Ghazal

"ham hain insaan is liye laazim hai ki musalsal kaam karein koi khudaa to nahin hain ham jo saatvein din aaraam karein ham to hain bande jaan-o-badan se aap ke husn ke taabe'daar aap hain aaqaa ham jaise chaahe jitnon ko ghulaam karein ham ko to 'aadat hai raaton mein jaagne rone gaane ki ham ko hamaare haal pe chhoDein niind na apni haraam karein aap ki aankhon se lafzon kaa rizq utartaa hai ham par aap jo chaahein sukhaa rakkhein yaa baarish ilhaam karein"

"badan baandhe hue saanson ki rahdaari mein rahte hain ki ham har dam kahin jaane ki tayyaari mein rahte hain na hon aansu to ye aankhein bhali lagti nahin ham ko so aksar aap apni hi dil-aazaari mein rahte hain hamein maa'lum hai raunaq ye baazaaron ki jhuTi hai magar phir bhi fareb-e-husn-e-baazaari mein rahte hain ham ahl-e-'ishq phir ahl-e-havas se maat khaa baiThe vazifa-khvaar bazm-e-husn-e-darbaari mein rahte hain hamaare dil to hain masruf sarkaarein giraane mein badan taa'mil-e-ahkaamaat-e-sarkaari mein rahte hain dabe hain khaak mein kitne hi suraj chaand aur taare so ham apni zamin ki aasmaan-kaari mein rahte hain hamaari shaa'iri ik mustaqil holi kaa mausam hai hazaaron rang is lafzon ki pichkaari mein rahte hain ‘janaab-e-farhat-ehsaas' ab na shahri hain na sahraai musalsal darmiyaan-e-khvaab-o-be-daari mein rahte hain"

"pahle to zaraa saa haT ke dekhaa us shokh se phir lipaT ke dekhaa itni bhi buri na thi jo main ne duniyaa ko zaraa saa haT ke dekhaa dekhaa use us kaa ho ke aur phir kyaa farq paDegaa kaT ke dekhaa ham jama hue hi jaa rahe the aaraam milaa jo ghaT ke dekhaa bas ek hi khvaab thaa ki jis ko taa-umr ulaT-palaT ke dekhaa vo aur qarib aa gayaa thaa jab main ne zaraa simaT ke dekhaa phir dil ne mire gham aur khushi ko rassi ki tarah se baT ke dekhaa kal Duub rahaa thaa 'farhat-ehsaas' ham ne bhi tamaashaa DaT ke dekhaa"

"dabaa paDaa hai kahin dasht mein khazaana miraa tu kis talaash mein hai shahr mein divaana miraa tamaam raat hai aankhon se aansuon ki kashid tamaam raat khulaa hai sharaab-khaana miraa ye meri ruuh kaa jhagDaa thaa aasmaan ke saath bilaa-qusur badan ban gayaa nishaana miraa falak ke sar pe paDe hain meri zamin ke paanv mire sirhaane se unchaa hai paaitaana miraa main ek zakhm baraabar zamin pe rahtaa huun vo kah rahe hain ye qabza hai ghaasibaana miraa to aao ahl-e-jahaan is pe faisla kar lein makaan saaraa tumhaaraa darun-e-khaana miraa khud apne aap mein hai saari meri aamad-o-raft kahin se aanaa na ab hai kahin bhi jaanaa miraa kahaan kaa 'ishq havas tak bhi ho nahin sakti yahi rahegaa jo andaaz mujrimaana miraa bikherni hai jise zulf us kaa istiqbaal vabaal-e-shahr se khaali hai ek shaana miraa main khuub faaqa na kartaa to mar gayaa hotaa mire khilaaf saf-aaraa thaa aab-o-daana miraa kabhi khudaa kabhi insaan raah mein haail khud apne aap se rishta bhi ghaaebaana miraa kahin mire kisi lamhe se phir hui koi chuuk phir aate aate kahin rah gayaa zamaana miraa tire ghayaab ki khidmat mein saaraa meraa qusur vujud phir bhi vahi ghair-haaziraanaa miraa vo mere lafz ke donon suron se vaaqif hai kabhi bhi kaam na aayaa koi bahaana miraa"

