Ghazal

"maston pe ungliyaan na uThaao bahaar mein dekho to hosh hai bhi kisi hoshyaar mein kuchh mohtasib kaa khauf hai kuchh shaikh kaa lihaaz piitaa huun chhup ke daaman-e-abr-e-bahaar mein vo saamne dhari hai suraahi bhari hui donon jahaan hain aaj mire ikhtiyaar mein allaah baat kyaa hai ki divaangi miri divaangi nahin nazar-e-hoshiyaar mein jhuTi tasalliyon se na bahlaao jaao jaao jaao ki tum nahin ho mire ikhtiyaar mein huun vaadi-e-hayaat mein is tarah sust-e-gaam jaise ho paa-shikasta koi khaar-zaar mein ab vo sukun-e-yaas na vo iztiraab-e-shauq siine mein dil hai yaa koi laasha mazaar mein ab khaak uDaaiye na hamaare mazaar ki ab khaak bhi nahin hai hamaare mazaar mein tanhaai-e-firaaq mein ummid baar-haa gum ho gai sukut ke hangaama-zaar mein vo andalib-e-gulshan-e-maani huun main 'hafiz' soz-e-sukhan se aag lagaa duun bahaar mein"

"o dil toD ke jaane vaale dil ki baat bataataa jaa ab main dil ko kyaa samjhaaun mujh ko bhi samjhaataa jaa haan mere majruh tabassum khushk labon tak aataa jaa phuul ki hast-o-bud yahi hai khiltaa jaa murjhaataa jaa meri chup rahne ki aadat jis kaaran bad-naam hui ab vo hikaayat aam hui hai suntaa jaa sharmaataa jaa ye dukh-dard ki barkhaa bande den hai tere daataa ki shukr-e-neamat bhi kartaa jaa daaman bhi phailaataa jaa jiine kaa armaan karun yaa marne kaa saamaan karun ishq mein kyaa hotaa hai naaseh aql ki baat sujhaataa jaa tujh ko abr-aalud dinon se kaam na chaandni raaton se bahlaataa hai baaton se bahlaataa jaa bahlaataa jaa donon sang-e-raah-e-talab hain raah-numaa bhi manzil bhi zauq-e-talab har ek qadam par donon ko Thukraataa jaa naghme se jab phuul khileinge chunne vaale chun leinge sunne vaale sun leinge tu apni dhun mein gaataa jaa aakhir tujh ko bhi maut aai khair 'hafiz' khudaa-haafiz lekin marte marte pyaare vajh-e-marg bataataa jaa"

"ye kyaa maqaam hai vo nazaare kahaan gae vo phuul kyaa hue vo sitaare kahaan gae yaaraan-e-bazm jurat-e-rindaana kyaa hui un mast ankhDiyon ke ishaare kahaan gae ek aur daur kaa vo taqaazaa kidhar gayaa umDe hue vo hosh ke dhaare kahaan gae uftaad kyuun hai laghzish-e-mastaana kyuun nahin vo uzr-e-mai-kashi ke sahaare kahaan gae dauraan-e-zalzala jo panaah-e-nigaah the leTe hue the paanv pasaare kahaan gae baandhaa thaa kyaa havaa pe vo ummid kaa tilism rangini-e-nazar ke ghubaare kahaan gae uTh uTh ke baiTh baiTh chuki gard raah ki yaaro vo qaafile thake haare kahaan gae har mir-e-kaarvaan se mujhe puchhnaa paDaa saathi tire kidhar ko sidhaare kahaan gae farmaa gae the raah mein baiTh intizaar kar aae nahin palaT ke vo pyaare kahaan gae tum se bhi jin kaa ahd-e-vafaa ustuvaar thaa ai dushmanon vo dost hamaare kahaan gae kashti nai bani ki uThaa le gayaa koi takhte jo lag gae the kinaare kahaan gae ab Dubton se puchhtaa phirtaa hai naakhudaa jin ko lagaa chukaa huun kinaare kahaan gae betaab tere dard se the chaaraagar 'hafiz' kyaa jaaniye vo dard ke maare kahaan gae"

