajdid se kuchh vo tauba ki lazzat nahin jaante hain vo sharmili aankhein vo sharmili baatein vo hansnaa bhi khul kar nahin jaante hain miri but-parasti bhi hai haq-parasti miraa martaba ahl-e-din jaante hain baDe paak tinat baDe saaf baatin 'riyaaz' aap ko kuchh hamin jaante hain"

"hamaare dil mein koi aarzu nahin baaqi hamaare phuul mein ab rang-o-bu nahin baaqi bahut kahi dil-e-naadaan adu nahin baaqi miraa adu mire pahlu mein tu nahin baaqi tumhaare tiir ki ab aarzu nahin baaqi huaa hai piip kaleja lahu nahin baaqi ye mai-kada hai ki masjid ye aab hai ki sharaab koi bhi zarf baraa-e-vuzu nahin baaqi dharaa hai kyaa mire ghar mein ki mohtasib legaa pur-az-sharaab vo jaam-o-subu nahin baaqi vo rah ke ghair ki sohbat mein ho gae kuchh aur vo baat pichhli si agli si khu nahin baaqi thakaa paDaa huun to vaamaandgi ye kahti hai unhein kisi ki bhi ab justuju nahin baaqi jo mai ki buund na nikli to paD gayaa paani ba-haal-e-khvesh subu ab subu nahin baaqi hamaari aap ki baat uTh rahi hai mahshar par hamaari aap ki kuchh guftugu nahin baaqi jo nikle khaar to daaman se suiyaan uljhin jagah zaraa si kahin be-rafu nahin baaqi baDhi hai baat qayaamat mein jhuTe vaade par vo munfail hai to kuchh guftugu nahin baaqi ye mohtasib hai abas ghar ko sunghtaa phirtaa ki bund-bar bhi mai-e-mushk-bu nahin baaqi huaa hai aaine ke saath aks ko saktaa kisi mein jaan tire ru-ba-ru nahin baaqi bahein sharaab ke dariyaa to ham ko lutf nahin ki sabza kuchh bhi lab-e-aabju nahin baaqi baDhi hai paak-nihaadi ye baada-noshon ki ki ab namaaz mein qaid-e-vuzu nahin baaqi hamaari aankh mein taarik bazm-e-aalam hai jo zeb-e-bazm the vo shama-ru nahin baaqi 'riyaaz' maut ko kyuun maut aai jaati hai hamein to maut ki bhi aarzu nahin baaqi"

"us husn kaa shaidaa huun us husn kaa divaana har gul hai jahaan bulbul har shama hai parvaana patthar paDein donon par kaaba ho ki but-khaana donon se kahin achchhaa divaane kaa parvaana kahtaa hai anaa lailaa kaisaa hai ye divaana nibhne kaa nahin do din ab qais se yaaraana kaaba ho kalisaa ho dil ho ki sanam-khaana jalva ho jahaan teraa aabaad vo kaashaana chhoTaa saa miraa dil hai TuuTaa saa miraa dil hai surat mein to paimaana vusat mein hai mai-khaana dil se hai lagi ye lo ik zarra baraabar zau paD jaae tiraa partav ai jalva-e-jaanaana begaana yagaana hai dil aaina-khaana hai kaabe kaa ye kaaba hai but-khaane kaa but-khaana hai josh-e-junun parda ai ishq-e-khirad-aagah farzaana hai divaana divaana hai farzaana farhaad bhi majnun bhi lete hain qadam mere aisaa bhi na ho koi is ishq mein divaana yaad aai bahut ham ko TuuTi hui tauba bhi dekhaa jo kahin ham ne TuuTaa huaa paimaana shishe ki pari tujh mein kyaa husn kaa aalam hai saaqi na ho phir bhi to ye ghar hai pari-khaana de koi sakhi-daataa mai-khaana baDaa ghar hai aataa hai sadaa detaa shab ko koi mastaana bahke hue logon mein sab se hain 'riyaaz' achchhe raftaar hai mastaana guftaar hai rindaana"

"mujh ko dekhaa to hans ke kahte hain ashk ab be-sabab bhi bahte hain un ke kuche mein khush vo rahte hain har tarah ke jo ranj sahte hain jin ke dil mein hai dard duniyaa kaa vahi duniyaa mein zinda rahte hain mai-kada kyuun hai qibla-e-haajaat vo mujhe bevaquf kahte hain jo miTaate hain khud ko jiite ji vahi mar kar bhi zinda rahte hain dijiye kyuun 'riyaaz' ko taklif sher sunte hain vo na kahte hain"

