Ghazal

"gham ke sunsaan bayaabaan se nikaltaa hi nahin dil miraa dard ke tufaan se sanbhaltaa hi nahin 'ishq ki aatish-e-khaamosh hai kab se raushan magar ehsaas kaa sho'la hai ki jaltaa hi nahin har taraf dhund hai ashkon ki faraavaani se dil-e-betaab saraabon se bahaltaa hi nahin talkhiyaan ahl-e-zamaana se vo jheli hain na puchh dil miraa fasl-e-bahaaraan mein machaltaa hi nahin kab se haalaat-e-zamaana hain digar-gun lekin dil kaa mausam kisi haalat mein badaltaa hi nahin kyaa kahun darpai-e-aazaar hai duniyaa 'shaahin' aadmi qaid-e-zamaana se nikaltaa hi nahin"

"ye jo ishq-e-masnad ke log hain unhein ramz saare sikhaa piyaa ye junun-e-ishq ki daastaan unhein harf harf sunaa piyaa mire chaaraagar main huun dar-ba-dar main to thak gai hai ajab safar miri be-nishaan si hain manzilein mujhe raasta bhi dikhaa piyaa na hudud mein na quyud mein miraa dil tire hi vajud mein ye sujud kaa hasin pairahan miri ruuh par to sajaa piyaa main to aas thi main to pyaas thi kisi phuul ki main bhi baas thi miri pattiyaan girein jaa-ba-jaa unhein shaakh par to sajaa piyaa main faqir huun main haqir huun kisi khvaab ki na asiir huun main aziiz huun to tujhe hi bas so aziz-tar hi banaa piyaa main falak se aai khataa miri use DhunDnaa hai vafaa miri ye jafaa ki jo hain haqiqatein miri aankh ko vo dikhaa piyaa mire aasmaan mire saaebaan tu hi raaz-daan tu hi mehrbaan jahaan laa-makaan ke hain silsile vahin meraa ghar bhi banaa piyaa ye jo aarzuon kaa des hai ye jo khaak khaak saa bhes hai jo azal abad kaa ye bhed hai use bhed hi mein bataa piyaa ye qadam qadam pe bashaaratein ye nazar nazar mein ziyaaratein ye basaartein ye bujhaartein mire shahr-e-dil ko dikhaa piyaa ye jo mere man mein hai raushni yahi zindagi yahi bandagi miri fikr mein tire zikr mein jo charaagh hain vo jalaa piyaa"

"daaimi hai ishq aur ik daaimi aavaaz hai mere kaanon mein abhi tak bas vahi aavaaz hai saath mere raat bhar jo jaagti aavaaz hai kaun jaane ye to meri ruuh ki aavaaz hai hijr ke lamhon mein ab tak ye khabar kab ho saki jaagti huun main yaa koi jaagti aavaaz hai hijr jaise vasl mein us ko sunaa to yuun lagaa maut jaisi zindagi mein zindagi aavaaz hai ajnabi si manzilon ki ajnabi si raah mein ik mukammal khvaab aur ik khvaab si aavaaz hai aane vaale daur mein 'shaahin' rahnaa hai mujhe sab kaheinge ye vahi ik dukh bhari aavaaz hai"

"ye ishq ajab lamha-e-tauqir hai jaanaan khud meraa khudaa us ki hi tafsir hai jaanaan jo naam hatheli ki lakiron mein nahin thaa kyuun aaj talak dil pe vo tahrir hai jaanaan us khvaab ki taabir to mumkin hi nahin thi aankhon mein magar us ki hi taasir hai jaanaan maanaa ki tire haathon mein hain phuul abhi tak lekin tire pairon mein jo zanjir hai jaanaan kyaa jaaniye kis roz bikhar jaae kahin bhi is aas ki dil mein jo ik tanvir hai jaanaan ye rog kahin mujh ko hi mismaar na kar de aa lauT kar aa tu hi to iksir hai jaanaan tu hijr mein Duubi hui nayyaa kaa kinaara jivan ki tire paas hi tadbir hai jaanaan ye zakhm judaai ke kabhi silne nahin hain tu jaan le apni yahi taqdir hai jaanaan us aag ke shoalon mein vo phulon kaa tabassum ik sajda-e-be-misl ki tasvir hai jaanaan ab din ki talab hi nahin 'shaahin' mujhe to ik shaam hi ab to miri jaagir hai jaanaan"

