Ghazal

"sarguzisht-e-gham ko mohtaaj-e-bayaan paataa huun main kyon zabaan-e-shauq ko ab be-zabaan paataa huun main hai vahi kaifiyyat-e-be-taabi-e-mauj-e-nazar husn ke jalvon ko bahr-e-bekaraan paataa huun main daastaan-e-ishq meri zinat-e-kaun-o-makaan jis ke kuchh TukDe yahaan aur kuchh vahaan paataa huun main ishq ban kar kholtaa huun husn ke sar-basta raaz fitrat-e-aalam kaa khud ko tarjumaan paataa huun main apni hasti kaa mujhe ehsaas jab se ho chalaa sar ko apne dosh par baar-e-garaan paataa huun main har shikast-e-aarzu hai taaza-tar tamhid-e-shauq aur kuchh ab apni himmat ko javaan paataa huun main khizr-e-rah bantaa chalaa har sang-e-zer-e-paa miraa Thokarein khaa khaa ke manzil kaa nishaan paataa huun main maavaraa-e-qaid-e-rang-o-bu hai imkaan-e-nigaah daaman-e-sahraa mein husn-e-gulsitaan paataa huun main kis qadar unchi hai 'najmi' meri parvaaz-e-khayaal har zamin-e-sher ko ab aasmaan paataa huun main"

"dekh kar ham ko asir-e-aarzu aur bhi vo ho gae begaana-khu phaaD Daalaa dast-e-vahshat ne jise phir karein kyaa is garebaan kaa rafu phir sajaao mahfil-e-daar-o-rasan muztarib hai phir zabaan-e-guftugu gar ziyaada se ziyaada hon gunah kam nahin hai aayat-e-laa-taqnatu mujh ko Dar lagtaa hai apne shahr mein hain bahut unche yahaan ke kaakh-o-ku jab bhi rut aati hai patjhaD ki yahaan chuus leti hai bahaaron kaa lahu rah ke 'najmi' ne pas-e-parda yahaan kar diyaa hai sab ko mahv-e-justuju"

"bulbul-e-rangin-navaa khaamosh hai baagh ki saari fazaa khaamosh hai gul khilaae us ne kyaa kyaa baagh mein phir bhi kis darja sabaa khaamosh hai aarzu jin ki thi mujh ko mil gae ab zabaan-e-iltijaa khaamosh hai be-kasi ye kis ne li teri panaah gor kaa kis ki diyaa khaamosh hai shorish-e-dil shorish-e-mahshar nahin zindagi apni bhi kyaa khaamosh hai sochti hai jaa ke ye barse kahaan mere ashkon ki ghaTaa khaamosh hai kis ko jiine ki tamannaa hai yahaan kyuun lab-e-mojiz-numaa khaamosh hai husn-e-dilkash kaa bhi kyaa andaaz hai naaz goyaa hai adaa khaamosh hai hai yahaan 'najmi' usi kaa shor-o-ghul go ba-zaahir vo sadaa khaamosh hai"

"taraana-e-gham-e-pinhaan hai har khushi apni ki ek dard-e-musalsal hai zindagi apni bahal na jaae kahin ye dil-e-khizaan-maanus bahaar aa ke dikhaati hai dilkashi apni kisi ke chehra-e-zebaa se us ko kyaa nisbat yunhi bikheraa kare chaand chaandni apni shuur-e-chaak-e-garebaan kidhar hai daaman-e-yaar junun ki had se mili jaa ke aashiqi apni bataa ki ye bhi koi shaan-e-be-niyaazi hai suni na haae koi tu ne guftani apni"

"soz hai dil ke daagh mein ab tak raushni hai charaagh mein ab tak zulf-e-mushkin thi mehrbaan kis ki bu basi hai dimaagh mein ab tak tishna-kaamon ko is se kyaa haasil mai dhari hai ayaagh mein ab tak haae aavaargi-e-baad-e-sabaa hai ye kis ke suraagh mein ab tak go khizaan kaa bhi daur-daura hai phuul khilte hain baagh mein ab tak roz-o-shab maare maare phirte hain ham talaash-e-faraagh mein ab tak ye bhi bujh jaaegi kabhi 'najmi' raushni hai charaagh mein ab tak"

"mujhe ye Dar hai har har uzv meraa dil na ban jaae mohabbat kaa ye uqda uqda-e-mushkil na ban jaae ye soz-e-shama-e-raushan aur ye saaz-e-khun-e-parvaana kisi kaa jalva phir rangini-e-mahfil na bin jaae talaash-e-kaaba-e-maqsud mein ye garm-raftaari miraa har har qadam sang-e-rah-e-manzil na ban jaae ajab kyaa hai ki roz-e-hashr ye tar-daamani 'najmi' hamaari mazra'-e-ummid kaa haasil na ban jaae"