"koi davaa na de sake mashvara-e-duaa diyaa chaaragaron ne aur bhi dil kaa dard baDhaa diyaa donon ko de ke suratein saath hi aaina diyaa 'ishq bisorne lagaa husn ne muskuraa diyaa zauq-e-nigaah ke sivaa shauq-e-gunaah ke sivaa mujh ko buton se kyaa milaa mujh ko khudaa ne kyaa diyaa thi na khizaan ki rok-thaam daaman-e-ikhtiyaar mein ham ne bhari bahaar mein apnaa chaman luTaa diyaa husn-e-nazar ki aabru sanat-e-barhaman se hai jis ko sanam banaa liyaa us ko khudaa banaa diyaa daagh hai mujh pe 'ishq kaa meraa gunaah bhi to dekh us ki nigaah bhi to dekh jis ne ye gul khilaa diyaa 'ishq ki mamlikat mein hai shorish-e-aql-e-naa-muraad ubhraa kahin jo ye fasaad dil ne vahin dabaa diyaa naqsh-e-vafaa to main hi thaa ab mujhe DhunDte ho kyaa harf-e-ghalat nazar paDaa tum ne mujhe miTaa diyaa khubs-e-darun dikhaa diyaa har dahan-e-ghaliz ne kuchh na kahaa 'hafiz' ne hans diyaa muskuraa diyaa"

"un ko jigar ki justuju un ki nazar ko kyaa karun mujh ko nazar ki aarzu apne jigar ko kyaa karun raat hi raat mein tamaam tai hue umr ke maqaam ho gai zindagi ki shaam ab main sahar ko kyaa karun vahshat-e-dil fuzun to hai haal miraa zubun to hai ishq nahin junun to hai us ke asar ko kyaa karun farsh se mutmain nahin past hai naa-pasand hai arsh bahut buland hai zauq-e-nazar ko kyaa karun haae koi davaa karo haae koi duaa karo haae jigar mein dard hai haae jigar ko kyaa karun ahl-e-nazar koi nahin is liye khud-pasand huun aap hi dekhtaa huun main apne hunar ko kyaa karun tark-e-taalluqaat par gir gai barq-e-iltifaat raahguzar mein mil gae raahguzar ko kyaa karun"

"in talkh aansuon ko na yuun munh banaa ke pi ye mai hai khud-kashid ise muskuraa ke pi utreinge kis ke halq se ye dil-kharaash ghunT kis ko payaam duun ki mire saath aa ke pi mashrub-e-jam hi talkhi-e-gham kaa ilaaj hai shirini-e-kalaam zaraa si milaa ke pi vaaiz ki ab na maan agar jaan hai aziiz is daur mein ye chiiz ba-taur ik davaa ke pi bhar le piyaala khum-kada-e-zist se 'hafiz' khun-e-jigar hai saamne chal kar khudaa ke pi"

"dosti kaa chalan rahaa hi nahin ab zamaane ki vo havaa hi nahin sach to ye hai sanam-kade vaalo dil khudaa ne tumhein diyaa hi nahin palaT aane se ho gayaa saabit naama-bar tu vahaan gayaa hi nahin haal ye hai ki ham gharibon kaa haal tum ne kabhi sunaa hi nahin kyaa chale zor dasht-e-vahshat kaa ham ne daaman kabhi siyaa hi nahin ghair bhi ek din mareinge zarur un ke hisse mein kyaa qazaa hi nahin us ki surat ko dekhtaa huun main meri sirat vo dekhtaa hi nahin ishq meraa hai shahr mein mashhur aur tum ne abhi sunaa hi nahin qissa-e-qais sun ke farmaayaa jhuuT ki koi intihaa hi nahin vaasta kis kaa dein 'hafiz' un ko un buton kaa koi khudaa hi nahin"

"simaT aae hain ghar mein viraane tu kidhar jaa rahaa hai divaane dosti ab gale kaa haar nahin taar TuuTaa bikhar gae daane subh-dam apni apni raah lage sham' ke jaan-nisaar parvaane zindagi se nipaT rahaa huun abhi maut kyaa hai miri balaa jaane"

"daur-e-rafta dekh letaa huun gulistaan dekh kar gul ko khandaan dekh kar bulbul ko giryaan dekh kar naakhudaa par mutmain the bandagaan-e-naakhudaa ab khudaa yaad aa rahaa hai mauj-e-tufaan dekh kar sang-dil samjhaa barahman shaikh samjhe had mazaaq hans paDe donon mujhe ab tak musalmaan dekh kar shikva farmaate hi ulTi minnatein karni paDin dil pashemaan ho gayaa un ko pashemaan dekh kar is mashaqqat-gaah mein raahat kaa ye gosha 'hafiz' dekh lo aur khush raho gor-e-gharibaan dekh kar"

