Ghazal

"bhuli-bisri yaadon ko lipTaae hue huun TuuTaa jaal samundar par phailaae hue huun vahshat karne se bhi dil bezaar huaa hai dasht o samundar aanchal mein simTaae hue huun vo khushbu ban kar aae to be-shak aae main bhi dast-e-sabaa se haath milaae hue huun TuTe-phuTe lafzon ke kuchh rang ghule the un ki mehndi aaj talak bhi rachaae hue huun jin baaton ko sunnaa tak baar-e-khaatir thaa aaj unhin baaton se dil bahlaae hue huun"

"ye sach hai yahaan shor ziyaada nahin hotaa ghar-baar ke baazaar main par kyaa nahin hotaa jabr-e-dil-e-be-mehr kaa charchaa nahin hotaa taariki-e-shab mein koi chehra nahin hotaa har jazba-e-maasum ki lag jaati hai boli kahne ko kharidaar paraayaa nahin hotaa aurat ke khudaa do hain haqiqi o majaazi par us ke liye koi bhi achchhaa nahin hotaa shab-bhar kaa tiraa jaagnaa achchhaa nahin 'zehraa' phir din kaa koi kaam bhi puuraa nahin hotaa"

"dil bujhne lagaa aatish-e-rukhsaar ke hote tanhaa nazar aate hain gham-e-yaar ke hote kyuun badle hue hain nigah-e-naaz ke andaaz apno pe bhi uTh jaati hai aghyaar ke hote viraan hai nazar meri tire rukh ke muqaabil aavaara hain gham kucha-e-dildaar ke hote ik ye bhi adaa-e-dil-e-aashufta-saraan thi baiThe na kahin saaya-e-divaar ke hote jiinaa hai to ji leinge bahar-taur divaane kis baat kaa gham hai rasan-o-daar ke hote"

"lab par khamoshiyon ko sajaae nazar churaae jo ahl-e-dil mein baiThe hain chup-chaap sar jhukaae kah do koi sabaa se idhar aaj-kal na aae kaliyaan kahin mahak na uThein phuul khil na jaae ab dosti vo fan ki jo sikhe vahi nibhaae aur hai vafaa tamaashaa jise aae vo dikhaae kuchh kahnaa jurm hai to khataa-vaar main bhi huun ye aur baat meraa kahaa vo samajh na paae"

"vahshat mein bhi minnat-kash-e-sahraa nahin hote kuchh log bikhar kar bhi tamaashaa nahin hote jaan dete hain jaan dene kaa saudaa nahin karte sharminda-e-ejaaz-e-masihaa nahin hote ham khaak the par jab use dekhaa to bahut roe sunte the ki sahraaon mein dariyaa nahin hote ik taar-e-garebaan kaa rahe dhyaan ki sab log mahfil mein to hote hain shanaasaa nahin hote"

"qurbaton se kab talak apne ko bahlaaeinge ham Doriyaan mazbut hongi chhuTte jaaeinge ham teraa rukh saae ki jaanib meri aankhein su-e-mahr dekhnaa hai kis jagah kis vaqt mil paaeinge ham ghar ke saare phuul hangaamon ki raunaq ho gae khaali gul-daanon se baatein karke so jaaeinge ham adh-khuli takiye pe hogi ilm-o-hikmat ki kitaab vasvason vahmon ke tufaanon mein ghar jaaeinge ham us ne aahista se 'zahra' kah diyaa dil khil uThaa aaj se is naam ki khushbu mein bas jaaeinge ham"

"harf harf gundhe the tarz mushkbu ki thi tum se baat karne ki kaisi aarzu ki thi saath saath chalne ki kis qadar tamannaa thi saath saath khone ki kaisi justuju ki thi vo na jaane kyaa samjhaa zikr mausamon kaa thaa main ne jaane kyaa sochaa baat rang-o-bu ki thi is hujum mein vo pal kis tarah se tanhaa hai jab khamosh the ham tum aur guftugu ki thi"

"raunaqein ab bhi kivaaDon mein chhupi lagti hain mahfilein ab bhi usi tarah saji lagti hain raushni ab bhi daraazon se umaD aati hai khiDkiyaan ab bhi sadaaon se khuli lagti hain saaatein jo tiri qurbat mein giraan guzri thiin duur se dekhun to ab vo bhi bhali lagti hain ab bhi kuchh log sunaate hain sunaae hue sher baatein ab bhi tiri zehnon mein basi lagti hain"

