ji chaahtaa hai us but-e-kaafir ke ishq mein — Aagha Akbarabadi

barq o simaab kaa 'aaghaa' na rahe naam-o-nishaan
dil ki betaabi se ik baar jo muztar main huun

haath donon miri gardan mein hamaail kiije
aur ghairon ko dikhaa diije anguThaa apnaa

tavaaf-e-kaaba ko kyaa jaaein haj nahin vaajib
kalaal-khaane ke kuchh din-daar ham bhi hain

sharaab piite hain to jaagte hain saari raat
mudaam aabid-e-shab-zinda-daar ham bhi hain

do-shaala shaal kashmiri amiron ko mubaarak ho
galim-e-kohna mein jaaDaa faqiron kaa basar hogaa

hamein to un ki mohabbat hai koi kuchh samjhe
hamaare saath mohabbat unhein nahin to nahin

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

is mein nahin hai dakhl koi khauf o hirs kaa
is ki jazaa, na is ki sazaa hai, ye ishq hai

rishta bahaal kaash phir us ki gali se ho
ji chaahtaa hai ishq dobaara usi se ho

kabhi kabhi koi bhejtaa hai nazar mein chaahat ki phuul kaliyaan
mohabbaton kaa nasib Thahraa kabhi kabhi kaa udaas rahnaa

giraftaari ki lazzat aur niraa aazaad kyaa jaane
khushi se kaaTnaa gham kaa dil-e-naashaad kyaa jaane