"mazhaka aao uDaaein ishq-e-be-buniyaad kaa ik judaa madfan banaaein tesha-e-farhaad kaa vaah-vaah kyaa rang badlaa gulshan-e-ijaad kaa saaya-e-gul par gumaan hone lagaa sayyaad kaa bah chalaa hai ashk-e-hasrat al-madad ai barq-e-yaas ye bhi ik daana hai mere khirman-e-barbaad kaa kis nigaah-e-garm se dekhaa hai us ne vaqt qatl aah ThanDi paD gai dam ghuT gayaa fariyaad kaa ghuncha ghuncha khauf se mujh ko nazar aayaa qafas patte patte par huaa dhokaa kaf-e-saiyaad kaa ye samajh liije kisi shaa'ir ke dil kaa TuTnaa TuuT jaanaa hai tilism-e-aalam-e-ijaad kaa ho na ehsaas-e-asiri to rihaai hai muhaal aise qaidi naam tak lete nahin mi'aad kaa zo'f ki ye himmatein hain naa-tavaani kaa ye zor TukDe TukDe kar diyaa daaman miri fariyaad kaa us sukhanvar se mujhe faiz-e-sukhan hai ai 'hafiz' naam-e-naami hai giraami jis jahaan ustaad kaa"

"ubhre jo khaak se vo tah-e-khaak ho gae sab paaemaal-e-gardish-e-aflaak ho gae rakhti thi laag mere garebaan se nau-bahaar daaman gulon ke baagh mein kyuun chaak ho gae the dida-haa-e-khushk mohabbat ki aabru kam-bakht un ke saamne namnaak ho gae aisaa bhi kyaa mizaaj qayaamat kaa din hai aaj pesh-e-khudaa tum aur bhi bebaak ho gae aate hi bazm-e-vaaz se chalte bane 'hafiz' do harf sun ke saahib-e-idraak ho gae"

"uTho ab der hoti hai vahaan chal kar sanvar jaanaa yaqini hai ghaDi do mein mariz-e-gham kaa mar jaanaa mujhe Dar hai gulon ke bojh se marqad na dab jaae unhein aadat hai jab aanaa zarur ehsaan dhar jaanaa habaab aa saamne sab valvale josh-e-javaani ke ghazab thaa qulzum-e-ummid kaa chaDh kar utar jaanaa yahaan juz kashti-e-mauj-e-balaa kuchh bhi na paaoge isi ke aasare dariyaa-e-hasti se utar jaanaa mabaadaa phir asir-e-daam-e-aql-o-hosh ho jaaun junun kaa is tarah achchhaa nahin had se guzar jaanaa 'hafiz' aaghaaz se anjaam tak rahzan ne pahunchaayaa usi ko ham-safar paayaa usi ko ham-safar jaanaa"

"in gesuon mein shaana-e-armaan na kijiye khun-e-jigar se daavat-e-mizhgaan na kijiye mar jaaiye na kijiye zikr-e-bahisht-o-hur ab khvaab ko bhi khvaab-e-pareshaan na kijiye baaqi ho jo bhi hashr yahin par uThaaiye marne ke baad ziist kaa saamaan na kijiye dozakh ko dijiye na paraagandagi miri shiraaza-e-bahisht pareshaan na kijiye shaayad yahi jahaan kisi majnun kaa ghar bane viraana bhi agar hai to viraan na kijiye kyaa naakhudaa baghair koi Dubtaa nahin mujh ko mire khudaa se pashemaan na kijiye hai but-kade mein bhi use imaan kaa khayaal kyuun e'tibaar-e-mard-e-musalmaan na kijiye ham se ye baar-e-lutf uThaayaa na jaaegaa ehsaan ye kijiye ki ye ehsaan na kijiye aaina dekhiye miri surat na dekhiye main aaina nahin mujhe hairaan na kijiye tu hi aziz-e-khaatir-e-ahbaab hai 'hafiz' kyaa kijiye agar tujhe qurbaan na kijiye"

"ishq ne husn ki be-daad pe ronaa chaahaa tukhm-e-ehsaas-e-vafaa sang mein bonaa chaahaa aane vaale kisi tufaan kaa ronaa ro kar naa-khudaa ne mujhe saahil pe Dubonaa chaahaa sang-dil kyuun na kahein but-kade vaale mujh ko main ne patthar kaa parastaar na honaa chaahaa hazrat-e-shaikh na samjhe mire dil ki qimat le ke tasbih ke rishte mein pironaa chaahaa koi mazkur na thaa ghair kaa lekin tum ne baaton baaton mein ye nashtar bhi chubhonaa chaahaa dida-e-tar se bhi sarzad huaa ik jurm-e-azim hashr mein naama-e-aamaal ko dhonaa chaahaa marte marte bhi tavaqqoa rahi dildaari ki rakh ke sar zaanu-e-taqdir pe sonaa chaahaa haae kis dard se ki zabt ki talqin mujhe hans paDe dost jo main ne kabhi ronaa chaahaa jins-e-shohrat bahut arzaan thi magar main ne 'hafiz' daulat-e-dard ko be-kaar na khonaa chaahaa"

