Ghazal

"jise paalaa thaa ik muddat tak aaghosh-e-tamannaa mein vahi baani huaa mere gham o dard o aziyyat kaa usi ke haath se kyaa kyaa sahaa sahnaa hai kyaa kyaa kuchh ilaahi do jahaan mein munh ho kaalaa is muravvat kaa karein insaaf kaa daavaa asar kuchh bhi na zaahir ho mazaa chakkhaa hai aise doston se bhi mohabbat kaa miTaaein taaki apne zulm karne ki nadaamat ko nikaalein DhunD kar har tarah se pahlu shikaayat kaa hasad ji mein bharaa hai laag hai ik umr se dil mein karein zaahir agar mauqaa hai izhaar-e-adaavat kaa tamaa mein kuchh na samjhein baap aur bhaai ki hurmat ko amal dekho to ye phir kuchh karein daavaa sharaafat kaa miri umr-e-do-roza bekasi ke saath kaTti hai na apnon se na ghairon se milaa samra riyaazat kaa jise dekhaa jise paayaa gharaz kaa apni banda thaa jahaan main ab mazaa baaqi nahin khaalis mohabbat kaa hamaaraa kalba-e-ahzaan hai ham hain yaa kitaabein hain rahaa baaqi na koi ham-nashin ab apni qismat kaa khudaa aabaad rakkhe 'shaad' mere un azizon ko mazaa chakkhvaa diyaa al-qarz-o-miqraaz-ul-mohabbat kaa"

"tamaam umr namak-khvaar the zamin ke ham vafaa sarisht mein thi ho rahe yahin ke ham nikal ke ruuh DanvaaDol ho na jaae kahin hazaar haif na duniyaa ke hain na diin ke ham nazar uThaa ke na dekhaa kisi taraf taa-umr rahe khayaal mein ik chashm-e-surma-gin ke ham zamin chhuDaai gai ham se jab banaa kar khaak yahaan pe kyaa na rahe ai sabaa kahin ke ham yahaan makaan hai to kyuun aasmaan ki sair karein makin hain 'shaad' azal se isi zamin ke ham zamaana 'shaad' hamein kyuun bhulaa nahin detaa na haju ke na sazaa-vaar aafrin ke ham"

"kisi ko kyaa khabar ai subh vaqt-e-shaam kyaa hogaa khudaa jaane tire aaghaaz kaa anjaam kyaa hogaa giraftaaraan-e-gesu par nahin kuchh munhasir naaseh phansaa hai jo taalluq mein use aaraam kyaa hogaa abas hai zaahidon ko mai-kashi mein uzr-e-naadaari guru rakh lein usi ko jaama-e-ehraam kyaa hogaa vahi rah rah ke ghabraanaa vahi naa-kaar-gar aahein sivaa is baat ke tujh se dil-e-naakaam kyaa hogaa use bhi jald uThaa kar taaq-e-nisyaan ke havaale kar nahin pesh-e-nazar jab khatm to saaqi jaam kyaa hogaa yahi TuuTe subu miTTi ke kaafi hain qanaaat kar bilorin jaam-e-mai ai rind dard-aashaam kyaa hogaa taqarrub jin ko hai un ko bhi yak-guna hai maayusi ye haalat hai to phir didaar teraa aam kyaa hogaa na puchho muftiyaan-e-shara kaa ahvaal jaane do tanaffur kufr ko jis se ho vo islaam kyaa hogaa sahar furqat ki hai aur ghash pe ghash aate hain aashiq ko abhi se jab ye haalat ho gai taa-shaam kyaa hogaa zaifi mein tu 'shaad' allaahu-akbar pi gayaa khum tak javaani mein kaho ye rind mai-aashaam kyaa hogaa zamaana 'shaad' begaari mein kyuun aakhir phansaataa hai apaahij kar diyaa piiri ne mujh se kaam kyaa hogaa"