"din ne itnaa jo marizaana banaa rakkhaa hai raat ko ham ne shifaa-khaana banaa rakkhaa hai intiqaam aisaa liyaa hai miri tanhaai ne shahr kaa shahr bayaabaana banaa rakkhaa hai khaak kaa khaana gharibaana-badan hai ki jise raunaq-e-ishq ne shaahaana banaa rakkhaa hai ham ko maalum hai khuub apni haqiqat so use usi unvaan kaa afsaana banaa rakkhaa hai mubtazil hone kaa aap apnaa maza hai varna ham ne bhi khud ko hakimaana banaa rakkhaa hai aadmi ho ki khudaa sab kaa baraabar hai vazn ishq ne ek hi paimaana banaa rakkhaa hai chaak kar kar ke hue tang to divaanon ne chaak ko ab ke garibaana banaa rakkhaa hai 'farhatullah' hai vo aql kaa putlaa jis ne farhat-ehsaas ko divaana banaa rakkhaa hai"

"mahfil mein ab ke aao to aisi khataa na ho rang-e-libaas rang-e-badan se sivaa na ho itnaa to rang pahle fazaa mein kabhi na thaa uDti hui kahin koi us ki qabaa na ho uljhan si hone lagti hai mere charaagh ko kuchh din muqaable pe jo us ke havaa na ho saari alaamatein to hain aaghaaz ishq ki dekho to jism-o-jaan mein koi gul khilaa na ho"

"khaak ke zakhm ko paani se rafu karte hain dekh ham kitni ravaani se rafu karte hain kabhi karte hain rafu khuun ki ik dhaar se ham aur kabhi ashk-fishaani se rafu karte hain kasrat-e-khvaab se phaT jaati hain aksar aankhein ham in aankhon ko kahaani se rafu karte hain der tak ek jagah rahne se aa jaate hain zakhm to unhein naql-e-makaani se rafu karte hain ham vo bad-bakht muhaajir hain ki hijrat ke shigaaf mustaqil hijrat-e-saani se rafu karte hain sang-e-ehsaas idhar aa ki rulaa kar tujh ko tiraa patthar tire paani se rafu karte hain"

"tamaam shahr ki khaatir chaman se aate hain hamaare phuul kisi ke badan se aate hain ham un labon se lagaa kar raheinge lab apne sukhan tamaam usi anjuman se aate hain paDaa huun us ke badan ke bides mein kab se main kyaa paDhun jo ye naame vatan se aate hain ki jaise taptaa tavaa aur buund paani ki zamin pe ham bhi usi tarah chhan se aate hain ham aap-biti sunaate hain saada lafzon mein ye saare sher hamein tark-e-fan se aate hain zamaane-bhar se hai 'ehsaas-ji' ki chaal alag har ek bazm mein vo bad-chalan se aate hain"

"ek ghazal kahte hain ik kaifiyyat taari kar lete hain yuun duniyaa par agli chaDhaai ki tayyaari kar lete hain kitni mohabbat kartaa hai vo kaise kahein gar puchh le koi so aadaad-o-shumaar ki khaatir zakhm-shumaari kar lete hain us ke khvaab uThaae nahin uThte halki-phulki aankhon se aise mein ham raatein jaag ke palkein bhaari kar lete hain bahut ziyaada sehat-mandi ek tarah ki be-adabi hai us se milne jaate hain to kuchh bimaari kar lete hain jab bhi lahu mein rang-e-khizaan ki sakhti baDhne lag jaati hai chand lab o rukhsaar bulaa kar jashn-e-bahaari kar lete hain sabza-e-jaan ke haraa-bharaa rahne ki ek yahi surat hai sukhaa paDte hi aankhon ki nahrein jaari kar lete hain itnaa maal kahaan ki dukaan baazaar-e-mohabbat mein le paaein chhoTaa-moTaa kaarobaar-e-tah-baazaari kar lete hain aatish-e-shauq sivaa karne ko munh phere rahte hain us se ham se saada-lauh bhi aksar ye hushyaari kar lete hain nakhl-e-umid haraa ho jaataa hai aksar baaraan-e-karam se so ham aksar us ke dar par khud ko bhikaari kar lete hain vo sirf ek ke paas hi rah ke chalaa jaae to khair nahin hai ruuh o badan aise mauqon par maaraa-maari kar lete hain paanv havaa jaise hain hamaare jin kaa naqsh nahin rah paataa shaadi-shuda har raahguzar kuchh din mein kunvaari kar lete hain afsar-e-duniyaa sakht sahi 'farhat-ehsaas' hain aakhir ham bhi daftar mein bhi apni si kuchh kaar-guzaari kar lete hain"

