giraftaari ki lazzat aur niraa aazaad kyaa jaane — Ishq Aurangabadi

us ki aankhon ke agar vasf raqam kijiyegaa
shaakh-e-nargis ko qalam kar ke qalam kijiyegaa

gar shaikh ne aah ki to mat bhuul
dil mein patthar ke bhi sharar hai

'ishq' raushan thaa vahaan dida-e-aahu se charaagh
main jo yak raat gayaa qais ke kaashaane mein

aaina kabhi qaabil-e-didaar na hove
gar khaak ke saath us ko sarokaar na hove

tu ne kyaa dekhaa nahin gul kaa pareshaan ahvaal
ghuncha kyuun ainThaa huaa rahtaa hai zardaar ki tarah

ho gul bulbul tabhi bulbul pe bulbul phuul kar gul ho
tire gar gul-badan bar mein qabaa-e-chashm-e-bulbul ho

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

mumkin hai ashk ban ke rahun chashm-e-yaar mein
mumkin hai bhuul jaae gham-e-rozgaar mein

maut ne aa kar bachaayaa phir mujhe
dard ne jab zindagi se baat ki

kyuun DhunDne nikle hain nae gham kaa khazina
jab dil bhi vahi dard ki daulat bhi vahi hai