jitni tavaqquaat thiin sab khatm ho chukin — Abdul Hai Aarfi

mohabbat khud mohabbat kaa sila hai 'aarfi' lekin
koi aasaan hai kyaa be-niyaaz-e-muddaaa honaa

ek hi phuul thaa bas gul-kada-e-husn mein tu
chun liyaa aankh mein apni tire shaidaai ne

dil ko tapish-e-shauq ki ye lazzat-e-paiham
mil to gai lekin baDi mushkil se mili hai

hai 'aarfi' ab ye asar-e-tark-e-tamannaa
aane lage vo aur bhi kuchh had se sivaa yaad

zaraa ai josh-e-gham rahne de qaabu mein zabaan meri
vo sunnaa chaahte hain khud mujhi se daastaan meri

toDnaa tauba kaa sau baar bhi aasaan thaa magar
jaam-e-mai mujh se to ik baar bhi toDaa na gayaa

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

naama-bar naa-umid aataa hai
haae kyaa sust paanv paDte hain

aaj phir bujh gae jal jal ke umidon ke charaagh
aaj phir taaron bhari raat ne dam toD diyaa

dil jo ummid-vaar hotaa hai
tir-e-gham kaa shikaar hotaa hai