"chaandni chup rahi raushni chup rahi meri har baat par zindagi chup rahi ham to ghuT ghuT ke ik roz mar jaaeinge is ghuTan mein agar aankh bhi chup rahi dard meraa bayaan un se kab ho sakaa sher khaamosh the shaairi chup rahi ik yaqin thaa palaT aaegaa vo abhi main to bas us ki rah dekhti chup rahi mujh ko maqtal mein jis roz bhejaa gayaa sochti huun main kyuun us ghaDi chup rahi main ne 'shaahin' jivan guzaaraa hai yuun niind mein baat ki jaagti chup rahi"

"zamin mile kahin hamein kahin to aasmaan mile dukhon ki dhuup mein shajar koi to mehrbaan mile tire firaaq mein jiye tire firaaq mein mare chalo ye khvaab hi sahi visaal kaa gumaan mile alam ki shaam aa gai lo mere naam aa gai charaagh le ke raah mein ai kaash mehrbaan mile abhi talak fughaan huun main misaal-e-daastaan huun main mile to ek pal kabhi kahin to kaarvaan mile ajiib se vo rang the sabhi ke haath sang the hamein to ghair bhi sabhi misaal-e-dostaan mile jabin jabin nahin rahi to mah-jabin nahin rahi na log vo kahin mile na tujh ko aastaan mile"

"dard musaafir Thahar gayaa thaa akhiyon ki hairaani mein sirf mohabbat bahti thi aur saath ye ashk ravaani mein kaise huaa aur kab ye huaa kuchh khabar nahin thi dil ko to ek mohabbat jaa soi thi vahshat mein viraani mein dard ki shiddat aur baDhi thi shahr-e-vafaa ki shaamon mein aur viraani baiTh gai thi in akhiyon ke paani mein is hasti ke andhiyaaron ne bakht ko aise gheraa thaa apni sadaa tak ujaD gai thi dil ki nauha-khvaani mein ek sukhnavar ke lafzon ne mujh ko yuun barbaad kiyaa lutf samaaat ko miltaa hai ab to zahr-afshaani mein us ne anjaani si baatein kiin to phir ye ilm huaa ham to daanaa samajh rahe the khud ko baDi naadaani mein"

"ishq ko aankh mein jalte dekhaa phuul ko aag mein khilte dekhaa ishq ke raaz na puchho saahab ishq ko daar pe chaDhte dekhaa ishq ke daam bhi lag jaate hain misr mein us ko bikte dekhaa ishq hai vaajib us ko ham ne jism aur jaan mein utarte dekhaa us ko havas kaa naam na denaa lauh pe us ko likhte dekhaa arsh bhi hairat se taktaa thaa dasht mein us ko palte dekhaa ishq anokhaa manzar jis mein raaz ko khvaab mein Dhalte dekhaa hijr kaa zakhm to zakhm hai aisaa bakhiya-garon se bhi khulte dekhaa ishq vo baagh hai jis ko ham ne hijr ki rut mein mahakte dekhaa gham kyaa hijr aur visaal kaa us ko ishq mein jis ko bhaTakte dekhaa"

"har ghaDi dard ki shiddat se bilakti aankhein aatish-e-hijr se har lamha pighalti aankhein ek lamhe ki mulaaqaat hui 'umr kaa rog us ki surat ko hain har vaqt tarasti aankhein dil-e-betaab mein ab tak vo machalti khvaahish teri khushbu se musalsal ye mahakti aankhein khvaab mein Thahraa huaa jhiil kaa niilaa manzar aur usi jhiil kinaare hain bhaTakti aankhein ab to vahshat si Tapakti hai har ik manzar se soz-e-hijraan ki tapish se hain sulagti aankhein 'ishq nilaam huaa 'aam yaa naakaam huaa rah gaiin ahl-e-vafaa ki to barasti aankhein saamne paa ke use dusri jaanib taknaa ye haqiqat mein hain 'shaahin' sanbhalti aankhein"