"ye hukm hai ki andhere ko raushni samjho mile nasheb to koh-o-daman ki baat karo nahin hai mai na sahi chashm-e-iltifaat to hai nai hai bazm tariq-e-kuhan ki baat karo fareb-khurda-e-manzil hain ham ko kyaa maalum ba-tarz-e-raahbari raahzan ki baat karo khizaan ne aa ke kahaa mere gham se kyaa haasil jahaan bahaar luTi us chaman ki baat karo qadam qadam pe farozaan hain aansuon ke charaagh unhein bujhaao to subh-e-vatan ki baat karo bahaar aae to chup chaap hi guzar jaae na rang-o-bu ki na sarv-o-saman ki baat karo"

"raste se muhaafiz kaa khatra jo nikal jaataa manzil pe bhi aa jaate naqsha bhi badal jaataa is jhuuT ki daldal se baahar bhi nikal aate duniyaa mein bhi sar uThtaa aur ghar bhi sambhal jaataa hanste hue buDhon ko qisse kai yaad aate rote hue bachchon kaa ronaa bhi bahal jaataa kyuun apne pahaaDon ke sinon ko jalaate ham khatra to mohabbat ke ik phuul se Tal jaataa is shahr ko raas aai ham jaison ki gum-naami ham naam bataate to ye shahr bhi jal jaataa vo saath na detaa to vo daad na detaa to ye likhne-likhaane kaa jo bhi hai khalal jaataa"

"ek teraa gham jis ko raah-e-mo'tabar jaanein is safar mein ham kis ko apnaa ham-safar jaanein jis se kuchh na kah paaein jaan-e-guftugu Thahre jis se kam milein us ko sab se beshtar jaanein apnaa aks bhi aksar saath chhoD jaataa hai ye maaal-e-khud-bini kaash shishagar jaanein taar-taar kar Daalein sabr-o-zabt kaa daaman zakhm zakhm dikhlaa dein zarf-e-chaara-gar jaanein"

"gardish-e-minaa-o-jaam dekhiye kab tak rahe ham pe taqaazaa haraam dekhiye kab tak rahe teraa sitam ham pe aam dekhiye kab tak rahe talkhi-e-dauraan pe naam dekhiye kab tak rahe chhaa gaiin taarikiyaan kho gayaa husn-e-nazar vaada-e-didaar-e-aam dekhiye kab tak rahe ahl-e-khirad sust-rau ahl-e-junun tez-gaam shauq kaa ye ehtimaam dekhiye kab tak rahe subh ke suraj ki zau dekhiye kab tak na aae dahr pe ye rang-e-shaam dekhiye kab tak rahe"

"der tak raushni rahi kal raat main ne oDhi thi chaandni kal raat ek muddat ke baa'd dhund chhaTi dil ne apni kahi suni kal raat ungliyaan aasmaan chhuti thiin haan miri dastaras mein thi kal raat uThtaa jaataa thaa parda-e-nisyaan ek ik baat yaad thi kal raat taaq-e-dil pe thi ghungruon ki sadaa ik jhaDi si lagi rahi kal raat jugnuon ke se lamhe uDte the meri muTThi mein aa gai kal raat"

"ye udaasi ye phailte saae ham tujhe yaad kar ke pachhtaae mil gayaa thaa sakun nigaahon ko ki tamannaa to ashk bhar aae gul hi uktaa gae hain gulshan se baaghbaan se kaho na ghabraae ham jo pahunche to rahguzar hi na thi tum jo aae to manzilein laae jo zamaane kaa saath de na sake vo tire aastaan se lauT aae bas vahi the mataa-e-dida-o-dil jitne aansu mizha talak aae"

"raat gahri thi phir bhi saveraa saa thaa ek chehra ki aankhon mein Thahraa saa thaa be-charaagi se teri mire shahr-e-dil vaadi-e-sher mein kuchh ujaalaa saa thaa mere chehre kaa suraj use yaad hai bhultaa hai palak par sitaara saa thaa baat kiije to khulte the jauhar bahut dekhne mein to vo shakhs saada saa thaa sulh jis se rahi meri taa-zindagi us kaa saare zamaane se jhagDaa saa thaa"

"koi hangaama sar-e-bazm uThaayaa jaae kuchh kiyaa jaae charaaghon ko bujhaayaa jaae bhulnaa khud ko to aasaan hai bhulaa baiThaa huun vo sitamgar jo na bhule se bhulaayaa jaae jis ke baais hain ye chehre ki lakirein maghmum ghair-mumkin hai ki manzar vo dikhaayaa jaae shaam khaamosh hai aur chaand nikal aayaa hai kyuun na ik naqsh hi paani pe banaayaa jaae zakhm hanste hain to ye fasl-e-bahaar aati hai haan isi baat pe phir zakhm lagaayaa jaae"