"ye raat bhayaanak hijr ki hai kaaTeinge baDe aalaam se ham Talne ki nahin ye kaali balaa samjhe hue the shaam se ham jab qais pahaaD is sar se Tale iid aai tab aai jaan mein jaan taa der ajab aalam mein rahe honTon ko milaae jaam se ham thaa maut kaa khaTkaa jaan-farsaa sad shukr ki niklaa vo kaanTaa gar ho na qayaamat kaa dhaDkaa ab to hain baDe aaraam se ham taa-manzil-e-jaanaan saath rahaa kam-bakht tasavvur ghairon kaa shauq apne qadam khinchaa hi kiyaa palTaa hi kiye har gaam se ham ulfat ne unhin ki haq ki taraf pheraa mire dil ko shukr-e-khudaa taamir karein masjid koi kyunkar na buton ke naam se ham ai ham-nafaso dam lene do bhule hue naghme yaad aa lein aae hain chaman mein uD ke abhi chhuTe hain isi dam daam se ham baaton mein guzarte hijr ke din ai kaash ki donon mil jaate ham se hai dil-e-naakaam khafaa aazurda dil-e-naakaam se ham yuun un ke adab yaa khaatir se har baat ko le lein apne sar jab dil hai unhin ke qaabu mein phir paak hain har ilzaam se ham vo samjhe ki ham ne maar liyaa ham samjhe mileinge aakhir vo milte hi nigah ke donon khush aaghaaz se vo anjaam se ham duniyaa mein takhallus koi na thaa kyaa niil kaa Tiikaa 'shaad' hi thaa tum vajh na puchho kuchh is ki chiDh jaate hain kyuun is naam se ham"

"ab intihaa kaa tire zikr mein asar aayaa ki munh se naam liyaa dil mein tu utar aayaa bahut dinon pe miri chashm mein nazar aayaa ai ashk khair to hai tu kidhar kidhar aayaa hazaar shukr ki is dil mein tu nazar aayaa ye naqsha safha-e-khaali pe jald utar aayaa bashar habaab ki surat hamein nazar aayaa bhari jo qatre ke andar havaa ubhar aayaa zabaan pe aataa hai naala bhi sau karishmon se kahaan se aap ke andaaz kaa asar aayaa adam mein aish hai chaltaa huun main bhi le ai dil jahaan mein jitne musibat ke din the bhar aayaa likhe ko roiye ab ta-ba-hashr turbat mein ki mere marne pe khat le ke naama-bar aayaa paDaa hai shab se yuun hi ab talak na li karvaT dil-e-sitam-zada us ki gali se mar aayaa hazaar shukr khudaa kaa yahi ghanimat hai na khair aayaa mire dil ko aur shar aayaa riyaa to dil mein thi maathe pe ab hai us kaa nishaan kahaan kaa daagh kahaan dafatan ubhar aayaa muqim-e-dil hai Danvaan Dol rah ke ab imaan buton ke qahr se chhuTaa khudaa ke ghar aayaa hamaare paa-e-talab ne baDi muhim sar ki ki kaT ke saamne qaatil ke apnaa sar aayaa sharaab pi ke main pahunchaa falak pe ai saaqi kahaan se un kai qatron mein ye asar aayaa vo chaahe bad kahe qaasid buton ko yaa mujh ko haram mein chain se imaan jaa ke dhar aayaa lahad mein shaana hilaa kar ye maut kahti hai le ab to chaunk musaafir ki apne ghar aayaa hazaar shukr huaa aaftaab-e-hashr tulu baDi to laaj rahi ye ki tu nazar aayaa gavaahiyaan huiin aazaa ki hashr mein maqbul vo paak ho gae ilzaam mere sar aayaa hujum-e-gham ne sikhaane ki laakh koshish ki hamein to aah bhi karnaa na umr bhar aayaa jo chand din mein hue zi-kamaal kaun hain 'shaad' hamein to sher kaa kahnaa na umr bhar aayaa usi ko sher samajhte hain 'shaad' ahl-e-mazaaq udhar paDhaa ki dilon mein idhar utar aayaa"

"main 'shaad' tanhaa ik taraf duniyaa ki duniyaa ik taraf saaraa samundar ik taraf aansu kaa qatra ik taraf us aafat-e-jaan ko bhi chehra to dikhaanaa hi na thaa ik samt iisaa dam-ba-khud ghash mein hai muusaa ik taraf apne samand-e-naaz ko ai shahsavaar aa chheD kar saf-basta haazir kab se hain mahv-e-tamaashaa ik taraf saaqi baghair ahvaal ye pahunchaa hai mai-khaane kaa ab jaam ik taraf hai sar-nigun khaali hai miinaa ik taraf furqat mein sab achchhe rahe dil kaa magar ye haal hai zakhm ik taraf baDhtaa gayaa daagh-e-suvaidaa ik taraf didaar-e-jaanaan kaa bhalaa kyuun kar tahammul ho sake tirchhi nigaahein ek su zulf-e-chalipaa ik taraf vo tegh le ke kahte hain dekhun to haq par kaun hai main ik taraf 'shaad' ik taraf saaraa zamaana ik taraf"