"dil ko zaraa qaraar thaa vo bhi nahin rahaa aankhon ko intizaar thaa vo bhi nahin rahaa vo saath thaa to saath mein meri bhi zaat thi meraa kahin shumaar thaa, vo bhi nahin rahaa us se judaa hue hain to khud ko bhi kho diyaa khud par jo e'tibaar thaa vo bhi nahin rahaa daaman mein koi chaand, sitaara na aaftaab jugnu par inhisaar thaa vo bhi nahin rahaa jheli thiin jis ke sang hi ye ranjishein kabhi ik dil hi gham-gusaar thaa vo bhi nahin rahaa uljhaa thaa mere dil mein jo muddat se ik savaal lab par jo baar baar thaa vo bhi nahin rahaa jis par charaagh roz jalaati thi raat ko dil mein jo ik mazaar thaa vo bhi nahin rahaa muddat se us ki raah mein dil thaa bichhaa huaa sochon mein vasl-e-yaar thaa vo bhi nahin rahaa taqdir ki asiir huun jis ke liye ye dil muddat se ashk-baar thaa vo bhi nahin rahaa maa'bud mere meraa muqaddar tu dekh le khud par jo ikhtiyaar thaa vo bhi nahin rahaa"

"ibtidaa dard hai intihaa dard hai ishq kaa dard to laa-davaa dard hai main ne puchhaa vafaa kaa sila jo kabhi us ne hans kar ye mujh se kahaa dard hai pyaar se ishq tak jaa-ba-jaa raushni pyaar se ishq tak jaa-ba-jaa dard hai ye nayaa phuul hai aur ye khushbu nai ye nai shaam hai aur nayaa dard hai zakhm kaisaa hai bhartaa nahin hai kabhi dard hotaa nahin hai ye kyaa dard hai main to Darne lagi us ki taabir se pyaar aankhon mein jab se banaa dard hai ek pal mein kahaan kho gai hai khushi ab to ulfat ki bas ik sazaa dard hai chhoD 'shaahin' vafaa kaa tu ab tazkira bevafaa hai khushi baa-vafaa dard hai"

"zahmat kabhi kabhi to mashaqqat kabhi kabhi lagti hai zindagi bhi musibat kabhi kabhi pahlu mein jaagti hai mohabbat kabhi kabhi aati hai haath dard ki daulat kabhi kabhi ab tak tire baghair main zinda huun kis tarah hoti hai apne aap pe hairat kabhi kabhi ik pal kaa jo visaal thaa un maah-o-saal mein detaa hai hijr mein bhi rifaaqat kabhi kabhi chheDe vafaa kaa giit koi naghma-saaz jab khud se bhi hone lagti hai vahshat kabhi kabhi ik raat hijr ki hai musalsal hamaare saath tum par guzarti hogi qayaamat kabhi kabhi sulgi hai teri yaad mein ye ruuh raat din dene lagi hai lau ye rifaaqat kabhi kabhi duniyaa ke vaaste jo bahut be-shu'ur thaa us se mili hai 'ishq ko vaq'at kabhi kabhi mujh ko tiri jafaa kaa to shikva nahin magar aati hai yuun hi lab pe shikaayat kabhi kabhi main dard se najaat ki taalib nahin magar 'shaahin' kam ho thoDi si shiddat kabhi kabhi"

"phir misr ke baazaar mein nilaam huaa kyuun ai ishq bataa teraa ye anjaam huaa kyuun ham baais-e-raahat jise samjhe the vo lamha ab apne liye baais-e-aalaam huaa kyuun ai ishq falak par tujhe likhaa jo khudaa ne phir teraa muqaddar bhalaa ibhaam huaa kyuun ai ishq tiraa naam hai jab sach ki alaamat ai ishq tu rusvaa yuun sar-e-aam huaa kyuun jab ek hi sajde mein tiraa bhed chhupaa hai phir sang-e-malaamat hi tiraa daam huaa kyuun ai aankh tu be-khvaab hai khvaabon ki talab mein ye hijr hi aakhir tiraa inaam huaa kyuun chehre pe tire kis liye hairat hai abhi tak ye itni vazaahat pe bhi ibhaam huaa kyuun is dil ko hai mahbub vahi dard kaa naghma is dil mein taajjub hai ye kohraam huaa kyuun jo teri mohabbat ko samajh hi nahin paayaa 'shaahin' ye dil us ke bhalaa naam huaa kyuun"