"be-rang baDe shahr ki hasti bhi vahin thi ik rang uDaati hui titli bhi vahin thi baazaar ke jaadu ki na thi kaaT mire paas jo chiiz buri thi vahi achchhi bhi vahin thi bas ik tiraa chehra hi na thaa mahfil-e-gul mein belaa bhi thaa champaa bhi chameli bhi vahin thi is baaDh mein kartaa thaa jahaan bhi main kinaara andar se ubalti miri naddi bhi vahin thi sailaab-e-badan us kaa jo aayaa to gayaa main har chand mire jism ki kashti bhi vahin thi ai ishq jahaan tu ne mujhe jama kiyaa thaa miTTi miri aakhir ko bikharni bhi vahin thi afsos gai qabr bhi 'ehsaas'-miyaan ki ye qabr jahaan thi miri miTTi bhi vahin thi"

"main tamaam gard-o-ghubaar huun mujhe meri surat-e-haal de miri khaak hai ki uDi hui ise jism ke khad-o-khaal de ki na jaane kaun mire vajud pe paanv rakh ke chalaa gayaa koi naqsh-e-paa huun rukaa huaa ise raaste se nikaal de main karun to kyaa ki jame rahein mire paanv meri zamin par mire ghar mein mujh ko sambhaal yaa mujhe mere ghar se nikaal de ye falak-shigaaf imaaratein mire aab o gil se bichhaD gaiin mire aab o gil pe karam na kar tu imaaraton ko zavaal de vo milaa ki jaise bichhaD gayaa koi saaneha bhi nahin huaa miraa ishq bhi koi ishq hai ki na khush kare na malaal de mire honTh jaane kahaan gae ki tire hi naam na le sake mujhe harf o saut ke maavaraa koi aur khvaab-o-khayaal de koi barf si hai jami hui miri choTiyaan hain Dhaki hui miraa kohsaar tulua ho mire paaniyon ko ubaal de"

"ruuh ko to ik zaraa si raushni darkaar hai jism ko lekin bahut kuchh aur bhi darkaar hai aaj phir ham se kiyaa daryaaft koh-e-tur ne is se kyaa kahte ki nur-e-gumrahi darkaar hai baad mein ishq-e-haqiqi bhi mayassar ho to kyaa ye majaazi to hamein fauran abhi darkaar hai ishq us khvaahish pe meri soch mein gum ho gayaa mujh ko paani bhi hai darkaar aag bhi darkaar hai farhat-ehsaas apni miTTi kaa dhaDaktaa dil sambhaal baad marne ke jo tujh ko zindagi darkaar hai"

"naa-qaabil-e-yaqin thaa agarche shurua mein suraj magar ghurub huaa thaa tulua mein mullaa ko de diyaa hai namaazon kaa baaqi kaam khud ko lagaa liyaa hai khushu-o-khuzua mein sirf ek chehra ek hi naam ek hi khayaal hotaa hai sab ke saath yahi sab shurua mein itne halaala-baaz agar ghaat mein na hon kyaa aisaa faasla hai talaaq-o-rujua mein shaayad miri namaaz yahin khatm ho gai ik umr ho gai ki rukaa huun rukua mein mohmal sahi pa taab-o-tavaanaai dekhiye us ain se jo aai hai is aab-o-jua mein urdu mein to bas ek vuzu aur ik namaaz do do namaazein hoti hain arabi vuzua mein aslein tamaam naachti gaati guzar gaiin dekhaa nahin kisi ne vafur-e-furua mein 'ehsaas' kyaa hai ye 'zafar' 'iqbaal' ki tarah tausia ain sher ki hadd-e-vuqua mein"

"khaana-saaz ujaalaa maar chaand pe apnaa bhaalaa maar nuur kaa dariyaa phuuT paDe hijr kaa aisaa naala maar raasta paani maangtaa hai apne paanv kaa chhaalaa maar khaas ko rang aam dikhaa adnaai se aalaa maar chhoD ye zillat dasht ko chal shahr ke ghar ko taalaa maar ruuh bhi sar ho jaaegi pahle badan kaa paalaa maar der na kar 'farhat-ehsaas' maar safed pe kaalaa maar"

"ghar mein chizein baDh rahi hain zindagi kam ho rahi hai dhire dhire ghar ki apni raushni kam ho rahi hai shahr ke baazaar ki raunaq mein dil bujhne lage hain khuub khush hone ki khvaahish mein khushi kam ho rahi hai ab kisi ko bhi chhuo lagtaa hai pahle se chhuaa saa vo jo thi pahle-pahal ki sansani kam ho rahi hai tai-shuda lafzon mein karte hain ham izhaar-e-mohabbat ab to pahle ishq mein bhi an-kahi kam ho rahi hai le gayaa ye shahr us ko mere pahlu se uThaa kar mujh ko lagtaa hai miri divaangi kam ho rahi hai husn kaa baazaar aanaa jaanaa bhi kuchh baDh rahaa hai kuchh miri aankhon ki bhi paakizgi kam ho rahi hai vaqt DanDi maartaa hai tolne mein meraa hissa din bhi chhoTe paD rahe hain raat bhi kam ho rahi hai shahr ki koshish ki khud ko aur pechida banaa le meri ye tashvish meri saadgi kam ho rahi hai saahilon ki bastiyaan ye dekh kar khaamosh kyuun hain bastiyon ke phailne se hi nadi kam ho rahi hai shaam aate hi tumhein rahti hai ghar jaane ki jaldi 'farhat-ehsaas' in dinon aavaargi kam ho rahi hai"