"agar marte hue lab par na teraa naam aaegaa to main marne se dar-guzraa mire kis kaam aaegaa use bhi Thaan rakh saaqi yaqin hogaa na rindon ko agar zaahid pahan kar jaama-e-ehraam aaegaa shab-e-furqat mein dard-e-dil se main us vaaste khush huun zabaan par raat bhar rah rah ke teraa naam aaegaa lagi ho kuchh to qaasid aakhir is kam-bakht dil mein bhi vahaan teri tarah jo jaaegaa naakaam aaegaa isi ummid mein baandhe hue hain TakTaki mai-kash kaf-e-naazuk pe saaqi rakh ke ik din jaam aaegaa yahaan apni paDi hai tujh se ai gham-khvaar kyaa uljhun ye kaun aaraam hai mar jaaun tab aaraam aaegaa zahe izzat jo ho is bazm mein mazkur ai vaaiz balaa se gar gunahgaaron mein apnaa naam aaegaa hazaar inkaar yaa qat-e-taalluq us se kar naaseh magar hir-phir ke honTon par usi kaa naam aaegaa ataa ki jab ki khud pir-e-mughaan ne pi bhi le zaahid ye kaisaa sochnaa hai tujh pe kyuun ilzaam aaegaa paDaa hai silsila taqdir kaa sayyaad ke bas mein chaman mein ai sabaa kyunkar asir-e-daam aaegaa koi badmast ko detaa hai saaqi bhar ke paimaana tiraa kyaa jaaegaa mujh par abas ilzaam aaegaa unhein dekhegi tu ai chashm-e-hasrat vasl mein yaa main tire kaam aaegaa ronaa ki mere kaam aaegaa hamesha kyaa piyungaa main isi kohna-sifaali main mire aage kabhi to saaghar-e-zarfaam aaegaa kahaan se laaun sabr-e-hazrat-e-ayyub ai saaqi khum aaegaa suraahi aaegi tab jaam aaegaa chhuri thi kund teri yaa tire qaatil ki o bismil taDap bhi tu tiri gardan pe kyuun ilzaam aaegaa yahi kah kar ajal ko qarz-khvaahon ki tarah Taalaa ki le kar aaj qaasid yaar kaa paighaam aaegaa hamesha kyaa yuun hi qismat mein hai ginti ginaa denaa koi naala na lab par laaiq-e-anjaam aaegaa gali mein yaar ki ai 'shaad' sab mushtaaq baiThe hain khudaa jaane vahaan se hukm kis ke naam aaegaa"

"ghaflat mein hui auqaat basar ai umr-e-gurezaan kuchh na kiyaa sab chalne ke the saamaan baham chalne hi kaa saamaan kuchh na kiyaa vaaiz ne bhare kham chuur kiye tar kar di zamin ai pir-e-mughaan zaalim ne zaraa bhi teraa lihaaz ai rahbar-e-imaan kuchh na kiyaa aamaal ki zishti kaa badlaa main kah nahin saktaa kyaa miltaa bhejaa bhi agar dozakh mein tujhe ai saahab-e-imaan kuchh na kiyaa mai piine kaa dil mein josh na thaa zaahir ki talab thi hosh mein aa saaqi ne milaayaa zahar agar ai munkir-e-ehsaan kuchh na kiyaa maanaa ki baDi saffaak hai tu bil-farz baDi jallaad hai tu main jiitaa rahaa taa-subh agar to ai shab-e-hijraan kuchh na kiyaa taklif kisi ko gar pahunchi tu is mein takalluf kyaa niklaa hairaan jo rakhaa qaatil ko to ai shab-e-hijraan kuchh na kiyaa ulTaa na iraaq-o-shaam-o-halab duniyaa na hui viraan to kyaa jal-thal na lahu se to ne bharaa to khun-e-musalmaan kuchh na kiyaa suntaa huun adu ko khaak kiyaa miTTi mein milaayaa ghar us kaa phunkaa na jalaa kar mujh ko agar tu ai shab-e-hijraan kuchh na kiyaa kyaa ji ke karungaa main tanhaa yaan taab kahaan baaqi dil ko be-maut ke ab maaraa na mujhe to daagh-e-azizaan kuchh na kiyaa jumbish se tiri maqtal hotaa ik aan mein dasht-e-karb-o-balaa ushshaaq ki bebaaki kaa evaz ai abru-e-barraan kuchh na kiyaa ai nang-e-jahaan ai 'shaad' bataa kuchh sharm bhi tujh ko hai ki nahin ai jehl-e-murakkab ai haivaan ai be-khabar insaan kuchh na kiyaa"