"ek ke ghar ki khidmat ki aur ek ke dil se mohabbat ki donon farz nibhaa kar us ne saari umr ibaadat ki dast-e-talab kuchh aur baDhaate haf-iqlim bhi mil jaate ham ne to kuchh TuTe-phuTe jumlon hi pe qanaaat ki shohrat ke gahre dariyaa mein Duube to phir ubhre nahin jin logon ko apnaa samjhaa jin logon se mohabbat ki ek doraahaa aisaa aayaa donon TuuT ke gir jaate bachchon ke haathon ne sambhaalaa buDhon hi ne hifaazat ki jaama-e-ulfat bunte aae rishton ke dhaagon se ham umr ki qainchi kaaT gai ab kaahe ko itni mehnat ki"

"is ummid pe roz charaagh jalaate hain aane vaale barson baa'd bhi aate hain ham ne jis raste par us ko chhoDaa hai phuul abhi tak us par khilte jaate hain din mein kirnein aankh-micholi khelti hain raat gae kuchh jugnu milne jaate hain dekhte dekhte ik ghar ke rahne vaale apne apne khaanon mein baT jaate hain dekho to lagtaa hai jaise dekhaa thaa socho to phir naam nahin yaad aate hain kaisi achchhi baat hai 'zehra' teraa naam bachche apne bachchon ko batlaate hain"

"basti mein kuchh log niraale ab bhi hain dekho khaali daaman vaale ab bhi hain dekho vo bhi hain jo sab kah sakte the dekho un ke munh par taale ab bhi hain dekho un aankhon ko jinhon ne sab dekhaa dekho un par khauf ke jaale ab bhi hain dekho ab bhi jins-e-vafaa naayaab nahin apni jaan pe khelne vaale ab bhi hain taare maand hue par zarre raushan hain miTTi mein aabaad ujaale ab bhi hain"

"barson hue tum kahin nahin ho aaj aisaa lagaa yahin kahin ho mahsus huaa ki baat ki hai aur baat bhi vo jo dil-nashin ho imkaan huaa ki vahm thaa sab izhaar huaa ki tum yaqin ho andaaza huaa ki rah vahi hai ummid baDhi ki tum vahin ho ab tak mire naam se hai nisbat ab tak mire shahr ke makin ho"

"baiThe baiThe kaisaa dil ghabraa jaataa hai jaane vaalon kaa jaanaa yaad aa jaataa hai hansti-basti raahon kaa khush-baash musaafir rozi ki bhaTTi kaa indhan ban jaataa hai daftar mansab donon zehn ko khaa lete hain ghar vaalon ki qismat mein tan rah jaataa hai ab is ghar ki aabaadi mehmaanon par hai koi aa jaae to vaqt guzar jaataa hai"

"naqsh ki tarah ubharnaa bhi tumhi se sikhaa rafta rafta nazar aanaa bhi tumhi se sikhaa tum se haasil huaa ik gahre samundar kaa sukut aur har mauj se laDnaa bhi tumhi se sikhaa achchhe sheron ki parakh tum ne hi sikhlaai mujhe apne andaaz se kahnaa bhi tumhi se sikhaa tum ne samjhaae miri soch ko aadaab adab lafz o maani se ulajhnaa bhi tumhi se sikhaa rishta-e-naaz ko jaanaa bhi to tum se jaanaa jaama-e-fakhr pahannaa bhi tumhi se sikhaa chhoTi si baat pe khush honaa mujhe aataa thaa par baDi baat pe chup rahnaa tumhi se sikhaa"

"surat-e-dilkashi rahi khvaahish-e-zindagi rahi daagh-e-dil-e-kharaab se raat mein raushni rahi tere sabhi kulaah-posh koh-e-ghurur se gire apni to tark-e-sar ke baad ishq mein bartari rahi saatvein aasmaan tak shoala-e-ilm-o-aql thaa phir bhi zamin-e-ahl-e-dil kaisi hari bhari rahi aap huaa hai mundamil gul ne bahaar ki nahin shohrat-e-dast-e-chaaraagar zakhm hi DhunDhti rahi kahte hain har adab mein hai ek sadaa-e-baazgasht 'mir' ke husn-e-sher se meri ghazal saji rahi"

"ruk jaa hujum-e-gul ki abhi hausla nahin dil se khayaal-e-tangi-e-daamaan gayaa nahin jo kuchh hain sang-o-khisht hain yaa gard-e-rah-guzar tum tak jo aae un kaa koi naqsh-e-paa nahin har aastaan pe likhkhaa hai ab naam-e-shahr-yaar vaabistagaan-e-dil kai liye koi jaa nahin sad-haif us ke haath hai har zakhm kaa rafu daaman mein jis ke ek bhi taar-e-vafaa nahin"