"bahut si aankhein lagin hain aur ek khvaab tayyaar ho rahaa hai haqiqaton se muqaable kaa nisaab tayyaar ho rahaa hai tamaam duniyaa ke zakhm apne bayaan qalam-band kar rahe hain miri savaaneh-hayaat kaa ek baab tayyaar ho rahaa hai bahut se chaand aur bahut se phuul ek tajrabe mein lage hain kab se sunaa hai tum ne kahin tumhaaraa javaab tayyaar ho rahaa hai chaman ke phulon mein khuun dene ki ek tahrik chal rahi hai aur is lahu se khizaan ki khaatir khizaab tayyaar ho rahaa hai puraani basti ki khiDkiyon se main dekhtaa huun to sochtaa huun nayaa jo vo shahr hai bahut hi kharaab tayyaar ho rahaa hai khule hue hain fanaa ke daftar mein sab anaasir ke goshvaare ki aasmaanon mein ab zamin kaa hisaab tayyaar ho rahaa hai main jab kabhi us se puchhtaa huun ki yaar marham kahaan hai meraa to vaqt kahtaa hai muskuraa kar janaab tayyaar ho rahaa hai badan ko jaanaa hai pahli baar aaj ruuh ki mahfil-e-tarab mein to aisaa lagtaa hai jaise koi navaab tayyaar ho rahaa hai is imtihaan ke savaal aate nahin nisaabon se maktabon ke ajiib aashiq hai ye jo paDh kar kitaab tayyaar ho rahaa hai junun ne barpaa kiyaa hai sahraa mein shahr ki taaziyat kaa jalsa to 'farhat-ehsaas' bhi ba-chashm-e-pur-aab tayyaar ho rahaa hai"

"dekhte hi dekhte khone se pahle dekhte raushni ko raushni hone se pahle dekhte is tarah zaaea hui hotin na aankhein niind mein ham ye saare khvaab agar sone se pahle dekhte shahr kaa aaina-khaana hai sar-e-sailaab-e-aks apnaa chehra bhiiD mein khone se pahle dekhte baad kaa saaraa safar qaabu mein rahtaa aap ke khaak ko gar be-karaan hone se pahle dekhte ab to jo kuchh hai sahaafat hi sahaafat hai yahaan jo bhi honaa thaa use hone se pahle dekhte biij kis surat mein baahar aaegaa kis ko khabar fasl kyaa hogi use bone se pahle dekhte dekhte baadal se baarish tak safar taklif kaa tum miri aankhein agar rone se pahle dekhte dekhne mein der kar di aap ne 'ehsaas' ko ho chukaa bas vo use hone se pahle dekhte"

"zamin ne lafz ugaayaa nahin bahut din se kuchh aasmaan se bhi aayaa nahin bahut din se ye shahr vo hai ki koi khushi to kyaa detaa kisi ne dil bhi dukhaayaa nahin bahut din se ajiib log hain bas raaston mein milte hain kisi ne ghar hi bulaayaa nahin bahut din se tujhe bhulaanaa to mumkin nahin magar yunhi tiraa khayaal hi aayaa nahin bahut din se namaaz kaise paDhun main baghair paak hue ki aansuon mein nahaayaa nahin bahut din se ham apni mamlikat-e-dard mein akele hain hamaari koi reaayaa nahin bahut din se mufaahamat si ajab ho gai hai raat ke saath charaagh main ne jalaayaa nahin bahut din se"

"paikar-e-aql tire hosh Thikaane lag jaaein tere pichhe bhi jo ham jaise divaane lag jaaein us kaa mansuba ye lagtaa hai gali mein us ki ham yunhi khaak uDaane mein Thikaane lag jaaein soch kis kaam ki rah jaaegi teri ye bahaar apne andar hi agar ham tujhe paane lag jaaein sab ke jaisi na banaa zulf ki ham saada-nigaah tere dhoke mein kisi aur ke shaane lag jaaein raat bhar rotaa huun itnaa ki ajab kyaa is mein Dher phulon ke agar mere sirhaane lag jaaein dasht karnaa hai hamein shahr ke ik goshe ko to chalo kaam pe ham saare divaane lag jaaein 'farhat' ehsaas ab aisaa bhi ik aahang ki log sun ke ash'aar tire naachne gaane lag jaaein"