"kahaan ye taab ki chakh chakh ke yaa giraa ke piyun mile bharaa huaa saaghar to DagDagaa ke piyun hazaar talkh ho pir-e-mughaan ne jab di hai khudaa na-karda jo main munh banaa banaa ke piyun mazaa hai baada-kashi kaa vahin to ai saaqi piyun jo ab to tire aastaan pe aa ke piyun baghair jalva dikhaae rahe na ye maashuq jo saat parde ke andar use chhupaa ke piyun main vo nahin ki khud apne qadah ki khair manaaun piyun to bazm mein das paanch ko pilaa ke piyun zamin pe jaam ko rakh de zaraa Thahar saaqi main tujh pe huun luun tasadduq to phir uThaa ke piyun vo mai-kada hai na saaqi hai kuchh na puchho 'shaad' main kis ke ghar mein piyun kis ke ghar se laa ke piyun"

"musibat jis se zaail ho rahi saamaan kar degaa na ghabraanaa khudaa sab mushkilein aasaan kar degaa kharaabaat-e-jahaan mein kaun hai dil-soz saaqi saa agar tarchhaT bhi denaa hai to tujh ko chhaan kar degaa qanaaat ki bhi daulat ho to istighnaa nahin laazim jise tu nafa samjhaa hai yahi nuqsaan kar degaa jagah dil mein na de shauq-e-numu-daari buri shai hai yahi chaskaa tujhe barbaad ai naadaan kar degaa kahungaa aaj se main saahib-e-ejaaz naaseh ko agar mere dil-e-muztar kaa itminaan kar degaa tamannaaon ki mehmaani tasavvur ke havaale kar ki jo saamaan munaasib hai vahi saamaan kar degaa mataa-e-be-bahaa se kam na jaan ai chashm ashkon ko yahi ronaa tiraa khaali tiri dukaan kar degaa koi gar saltanat bhi de to vaapas kar na le ai dil subuk har tarf tujh ko ghair kaa ehsaan kar degaa kahe detaa huun qaatil le khabar jaan-baaz ki apne fanaa shauq-e-shahaadat mein kisi din jaan kar degaa tiri ru-poshiyaan ai husn kab be-kaar jaaeingi yahi parda ayaan aalam mein teri shaan kar degaa yaqin kar le ki khud vo jalva-gar parde mein hai varna yahi zaalim gumaan teraa tujhe hairaan kar degaa ghazal se kyaa muraad ai 'shaad' hai arbaab-e-maani ki kisi din tasfiya us kaa miraa divaan kar degaa"

"mire daanton ki umr ai aarzu mujh se bhi chhoTi thi usi ne saath chhoDaa daant-kaaTi jin se roTi thi shikaayat aarzu ki be kiye naaseh nahin banti ye sab dil-juiyaan zaahir ki thi baatin ki khoTi thi havaa dar dar liye phirti hai ab to meri miTTi ko ye hai vo khaak jo ik din tire qadmon pe loTi thi bahut gahre na hon ochhe sahi charke to puure hain khataa qaatil ki kyaa hai ik daraa talvaar chhoTi thi pahaaD us par giraa ai aasmaan kyaa bas chale varna hamaare aashiyaan ki shaakh sab shaakhon se moTi thi balaa kar tu ne ai hasti yahaan ki khuub mehmaani vahi karte hain faaqe jin ke dam se das ki roTi thi pahunch jaati thi us us ghar mein jis jis ghar kaa paasaa thaa jo sach puchho to meri aarzu chausar ki goTi thi na kyuun kar teri yaktaai kaa kalima naqsh ho dil par sabaq ki tarah barson ye ibaarat ham ne ghoTi thi mujhe khush khush jo paayaa jal ke kyaa jaldi hui rukhsat shab-e-vasl ai falak sab kuchh sahi niyyat ki chhoTi thi ye sach hai 'shaad' kyaa thaa kuchh na thaa lekin tumhaaraa thaa na samjhaa tum ne ai baarik-bino baat moTi thi"