"mujhe jab bhi vo galiyaan aur vo rasta yaad aataa hai koi dhundlaa saa manzar hai jo ujlaa yaad aataa hai fazaa-e-dil pe taari hai bahut hi habs kaa mausam tiri qurbat ki khushbu kaa vo jhonkaa yaad aataa hai kahaa tum to judaai kaa vo manzar bhuul baiThe ho khalaa mein dekh kar mujh se vo bolaa yaad aataa hai khizaan-rut hai magar mujh ko khayaalon ke tasalsul mein mohabbat ke gulaabon kaa vo sapnaa yaad aataa hai kisi ke dukh bhare lamhe mein jab koi bilaktaa hai haqiqat mein use har zakhm apnaa yaad aataa hai musalsal ret par chalnaa vafaa ki riit Thahri hai tiri dahliz tak phailaa vo sahraa yaad aataa hai vo lamha jo guzarte mausamon mein saath Thahraa hai mujhe khud bhi nahin maa'lum kitnaa yaad aataa hai kabhi jab hijr ki aahaT se dil aangan mein aati hai bahut apnaaiyat se bas vo apnaa yaad aataa hai tiraa hi 'aks utraa hai miri nazmon mein ghazlon mein vo lahja teri chaahat kaa vo chehra yaad aataa hai hamaaraa naam likkhaa thaa kabhi jo ret par us ne kabhi jab yaad aae to vo dariyaa yaad aataa hai mire aangan mein jab bhi shaam ke saae utarte hain mujhe 'shaahin' mohabbat kaa hi saaya yaad aataa hai"

"bichhaD ke us se abhi huun zinda magar bahut pur-malaal ab tak khabar nahin vo sanbhal chukaa hai yaa vo bhi hai khasta-haal ab tak mujhe tiraa intizaar kyon hai ye dil miraa be-qaraar kyon hai mire khayaal-o-nazar mein dekho yahi hai bas ik savaal ab tak kahaa gayaa vaqt saare zakhmon kaa aap marham banegaa ik din kaho ki zakhmon kaa kyon nahin ho sakaa bhalaa indimaal ab tak kahaan ye mumkin ki bhuul jaaun main zindagi ki hasin yaadein bataaun kaise ki hijr mein huun main ranj-o-gham se niDhaal ab tak main ek mashal main ek jugnu main ek sham-e-vafaa huun 'shaahin' mire khudaa ne rakhaa huaa hai mujhe to yuun khush-khayaal ab tak"

"har ek khvaab mein harf-o-bayaan mein rahtaa hai vo ek shakhs jo dil ke makaan mein rahtaa hai na dil nikaltaa hai us kaa na shaam hoti hai ab is tarah se bhi koi jahaan mein rahtaa hai yaqin hai ki vo mujh par yaqin rakhtaa hai gumaan hai to vo ab tak gumaan mein rahtaa hai main is tarah se huun aazaad apni duniyaa mein ki jaise koi parind aashiyaan mein rahtaa hai rakhaa huaa hai hifaazat ke saath use dil mein main be-amaan huun vo to amaan mein rahtaa hai"

"ye hijr kaa raasta hai jis par main tanhaa tanhaa si chal rahi huun bas us ki yaadon ki dhuup hai aur main qatra qatra pighal rahi huun ye vasl-lamhon ki raushni hai jo dil ki duniyaa mein aa basi hai mahakti yaadon ki chaandni hai main jis ki kirnon se jal rahi huun rah-e-vafaa mein bhaTakti rahti jo tere sapnon mein gum na rahti tire khayaalon mein ji rahi huun tire tasavvur mein Dhal rahi huun shikasta-khvaabon ki kirchiyaan hain jo meri aankhon mein chubh rahi hain main khaar-zaaron mein chal rahi huun main girte girte sambhal rahi huun zamaane bhar ki ye talkhiyaan hain jo mere lahje mein aa basi hain main apne sheron mein dhire dhire ye zahar-e-maaya ugal rahi huun karungi kyaa baal-o-par ko apne qafas mein jiinaa jo laazmi hai kahaan hai 'shaahin' shaadmaani dukhon ki duniyaa mein pal rahi huun"

"yaadon ke saaebaan mein basar kar rahi hai raat khaake mein zindagi ke dhanak bhar rahi hai raat mujh se hai ham-kalaam yaa tujh se hai us ki baat viraan raaston kaa safar kar rahi hai raat muddat se jal rahe hain yahaan aas ke diye bujhte charaagh ko bhi qamar kar rahi hai raat un ki mahak hai aaj mire dil se duur kyuun phulon se jholiyon ko agar bhar rahi hai raat dil ko kiyaa malul aur viraan aankh ko kuchh yuun bhi jism-o-jaan mein qadam dhar rahi hai raat rakh kar ridaa-e-ishq mein kuchh phuul aur khvaab 'shaahin' aaj meri tarah mar rahi hai raat"