"ham apne aap ko apne se kam bhi karte rahte hain aur is nuqsaan par bekaar gham bhi karte rahte hain uThaate rahte hain din-raat divaar-e-vajud apni magar divaar ko thoDaa saa kham bhi karte rahte hain ham us ke husn kaa jaadu bhi chaDhne dete hain khud par aur apne aap par kuchh paDh ke dam bhi karte rahte hain hamein bhi shahr ki raunaq balaa le jaati hai aksar magar ham shahr ki raunaq se ram bhi karte rahte hain hamein jab khuub chaDh jaataa hai nashsha apni hasti kaa to us nashshe mein ham raqs-e-adam bhi karte rahte hain ye aaina hamaare ru-ba-ru jo kuchh bhi kartaa hai vahi sab aaine ke saath ham bhi karte rahte hain kabhi jab farhat-ehsaas apnaa afsaana sunaate hain use apni haqiqat kaa alam bhi karte rahte hain"

"kisi ko kaise dikhaaun main apni raat ke khel jo meri zaat mein hote hain kaaenaat ke khel gunaah itne baDhaae ki pul hi toD diyaa pul-e-siraat se khele pul-e-siraat ke khel khilaaDi ham hain magar kheltaa hai aur koi hamaare haath mein kab hain hamaare haat ke khel ham is bisaat pe ulTi taraf se baiThe hain hamaare haath mein aae hain saare maat ke khel ham apne khuun ki ravaani mein she'r likhte hain udhar vo khel rahe hain qalam davaat ke khel badan bachaao ki ab ke badan ki baari hai ki ruuh khel chuki apne sab najaat ke khel ye log maut se itne Dare hue hain ki bas koi sikhaae kahaan tak inhein hayaat ke khel"

"raat ko darkaar thaa kuchh daastaani rang kaa ham charaagh-e-khaamushi laae zabaani rang kaa us ne peshaani hamein di hai zamini rang ki aur sajda chaahtaa hai aasmaani rang kaa gehuein-pan ne nikalvaayaa thaa jannat se hamein jaan-e-man ab ke kareinge 'ishq dhaani rang kaa 'ishq ne to meraa chehra hi badal kar rakh diyaa aisaa aaina dikhaayaa us ne saani rang kaa ham mohabbat karne vaalon ki zidein bhi hain 'ajib chaahiye ik vaaqi'a lekin kahaani rang kaa shaayad ab uktaa gae sahraa-navardi se ghazaal chaahte hain koi viraana makaani rang kaa 'farhat-ehsaas' us ki miTTi ki samaa'at khil uThi she'r jab main ne sunaayaa teraa paani rang kaa"

"ham apne she'r mein kuchh pahlu-e-zam Daal dete hain koi Toke to zam mein aur bhi dam Daal dete hain bahut unche suron mein boltaa hai jab koi ham se to ham unche suron mein apnaa maddham Daal dete hain sulajhne hi na deinge ham kabhi us zulf-e-sarkash ko sulajhne par jab aati hai to phir kham Daal dete hain hamaare zakhm marham ko samajhte hain ghizaa apni so ham zakhmon ke aage rizq-e-marham Daal dete hain"

"ye khubaan shahr ke ham se bahut hushyaari karte hain hamein saada samajh kar khuub khush-guftaari karte hain baDi mushkil se toDe hain ye maa’mulaat-e-hijr aakhir so ik 'arsa huaa din mein hi shab-bedaari karte hain nahin paate dar-o-divaar mein ghar ki koi surat to ham ghar ke tasavvur mein dar-o-divaari karte hain kahaani jo karaati hai vahi to ham ko karnaa hai bhalaa ho yaa buraa ho ham to bas kirdaari karte hain hamein tayyaar hone ki zarurat hi nahin paDti ki saari zindagi marne ki hi tayyaari karte hain to ham qaanun-shikni ki tarah karte hain raat apni sahar se shaam tak har kaam jab sarkaari karte hain sharaabein to kalidein hain lahu ke qaid-khaanon ki so taale toDte hain aur dariyaa jaari karte hain sunaa hai tandurusti 'ishq mein achchhi nahin hoti chalo ji 'farhat-ehsaas' ab zaraa bimaari karte hain"