"hargiz kabhi kisi se na rakhnaa dilaa gharaz jab kuchh gharaz nahin to zamaane se kyaa gharaz phailaa ke haath muft mein honge zalil ham mahrum tere dar se phiregi duaa gharaz duniyaa mein kuchh to ruuh ko is jism se hai kaam miltaa hai varna kaun kisi se bilaa gharaz vasl o firaaq o hasrat o ummid se khulaa hamraah hai har ek baqaa ke fanaa gharaz ik phir ke dekhne mein gai saikDon ki jaan teri har ik adaa mein bhari hai jafaa gharaz dekhaa to thaa yahi sabab-e-hasrat-o-alam majbur ho ke tark kiyaa muddaaa gharaz kyunkar na ruuh o jism se ho chand din milaap is ko judaa gharaz hai to us ko judaa gharaz ilzaam taa-ki sar pe kisi tarah kaa na ho ai 'shaad' DhunDti hai bahaane qazaa gharaz"

"ab bhi ik umr pe jiine kaa na andaaz aayaa zindagi chhoD de pichhaa miraa main baaz aayaa muzhda ai ruuh tujhe ishq saa dam-saaz aayaa nakbat-e-faqr gai shaah-e-sar-afraaz aayaa paas apne jo nayaa koi fusun-saaz aayaa ho rahe us ke hamein yaad tiraa naaz aayaa piite piite tiri ik umr kaTi us par bhi piine vaale tujhe piine kaa na andaaz aayaa dil ho yaa ruuh o jigar kaan khaDe sab ke hue ishq aayaa ki koi mufsida-pardaaz aayaa le rahaa hai dar-e-mai-khaana pe sun-gun vaaiz rindo hushyaar ki ik mufsida-pardaaz aayaa dil-e-majbur pe is tarah se pahunchi vo nigaah jaise usfur pe par tol ke shahbaaz aayaa kyuun hai khaamosh dilaa kis se ye sargoshi hai maut aai ki tire vaaste hamraaz aayaa dekh lo ashk-e-tavaatur ko na puchho miraa haal chup raho chup raho is bazm mein ghammaaz aayaa is kharaabe mein to ham donon hain yaksaan saaqi ham ko piine tujhe dene kaa na andaaz aayaa naala aataa nahin kan-ras hai faqat ai bulbul mard-e-sayyaah huun sun kar tiri aavaaz aayaa dil jo ghabraae qafas mein to zaraa par kholun zor itnaa bhi na ai hasrat-e-parvaaz aayaa dekhiye naala-e-dil jaa ke lagaae kis se jis kaa khaTkaa thaa vahi mufsida-pardaaz aayaa muddai basta-zabaan kyuun na ho sun kar mire sher kyaa chale sehr ki jab saahib-e-ejaaz aayaa rind phailaae hain chullu ko takalluf kaisaa saaqiyaa Dhaal bhi de jaam khudaa-saaz aayaa na gayaa par na gayaa shama kaa ronaa kisi haal go ki parvaana-e-marhum saa dam-saaz aayaa ek chupki mein gulu tum ne nikaale sab kaam ghamza aayaa na karishma na tumhein naaz aayaa dhyaan rah rah ke udhar kaa mujhe dilvaataa hai dam na aayaa mire tan mein koi dam-saaz aayaa kis tarah maut ko samjhun na hayaat-e-abadi aap aae ki koi saahib-e-ejaaz aayaa be-'anis' ab chaman-e-nazm hai viraan ai 'shaad' haae aisaa na koi zamzama-pardaaz aayaa"