"vo qaafila aaraam-talab ho bhi to kyaa ho aavaaz-e-nafas hi jise aavaaz-e-daraa ho khaamosh ho kyuun dard-e-mohabbat ke gavaaho daave ko nibaaho mire naalo miri aaho har roz jo samjhaane chale aate ho naaseh main puchhtaa huun tum mujhe samjhe hue kyaa ho is daar-e-baqaa mein miri surat koi dekhe ik dam kaa bharosaa hai jo ik dam mein fanaa ho mujh ko na sunaa khizr o sikandar ke fasaane mere liye yaksaan hai fanaa ho ki baqaa ho"

"ye aur daur hai ab aur kuchh na farmaae magar 'hafiz' ko ye baat kaun samjhaae vafaa kaa josh to kartaa chalaa gayaa madhosh qadam qadam pe mujhe dost hosh mein laae pari-rukhon ki zabaan se kalaam sun ke miraa bahut se log miri shakl dekhne aae bahisht mein bhi milaa hai mujhe azaab-e-shadid yahaan bhi maulvi-saahab hain mere ham-saae azaab-e-qabr se bad-tar sahi hayaat-e-'hafiz' ye jabr hai to ba-juz-sabr kyaa kiyaa jaae"

"mil jaae mai to sajda-e-shukraana chaahiye piite hi ek laghzish-e-mastaana chaahiye haan ehtiraam-e-kaaba-o-but-khaana chaahiye mazhab ki pochhiye to judaagaana chaahiye rindaan-e-mai-parast siya-mast hi sahi ai shaikh guftugu to sharifaana chaahiye divaangi hai aql nahin hai ki khaam ho divaana har lihaaz se divaana chaahiye is zindagi ko chaahiye saamaan-e-zindagi kuchh bhi na ho to shisha-o-paimaana chaahiye o nang-e-eatibaar duaa par na rakh madaar o bevaquf himmat-e-mardaana chaahiye rahne de jaam-e-jam mujhe anjaam-e-jam sunaa khul jaae jis se aankh vo afsaana chaahiye"

"kal zarur aaoge lekin aaj kyaa karun baDh rahaa hai qalb kaa ikhtilaaj kyaa karun kyaa karun koi nahin ehtiyaaj dost ko aur mujh ko dost ki ehtiyaaj kyaa karun ab vo fikrmand hain kah diyaa tabib ne ishq hai junun nahin main ilaaj kyaa karun ghairat-e-raqib kaa shikva kar rahe ho tum is muaamle mein sakht hai mizaaj kyaa karun maa-sivaa-e-aashiqi aur kuchh kiyaa bhi ho sujhtaa hi kuchh nahin kaam-kaaj kyaa karun mahv-e-kaar-e-dein huun main boriyaa-nashin huun main raahzan nahin huun main takht-o-taaj kyaa karun zor aur zar baghair ishq kyaa karun 'hafiz' chal gayaa hai mulk mein ye rivaaj kyaa karun"

"agar mauj hai biich dhaare chalaa chal vagarna kinaare kinaare chalaa chal isi chaal se mere pyaare chalaa chal guzarti hai jaise guzaare chalaa chal tujhe saath denaa hai bahrupiyon kaa nae se nayaa ruup dhaare chalaa chal khudaa ko na taklif de Dubne mein kisi naakhudaa ke sahaare chalaa chal pahunch jaaeinge qabr mein paanv tere pasaare chalaa chal pasaare chalaa chal ye uupar kaa tabqa khalaa hi khalaa hai havaa o havas ke ghubaare chalaa chal Duboyaa hai tu ne hayaa kaa safina mire dost siina ubhaare chalaa chal musalsal buton ki tamannaa kiye jaa musalsal khudaa ko pukaare chalaa chal yahaan to bahar-haal jhuknaa paDegaa nahin to kisi aur dvaare chalaa chal tujhe to abhi der tak khelnaa hai isi mein to hai jiit haare chalaa chal na de fursat-e-dam-zadan o zamaane nae se nayaa tiir maare chalaa chal shab-e-taar hai ta-ba-subh-e-qayaamat muqaddar hai gardish sitaare chalaa chal kahaan se chalaa thaa kahaan tak chalegaa chalaa chal masaafat ke maare chalaa chal basirat nahin hai to sirat bhi kyuun ho faqat shakl o surat sanvaare chalaa chal 'hafiz' is nae daur mein tujh ko fan kaa nasha hai to pyaare utaare chalaa chal"