"subh-dam aayaa to kyaa hangaam-e-shaam aayaa to kyaa tu miri naakaamiyon ke baad kaam aayaa to kyaa iltifaat-e-avvalin ki baat hi kuchh aur hai mujh tak un ki bazm mein ab daur-e-jaam aayaa to kyaa taaqat-e-nazzaara jab minnat-pazir-e-hosh ho bahr-jalva phir koi baalaa-e-baam aayaa to kyaa shorish-e-hangaama-e-mansur ki tajdid hai qatl ko mere vo baain ehtimaam aayaa to kyaa ab kahaan vo fasl-e-gul aur ab kahaan josh-e-bahaar bahr-e-gul-gasht-e-chaman vo khush-khiraam aayaa to kyaa ai hujum-e-naa-muraadi ai vufur-e-yaas-o-gham ishq mein kuchh lutf-e-sai-e-naa-tamaam aayaa to kyaa jab garebaan mein hamaare taar tak baaqi nahin phir agar subh-e-bahaaraan kaa payaam aayaa to kyaa aarzu-e-dil abhi tak tishna-e-tafsir hai tujh ko 'najmi' shiva-e-husn-e-kalaam aayaa to kyaa"

"main vaaqif-kaar-e-asraar-e-baqaa huun isi khaatir to un par mar-miTaa huun ye meri intihaa-e-aarzu dekh ki main tujh se tujhi ko maangtaa huun suni jaati nahin jo huun vo fariyaad jo rad kar di gai vo iltijaa huun koi naahaq jafaaein kyon sahegaa magar main huun ki majbur-e-vafaa huun ravaa hai yaa ye sajda naaravaa hai kisi ke aastaan par gir paDaa huun vo apne husn ki ik daastaan hain main apne 'ishq kaa ik maajraa huun kahin hote bhi hain siine mein do dil main jis ko chaahtaa huun chaahtaa huun"

"jab koi letaa hai mere saamne naam-e-ghazal yaad aataa hai mujhe ik naazuk-andaam-e-ghazal us harim-e-naaz us khalvat-saraa-e-raaz mein baarhaa jazbaat ne baandhaa hai ehraam-e-ghazal ek rashk-e-maah kaa main kar rahaa huun tazkira aasmaan se kyuun na ho unchaa miraa baam-e-ghazal mai-kada bhi guunj uTThaa shor-e-noshaa-nosh se kis qadar hai kaif-aavar ye miraa jaam-e-ghazal nau-ba-nau taaza-ba-taaza jalva-e-shaadaab-e-husn kar sake kis tarah aakhir koi itmaam-e-ghazal aks-e-zan ho jis ke dil mein partav-e-rangin-e-yaar kaun kah saktaa hai 'najmi' us ko naakaam-e-ghazal dekhte hain gosha-e-chashm-e-hayaa se vo mujhe mil rahaa hai aaj 'najmi' mujh ko inaam-e-ghazal"

"nahin kuchh intihaa afsurdagi ki yahi hai rasm shaayad aashiqi ki lab-e-laalin pe ye lahrein hansi ki yahi Duube na kashti zindagi ki Dhale aansu ki ye TuuTe sitaare sukut shab mein yaad aai kisi ki chaman mein buuTaa buuTaa dekhtaa hai adaaein in ki mastaana ravi ki baDhaae jaa qadam zauq talab mein shikaayat kar na ijz-o-khastagi ki isi kaa naam shaayad zindagi hai khushi ki ik ghaDi to ik ghami ki sukun-e-saahil-e-dariyaa kaa armaan karo baatein na ye kam-himmati ki milaa kar aankh phir aankhein churaanaa adaa-e-khaas hai ye dilbari ki ataa ho to ataa ho dard aisaa ho lazzat jis mein soz-e-daaimi ki abhi hai nur-o-zulmat ki kashaakash abhi hai duur manzil aagahi ki hayaat-e-chand-roza apni 'najmi' hai tasvir-e-mujassam bebasi ki"