"na dil apnaa na gham apnaa na koi gham-gusaar apnaa ham apnaa jaante har chiiz ko hotaa jo yaar apnaa jame kis tarah is hairat-kade mein e'tibaar apnaa na dil apnaa na jaan apni na ham apne na yaar apnaa haqiqat mein hamin ko jab nahin khud e'tibaar apnaa ghalat samjhi agar samjhi hai tan ko jaan-e-zaar apnaa kahin hai daam armaan kaa kahin daane ummidon ke ajal karti hai kis kis ghaat se ham ko shikaar apnaa ilaahi khair ho ab ke bahaar-e-baagh ne phir bhi jamaayaa be-tarah bulbul ke dil par e'tibaar apnaa jo mai ko Dhaal bhi lein ham to saaqi ke ishaare par nahin is ke alaava mai-kade mein ikhtiyaar apnaa agar qaasid haqiqat mein payaam-e-vasl laayaa hai to kyuun aansu bhare munh dekhtaa hai gham-gusaar apnaa zarurat kyaa kisi ko is taraf ho kar guzarne ki alag ai bekasi basti se hai koson mazaar apnaa maaaz allaah furqat ki hain raatein qabr ki raatein abhi se yaan huaa jaataa hai sun sun kar fishaar apnaa gulon ki surkh rangat jism mein lauke lagaati hai dikhaati hai tamaashaa kis ki aankhon ko bahaar apnaa khatar kyaa kashti-e-mai ko bhalaa mauj-e-havaadis kaa na beDaa paar ho kyunkar ki khud saaqi hai yaar apnaa chhupaa legaa kisi din arsh tak ko apne daaman mein dikhaa degaa tamaashaa phail kar musht-e-ghubaar apnaa khabar kyaa ghaib ki gham-khvaar ko aur yaan ye aalam hai kahaa jaataa nahin apni zabaan se haal-e-zaar apnaa nahin kartaa gavaaraa raah-rau ke dil pe mail aanaa uDaa kartaa hai raste se alag haT kar ghubaar apnaa dam aayaa naak mein fariyaadiyon ke shor o ghaughaa se qayaamat mein abas kyuun khinch laayaa intishaar apnaa ham ik mehmaan hain ham se dosti karne kaa haasil kyaa nahin kuchh is jahaan mein ai shab-e-gham e'tibaar apnaa kuchh aisaa kar ki khuld aabaad tak ai 'shaad' jaa pahunchein abhi tak raah mein vo kar rahe hain intizaar apnaa"

"ek sitam aur laakh adaaein uf ri javaani haae zamaane tirchhi nigaahein tang qabaaein uf ri javaani haae zamaane hijr mein apnaa aur hai aalam abr-e-bahaaraan dida-e-pur-nam zid ki hamein vo aap bulaaein uf ri javaani haae zamaane apni adaa se aap jhijaknaa apni havaa se aap khaTaknaa chaal mein laghzish munh pe hayaaein uf ri javaani haae zamaane haath mein aaDi tegh pakaDnaa taaki lage bhi zakhm to ochhaa qasd ki phir ji bhar ke sataaein uf ri javaani haae zamaane kaali ghaTaaein baagh mein jhule dhaani dupaTTe laT jhaTkaae mujh pe ye qadghan aap na aaein uf ri javaani haae zamaane pichhle pahar uTh uTh ke namaazein naak ragaDni sajdon pe sajde jo nahin jaaez us ki duaaein uf ri javaani haae zamaane 'shaad' na vo didaar-parasti aur na vo be-nashsha ki masti tujh ko kahaan se DhunDh ke laaein uf ri javaani haae zamaane"

"DhunDoge agar mulkon mulkon milne ke nahin naayaab hain ham jo yaad na aae bhuul ke phir ai ham-nafaso vo khvaab hain ham main hairat o hasrat kaa maaraa khaamosh khaDaa huun saahil par dariyaa-e-mohabbat kahtaa hai aa kuchh bhi nahin paayaab hain ham ho jaae bakheDaa paak kahin paas apne bulaa lein behtar hai ab dard-e-judaai se un ki ai aah bahut betaab hain ham ai shauq buraa is vahm kaa ho maktub tamaam apnaa na huaa vaan chehre pe un ke khat niklaa yaan bhule hue alqaab hain ham kis tarah taDapte ji bhar kar yaan zoaf ne mushkin kas diin hain ho band aur aatish par ho chaDhaa simaab bhi vo simaab hain ham ai shauq pataa kuchh tu hi bataa ab tak ye karishma kuchh na khulaa ham mein hai dil-e-betaab nihaan yaa aap dil-e-betaab hain ham laakhon hi musaafir chalte hain manzil pe pahunchte hain do ek ai ahl-e-zamaana qadr karo naayaab na hon kam-yaab hain ham murghaan-e-qafas ko phulon ne ai 'shaad' ye kahlaa bhejaa hai aa jaao jo tum ko aanaa ho aise mein abhi shaadaab hain ham"

"tamannaaon mein uljhaayaa gayaa huun khilaune de ke bahlaayaa gayaa huun huun is kuche ke har zarre se aagaah idhar se muddaton aayaa gayaa huun nahin uThte qadam kyuun jaanib-e-dair kisi masjid mein bahkaayaa gayaa huun dil-e-muztar se puchh ai raunaq-e-bazm main khud aayaa nahin laayaa gayaa huun saveraa hai bahut ai shor-e-mahshar abhi bekaar uThvaayaa gayaa huun sataayaa aa ke pahron aarzu ne jo dam bhar aap mein paayaa gayaa huun na thaa main mo'taqid eajaaz-e-mai kaa baDi mushkil se manvaayaa gayaa huun kujaa main aur kujaa ai 'shaad' duniyaa kahaan se kis jagah laayaa gayaa huun tamannaon mein uljhaya gaya hun khilaune de ke bahlaya gaya hun hun is kuche ke har zarre se aagah idhar se muddaton aaya gaya hun"