"ai ishq is qafas se mujhe ab rihaai de dekhun jidhar mujhe tiraa jalva dikhaai de shahr-e-shab-e-firaaq ke gahre sukut mein apni sadaa mujhe bhi kabhi to sunaai de yaad-e-habib mujh ko bhi ab mujh se kar judaa mujh ko hujum-e-dard mein meri ikaai de kab se main khaamushi ke nagar mein muqim huun lekin ye kaun hai jo yahaan bhi sunaai de zulmat-zadon ko jaada-o-manzil ki kyaa khabar taarik raaston mein bhalaa kyaa sujhaai de qatre mein maujzan hai samundar hi har jagah ab vo mujhe faraaz-e-ufuq tak rasaai de maqtal mein kaise chhoD ke raahein badal gayaa yaarab kisi sanam ko na aisi khudaai de"

"na gul mein na ab gulsitaan hi mein DhunDo mohabbat ko bas aastaan hi mein DhunDo nishaani mohabbat ki tum ko milegi kisi ek dhundle nishaan hi mein DhunDo pata shahr-e-dil ki bahaaron kaa ab tum kahin baam-o-dar ki khizaan hi mein DhunDo agar DhunDhnaa hai vajud apnaa tum ko kisi dil ke ujDe makaan hi mein DhunDo milegi andhere mein ujli kiran bhi use soch ki kahkashaan hi mein DhunDo vafaa ki kahaani mein DhunDo mujhe tum kabhi hijr ki daastaan hi mein DhunDo ho jis par yaqin tum ko 'shaahin' azal se use apne vahm-o-gumaan hi mein DhunDo"

"manzar tamaam aaj tak aankhon pe bojh hain jitne bhi khvaab hain miri palkon pe bojh hain utregaa chaand to miri bhar aaegi ye aankh taare falak se TuuT ke raaton pe bojh hain sochon pe naqsh hain vo jo pal the visaal ke dukh hijr ke tamaam hi lamhon pe bojh hain baatein us ek yaad ki baaton kaa husn hain yaadein us ek yaad ki yaadon pe bojh hain 'najma' kahin bhi jhuuT kaa jin par gumaan ho aise tamaam lafz hi sheron pe bojh hain"

"khushiyon kaa raasta go baDaa mukhtasar rahaa hai lekin ye dukh sadaa se miraa ham-safar rahaa hai us ki adaa pe shaayad rone lage falak bhi vaadon se apne kaise ab vo mukar rahaa hai kaisi bahaar hai ye kaisaa hai vasl-e-mausam Tahni se TuuT kar jo rah mein bikhar rahaa hai vo jaa chukaa hai to phir us se gila bhi kyunkar kab saath is jahaan koi umr bhar rahaa hai khushbu ki aur khushi ki ummid kyaa karein ab jab aandhiyon ki zad mein dil kaa nagar rahaa hai dil khol kar hain barsin phir se hamaari aankhein 'shaahin' hijr-e-mausam phir se nikhar rahaa hai"

"kahin pe gard kahin par havaa banaati huun main khud ko ab to bas apne sivaa banaati huun kahin pe taare kahin par hain aas ke jugnu khizaan mein bhi main gulon ki fazaa banaati huun bikhar gae the kisi naam ke huruf kahin ab un ko joD kar ik aaina banaati huun ye tai hai us ko agar lauT kar nahin aanaa to kis liye main duaa ko asaa banaati huun ujaaltaa hai ye taarikiyaan mire dil ki tumhaari yaad ko har pal diyaa banaati huun jab apne ashk chhupaati huun muskuraahaT se to apne dard ko apni davaa banaati huun taraash kar kisi patthar ke ek paikar ko kamaal-e-ishq se us ko khudaa banaati huun ki khvaab mein rahe taa-der guftugu tujh se zaraa si baat ko main vaaqia banaati huun sunaa thaa main ne jo 'shaahin' ek lamhe ko is ek lamhe ko apni sadaa banaati huun"

"miraa dil is liye dhaDkaa nahin hai palaT kar us ne jo dekhaa nahin hai ilaahi main kahaan par aa gai huun ujaalaa bhi jahaan ujlaa nahin hai ye aansu bhi musaafir hain jabhi to unhein main ne kabhi rokaa nahin hai vahi ik khvaab hotaa hai asaasa hamaare paas jo hotaa nahin hai to kyaa ab zulm had se baDh gayaa hai jo koi ab talak royaa nahin hai palaTnaa bhi nahin 'shaahin' main ne aur aage bhi koi rasta nahin hai"