"javaani ke taraane gaa rahaa huun dabi chingaariyaan sulgaa rahaa huun miri bazm-e-vafaa se jaane vaalo Thahar jaao ki main bhi aa rahaa huun buton ko qaul detaa huun vafaa kaa qasam apne khudaa ki khaa rahaa huun vafaa kaa laazmi thaa ye natija sazaa apne kiye ki paa rahaa huun khudaa-lagti kaho but-khaane vaalo tumhaare saath mein kaisaa rahaa huun zahe vo gosha-e-raahat ki jis mein hujum-e-ranj le kar jaa rahaa huun charaagh-e-khaana-e-darvesh huun main idhar jaltaa udhar bujhtaa rahaa huun nae kaa'be ki buniyaadon se puchho puraane but-kade kyuun Dhaa rahaa huun nahin kaanTe bhi kyaa ujDe chaman mein koi roke mujhe main jaa rahaa huun hui jaati hai kyuun betaab manzil musalsal chal rahaa huun aa rahaa huun 'hafiz' apne paraae ban rahe hain ki main dil ko zabaan pe laa rahaa huun"

"naakaami-e-ishq yaa kaamyaabi donon kaa haasil khaana-kharaabi aankhein siyah-mast chehra kitaabi baada shabaana jaam aaftaabi duniyaa-o-din se begaana ho jaa divaana ho jaa ban jaa sharaabi un kaa bahaana barjasta-goi meraa tabassum haazir-javaabi din-daar kar ke kaafir banaa de ye parda-daari ye be-hijaabi hain takht-e-dil par sarkaar varna takhta ulaT dein ham inqilaabi"

"kabhi zamin pe kabhi aasmaan pe chhaae jaa ujaaDne ke liye bastiyaan basaae jaa khizar kaa saath diye jaa qadam baDhaae jaa fareb khaae hue kaa fareb khaae jaa tiri nazar mein sitaare hain ai mire pyaare uDaae jaa tah-e-aflaak khaak uDaae jaa nahin itaab-e-zamaana khitaab ke qaabil tiraa javaab yahi hai ki muskuraae jaa anaaDiyon se tujhe khelnaa paDaa ai dost sujhaa sujhaa ke nai chaal maat khaae jaa sharaab khum se diye jaa nasha tabassum se kabhi nazar se kabhi jaam se pilaae jaa"

"mujhe shaad rakhnaa ki naashaad rakhnaa mire diida o dil ko aabaad rakhnaa bhulaai nahin jaa sakeingi ye baatein tumhein yaad aaeinge ham yaad rakhnaa vo naashaad o barbaad rakhte hain mujh ko ilaahi unhein shaad o aabaad rakhnaa tumhein bhi qasam hai ki jo sar jhukaa de usi ko tah-e-tegh-e-bedaad rakhnaa mileinge tumhein raah mein but-kade bhi zaraa apne allaah ko yaad rakhnaa jahaan bhi nashe mein qadam laDkhaDaaein vahin ek masjid ki buniyaad rakhnaa sitaaron pe chalte hue ibn-e-aadam nazar mein farishton ki uftaad rakhnaa 'hafiz' apne afkaar ki saadgi ko takalluf ki uljhan se aazaad rakhnaa"

"kyuun hijr ke shikve kartaa hai kyuun dard ke rone rotaa hai ab ishq kiyaa to sabr bhi kar is mein to yahi kuchh hotaa hai aaghaaz-e-musibat hotaa hai apne hi dil ki shaamat se aankhon mein phuul khilaataa hai talvon mein kaanTe botaa hai ahbaab kaa shikva kyaa kijiye khud zaahir o baatin ek nahin lab uupar uupar hanste hain dil andar andar rotaa hai mallaahon ko ilzaam na do tum saahil vaale kyaa jaano ye tufaan kaun uThaataa hai ye kashti kaun Dubotaa hai kyaa jaaniye ye kyaa khoegaa kyaa jaaniye ye kyaa paaegaa mandir kaa pujaari jaagtaa hai masjid kaa namaazi sotaa hai khairaat ki jannat Thukraa de hai shaan yahi khuddaari ki jannat se nikaalaa thaa jis ko tu us aadam kaa potaa hai"