"bahut kuchh bhuul ho gai bhulne kaa 'shaad' sun aayaa miri jaan gham abas hai jhiDkiyaan sunne kaa din aayaa zarur us ne kiyaa qaasid se vaada apne aane kaa gayaa thaa muztarib yaan se vahaan se mutmain aayaa dil-e-sad-paara se nisbat nahin zinhaar ai bulbul chaman mein jaa ke aashiq patiyaan phulon ki gin aayaa baDi azmat se khud saaqi ne jaa kar peshvaai ki sharaabi koi mai-khaana ke andar jab musin aayaa chalo vaaiz se hargiz kuchh na bolo chup raho rindo huaa josh-e-ghazab yaa sar pe us naadaan ke jin aayaa mariz-e-gham ki sehat ki khabar allaah sunvaae gayaa jo paas us ke 'shaad' vo phir mutmain aayaa"

"bhuul na us ko dhun hai jidhar ki chaunk musaafir raat nahin hai shakl numaayaan hogi sahar ki chaunk musaafir raat nahin hai aankhein malte sehn-e-chaman mein jhuum ke uTThe niind ke maate dekh sabaa ne aa ke khabar ki chaunk musaafir raat nahin hai niile niile rang ke uupar baDhti hi jaati hai safedi ho gai rangat zar-o-qamar ki chaunk musaafir raat nahin hai zor na taaqat sang na saathi paanv se apne aap hai chalnaa tujh pe hai bhaari raah-e-safar ki chaunk musaafir raat nahin hai tujh pe main qurbaan jaani pyaare ham-nafas-o-ham-dard hamaare tujh se hai ulfat main ne khabar ki chaunk musaafir raat nahin hai pankh-pakheru khvaab se chaunke sab ne khushi ke naare maare aai sadaa murghaan-e-sahar ki chaunk musaafir raat nahin hai kuuch ki saaat aa gai sar par 'shaad' uThaa le jholi-bistar niind mein saari raat basar ki chaunk musaafir raat nahin hai"

"naalon ki kashaakash sah na sakaa khud taar-e-nafas bhi TuuT gayaa ik umr se thi taklif jise kal shab ko vo qaidi chhuT gayaa thi teri tamannaa kaahish-e-jaan is dard se mein divaana thaa chhaalaa thaa dil apne siine mein ai vaa-asfaa vo phuuT gayaa sab apni hi apni dhun mein phanse teraa to na niklaa kaam koi jo aayaa tire darvaaze par vo apnaa hi maathaa kuuT gayaa taabut pe mere aae jo miTTi mein milaayaa yuun kah kar phailaa diye dast-o-paa apne itne hi mein bas ji chhuT gayaa aayaa thaa yahi dil mein mere rindon hi pe kali bhi pheinkun saaqi kaa ishaara paate hi mein zahr-e-sitam ko ghuuT gayaa ho hindu-e-khaal-e-lab teraa yaa tark-e-nigah ho ai qaatil dehli thaa hamaaraa dil shaayad jo aayaa vo us ko luuT gayaa naazuk thaa bahut kuchh dil meraa ai 'shaad' tahammul ho na sakaa ik Thes lagi thi yuun hi si kiyaa jald ye shisha TuuT gayaa"

"siyaahkaar siyah-ru khataa-shiaar aayaa tiri janaab mein teraa gunaahgaar aayaa khizaan kaa daur gayaa mausam-e-bahaar aayaa magar na us dil-e-be-sabr ko qaraar aayaa kahin javaab na tu ne diyaa yahaan ke sivaa jahaan mein yuun to bahut main tujhe pukaar aayaa saraa-e-dahr mein chhoDaa tan-e-kasif apnaa ye bojh sar se musaafir tiraa utaar aayaa hamaare naala-e-dil kaa na pochhiye ahvaal gali se yaar ki himmat bhi ab ke haar aayaa paDi jo qais ke uupar nazar bayaabaan mein mujhe gharib ke uupar ghazab kaa pyaar aayaa na apne paanv se aanaa milaa gali mein tiri yahaan bhi chaar ke kaandhon pe main savaar aayaa ye iztiraab hai kyuun hai kidhar kaa qasd ai ruuh kahaan se aai talab kis jagah se taar aayaa miri na puchh ki teri gali mein khaak huun main tujhi ko meri vafaa kaa na eatibaar aayaa lahad ne khol ke aaghosh di jagah jo mujhe lipaT ke rah gae ham ko bhi khuub pyaar aayaa yaqin jaan le saaqi ki khum ki khair nahin khudaa na-karda jo ab ke mujhe khumaar aayaa mire nasib kahaan is tarah ke dida-e-tar sunun ye khush-khabari kaan se ki yaar aayaa tire firaaq ke khugar na mar miTe jab tak qazaa ke aane kaa tab tak na eatibaar aayaa"