"un ke vaadon kaa haal kyaa kahiye hafta-o-maah-o-saal kyaa kahiye aarzu-e-visaal kyaa kahiye zehn kaa intiqaal kyaa kahiye husn ko main khudaa samajhtaa huun haae meraa khayaal kyaa kahiye vahi subh-o-masaa vahi shab-o-roz zindagi hai vabaal kyaa kahiye un se koi javaab ban na paDaa meraa tarz-e-savaal kyaa kahiye siskiyaan ik mariz-e-gham ki haae aap ki dekh-bhaal kyaa kahiye aap ke lutf mein sitam pinhaan ho gae ham nihaal kyaa kahiye aage bas aur kyaa hai naam-e-khudaa aap hain be-misaal kyaa kahiye aarzuon kaa hasraton kaa lahu zindagi kaa maaal kyaa kahiye"

"jaaein kahaan ham aap kaa armaan liye hue dard-e-firaaq-o-kaavish-e-hijraan liye hue in aansuon ki tum ko haqiqat bataaein kyaa aankhein hain meri shaukat-e-tufaan liye hue ranj-e-firaaq bhi hai nashaat-e-visaal bhi huun saath saath dard ke darmaan liye hue aasaan nahin visaal to dushvaar bhi nahin mushkil mein huun ye mushkil-e-aasaan liye hue rahmat ne luuT luuT liyaa mujh ko hashr mein pahunchaa jo main bizaaat-e-isyaan liye hue yaa-rab ho khair aamad-e-fasl bahaar ki dast-e-junun hai chaak-e-garebaan liye hue 'najmi' hamaari chashm-e-basirat ke vaaste hai gul ki pankhuDi bhi gulistaan liye hue"

"jo puchhte hain ki ye ishq-o-aashiqi kyaa hai vo jaante nahin maqsud-e-zindagi kyaa hai zamir-e-paak khayaal-e-buland zauq-e-latif bas aur is ke sivaa jauhar-e-khudi kyaa hai vafaa ki aaD mein kyaa kyaa hui jafaa ham par jo dosti yahi Thahri to dushmani kyaa hai bajaa hai fart-e-junun ne hamein kiyaa rusvaa jamaal-e-yaar mein aakhir ye dilkashi kyaa hai vufur-e-shauq ki maayusiyaan are tauba dil-e-tabaah mein ab aarzu rahi kyaa hai agar na jurm-e-mohabbat ki ye sazaa hoti to baat baat pe ham se ye be-rukhi kyaa hai na samjho tum miri arz-e-niyaaz ko shikva main jaantaa huun taqaazaa-e-bandagi kyaa hai ataa kiyaa thaa jo zauq-e-numud us dil ko to har qadam pe ye rang-e-shikastagi kyaa hai gurez kyaa main karun naaseho ki sohbat se jahaan na kuchh ho ye sohbat vahaan buri kyaa hai vafaa se aur na tark-e-vafaa se aap hain khush mujhe bataaiye phir aap ki khushi kyaa hai fareb-e-hasti-e-mauhum khaa rahaa huun hanuz mujhe khabar hai haqiqat yahaan miri kyaa hai jo gaamzan hain sar-e-jaada-e-talab 'najmi' vo jaante nahin duniyaa mein bebasi kyaa hai"

"jab dil hi nahin hai pahlu mein phir ishq kaa saudaa kaun kare ab un se mohabbat kaun kare ab un ki tamannaa kaun kare ab hijr ke sadme sahne ko patthar kaa kaleja kaun kare in lambi lambi raaton kaa mar mar ke saveraa kaun kare ham rasm-e-vafaa ko maante hain aadaab-e-mohabbat jaante hain ham baat ki tah pahchaante hain phir aap ko rusvaa kaun kare ai jazba-e-ulfat tu hi bataa kuchh had bhi hai is naakaami ki maayus nigaahon se un kaa mahfil mein nazaaraa kaun kare ham dekh chuke haan dekh chuke dastur tumhaari mahfil kaa jab shukr pe ye paabandi hai phir jurat-e-shikva kaun kare"

"apni hasti ko yahaan be-muddaaa samjhaa thaa main kyaa samajhnaa chaahiye thaa aur kyaa samjhaa thaa main tum ko apne dard-e-dil ki gar davaa samjhaa thaa main kyaa ghalat samjhaa thaa main bilkul bajaa samjhaa thaa main kis ghalat-fahmi mein apni umr saari kaT gai ik vafaa-naa-aashnaa ko baa-vafaa samjhaa thaa main kuchh na puchho raah-e-ulfat mein miri vaamaandgi kaakul-e-pechida ko zanjir-e-paa samjhaa thaa main us kaa har har ghunT thaa zahr-e-halaahal se sivaa zindagi ko chashma-e-aab-e-baqaa samjhaa thaa main sach hai 'najmi' ishq aziin bisyaar kardast-o-kunad sar kaa denaa ek aain-e-vafaa samjhaa thaa main"