"baam par aae kitni shaan se aaj baDh gae aap aasmaan se aaj jab kahaa ham khafaa hain jaan se aaj bole khush kar dein imtihaan se aaj kis maze ki havaa mein masti hai kahin barsi hai aasmaan se aaj be-takalluf na ho koi un se bane baiThe hain mehmaan se aaj main ne chheDaa to kis adaa se kahaa kuchh sunoge miri zabaan se aaj dil ke TukDon ki tarah ham ne chune TukDe kuchh dil ki daastaan se aaj nichi daaDhi ne aabru rakh li qarz pi aae ik dukaan se aaj unche koThon ke baiThne vaale baatein karte the aasmaan se aaj naa-tavaan dil ki be-zabaan dil ki aap ne sun li apne kaan se aaj koi jaa kar 'riyaaz' ko samjhaae kuchh khafaa hain vo apni jaan se aaj"

"vaada kabhi sachchaa koi kartaa hi nahin hai andesha-e-fardaa to guzartaa hi nahin hai daaman ki shikan duur se leti hai balaaein bal yaar ke abru kaa utartaa hi nahin hai dil se to mire siine ke phir daagh hi achchhe kam-bakht ubhaare se ubhartaa hi nahin hai sab bhuul gae us ko tire ahd-e-sitam mein ab shikva-e-gardun koi kartaa hi nahin hai jo jaante hain baDh ke nasheman se qafas ko par aison ke sayyaad katartaa hi nahin hai kyaa chiiz hai ai baada-kasho mausam-e-gul bhi is daur mein tauba koi kartaa hi nahin hai apne sitam-o-jaur use laakh sikhaao darbaan se tumhaare koi Dartaa hi nahin hai yuun pisne ko dil laakh pisein barg-e-hinaa par vo haath kabhi khuun mein bhartaa hi nahin hai kyaa aa gai us mein dil-e-betaab ki uljhan gesu hai kisi kaa ki sanvartaa hi nahin hai samjhaa hai asar koi balaa aah ko meri Dartaa hai vo gardun se utartaa hi nahin hai jab tak koi aae na lab-e-baam nikhar kar rang-e-shafaq-e-shaam nikhartaa hi nahin hai divaana 'riyaaz' auron se kyaa baat karegaa maashuqon se to baat vo kartaa hi nahin hai"

"hogi vo dil mein jo Thaani jaaegi kyaa hamaari baat maani jaaegi Dhal chuki hai ab javaani jaaegi ye sharaab-e-arghavaani jaaegi baad-e-tauba aatish-e-sayyaal-e-khum mere ghar se ho ke paani jaaegi khizr yunhi gum raheinge umr-bhar yunhi umr-e-jaavedaani jaaegi tegh hi kyaa haath mein qaatil ke thi ai hinaa tu bhi to saani jaaegi aae taare hijr ki shab kuchh nazar ab balaa-e-aasmaani jaaegi arsh par hai khush-jamaalon kaa mizaaj kyuun kar un ki lan-taraani jaaegi khidmat-e-maikhaana kar le varna shaikh raaegaan ye zindagaani jaaegi maut se bad-tar buDhaapaa aaegaa jaan se achchhi javaani jaaegi shokhiyaan kahti hain khul kheleinge vo ab hayaa ki paasbaani jaaegi aag ban kar jaam mein aaegi mai zamzami mein ho ke paani jaaegi bosa-e-gesu se hain chin-ba-jabin raat-bhar kyaa sargiraani jaaegi bole sun kar dil ke paamaali kaa haal kis gali ki khaak chhaani jaaegi jaan se baDh kar ise rakhte aziiz kyaa samajhte the javaani jaaegi saath laae hain qafas se naa-tavaan jaate jaate naa-tavaani jaaegi naale karnaa siikh le ai andalib ab ye tarz-e-naghma-khvaani jaaegi shaikh ne maangi hai apni umr ki mai-kade se ab puraani jaaegi jaa chuke hain aap kal dushman ke ghar aaj marg-e-naa-gahaani jaaegi piine aaein to farishta-khu 'riyaaz' huur ke daaman mein chhaani jaaegi"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"