"shab ko miri chashm-e-hasrat kaa sab dard-e-dil un se kah jaanaa daanton mein dabaa kar honT apnaa kuchh soch ke us kaa rah jaanaa mai-khaane mein aanaa zaahid kaa phir dar pe ThiThuk kar rah jaanaa saaqi ke ishaaron kaa maston kuchh kaan mein sab ke kah jaanaa ai yaas na maanungaa teri bas dil ko ziyaada ab na dukhaa samjhaa chuki us ki paheli nigah dukh-dard jo ho vo sah jaanaa maanaa ki faqat mauhum sahi milne ki hamein ik aas to hai didaar to ho le dida-e-tar bahnaa ho agar tab bah jaanaa naale hon ki aahein ai shab-e-gham jab aa gaiin lab par sabr kiyaa sahne ko to sab kuchh dil ne sahaa sahne ki tarah kab sah jaanaa buniyaad jamaane mein jin ki kyaa kuchh na bahaa thaa khun-e-jigar ai vaa-asfaa un mahlon kaa ik chashm-e-zadan mein Dah jaanaa shab ko vo hatheli se un kaa sharmaa ke chhupaanaa aankhon ko barchhi kaa adaa ki chal jaanaa us tir-e-nazar kaa rah jaanaa utre na kisi ke jab dil mein us baat kaa haasil kyaa vaaiz kahne ko kahi yuun apni si afsos na tu ne kah jaanaa ham baagh mein naahaq aae the bulbul ki hikaayat kyaa kahiye minqaar ko rakh kar kaliyon par kuchh apni zabaan mein kah jaanaa sun lein dil-e-naadaan ki baatein be-kaar bigaaDein kaam apnaa vo zulm karein ham par ki sitam ai 'shaad' hamein to sah jaanaa"

"gham-e-firaaq mai o jaam kaa khayaal aayaa safed baal liye sar pe ik vabaal aayaa milegaa ghair bhi un ke gale ba-shauq ai dil halaal karne mujhe iid kaa hilaal aayaa agar hai dida-e-raushan to aaftaab ko dekh udhar uruuj huaa aur idhar zavaal aayaa luTaae dete hain in motiyon ko dida-e-shauq bhar aae ashk ki muflis ke haath maal aayaa lagi nasim-e-bahaari jo maarifat gaane gulon pe kuchh nahin mauquf sab ko haal aayaa payaam-bar ko abas de ke khat udhar bhejaa gharib aur vahaan se shikasta-haal aayaa khudaa khudaa karo ai 'shaad' is pe nakhvat kyaa jo shaairi tumhein aai to kyaa kamaal aayaa"

"jahaan hai maktab-e-hasti sabaq hai chup rahnaa baDaa gunaah yahaan hai alif se be kahnaa shab-e-firaaq mein saae se Dar ke kahtaa huun aji ye raat Daraani hai jaagte rahnaa chaman mein phuul khile baagh mein bahaar aai urus-e-dahr ne goyaa pahan liyaa gahnaa hamaari aah-o-bakaa se hai jism-e-shauq qavi ye haath baayaan hai apnaa vo haath hai dahnaa fughaan-e-bulbul-e-shaidaa na jaaniye is ko bajaa rahaa hai koi sehn-e-baagh mein shahna gham-e-firaaq mein ai aasmaan nahin mauquf vo jo suhaaein mujhe mujh ko har tarah sahnaa nikaal de ki hai aise mein ju-e-ashk-e-ravaan buraa hai baat kaa ai chashm-e-dil mein le rahnaa gali mein yaar ki ho yaa kisi kharaabe mein hamein to hashr ke din tak kahin pe mar rahnaa asar bhi 'shaad' ke sheron mein hai mataanat bhi ye kohna-mashq hain in ki ghazal kaa kyaa kahnaa"