"aashufta-navaai se apni duniyaa ko jagaataa jaataa huun divaana huun divaanon ko main hosh mein laataa jaataa huun ummid ki shamein rah rah kar main dil mein jalaataa jaataa huun jab jal chukti hain ye shamein phir sab ko bujhaataa jaataa huun tum dekh rahe ho maikhaane mein jurat-e-rindaana meri main khud bhi piitaa jaataa huun tum ko bhi pilaataa jaataa huun takmil-e-mohabbat kartaa huun kuchh garmi se kuchh narmi se aahein bhi bhartaa jaataa huun aansu bhi bahaataa jaataa huun be-kaar sahi naale mere be-sud sahi aahein meri main un ki nigaahon mein lekin phir bhi to samaataa jaataa huun haan saaz-e-shikasta mein mere naghmon kaa talaatum pinhaan hai shorida-navaai se apni mahfil par chhaataa jaataa huun main sai-e-musalsal kar ke bhi manzil se koson duur rahaa manzil na mili to kyaa hai magar apne ko paataa jaataa huun ummid-e-vafaa ke pesh-e-nazar main un ki jafaaein bhuul gayaa hai mustaqbil par aankh miri maazi ko bhulaataa jaataa huun qudrat bhi muhayyaa karti hai ab mere liye ibrat ke sabaq har gaam pe Thokar khaataa huun aur hosh mein aataa jaataa huun 'najmi' ye khamoshi bhi meri kuchh vajh-e-sukun-e-dil na hui main zabt-e-fughaan se dard ko apne aur baDhaataa jaataa huun"

"tum jalva dikhaao to zaraa parda-e-dar se ham thak gae nazzaara-e-khurshid-o-qamar se majbur-e-numaaish nahin kuchh husn hi un kaa ham bhi to hain majbur taqaazaa-e-nazar se bachhDaa huaa jaise koi milte hi lipaT jaae yuun tiir tiraa aa ke lipaTtaa hai jigar se kaTte nahin kyuun shaam-e-judaai ke ye lamhe milti nahin kyuun zulmat-e-shab jaa ke sahar se karnaa hai kisi din use ham-dosh-e-surayyaa hai aah abhi tak miri mahrum asar se ho jaaein hamesha ke liye aap jo mere main maang luun kuchh umr yahaan umr-e-khizar se aisaa to na kar paaegaa koi bhi fusun-kaar vo kar gae jo saadgi-e-husn-e-nazar se aasuda-e-manzil nahin aagaah-e-saubat mahrum hai vo lazzat-e-duri-e-safar se"

"nazar hi jabki tiri ham pe lutf ki na rahi to zindagi kaa hai kyaa zindagi rahi na rahi kali kali hi rahi aur na phuul phuul rahaa ki ab bahaar mein vo ruh-e-taazgi na rahi hamaare ishq ko le kar ulajh gayaa naaseh jab us ke paas koi hujjat-e-qavi na rahi jabin-e-shauq hai aadaab-e-ishq se aagaah isi liye ye dar-e-ghair par kabhi na rahi shahid-e-rasm-e-vafaa ko to tum ne dekh liyaa ab aur baat koi bahr-e-aashiqi na rahi vo rashk-e-shama jo mahfil se uTh gayaa 'najmi' phir is ke baad charaaghon mein raushni na rahi"

"mujhe dair bhi ho kyuun kar na haram ki tarah pyaaraa tu yahaan bhi jalva-aaraa tu vahaan bhi jalva-aaraa hai ajiib ye tamaashaa hai ajiib ye nazaaraa miri aahon kaa sharaara mire aansuon kaa dhaaraa vo payaam-e-shaam-e-gham ho ki naved-e-subh-e-ishrat mujhe ye bhi hai gavaaraa mujhe vo bhi hai gavaaraa yunhi mujh ko Dubne do inhin mauj-haa-e-gham mein ki muhit-e-gham kaa shaayad abhi duur hai kinaaraa na farogh-e-ru-e-taabaan na nigaah-e-nur-afshaan mire iztiraab-e-dil se miraa raaz aashkaaraa koi kyaa samajh sakegaa ye hai faiz-e-ishq jis ne mujhe is tarah bigaaDaa mujhe is tarah sanvaaraa koi chiiz bhi hai qismat koi shai bhi hai muqaddar ki main apni koshishon mein yahaan baar-baar haaraa ye hujum-e-naa-umidi ye vufur-e-naa-muraadi huun ajab musibaton mein main musibaton kaa maaraa mujhe ilm is kaa kyaa thaa mujhe kyaa khabar thi 'najmi' ki mujhi ko phunk degaa mire ishq kaa sharaaraa"