aankhon mein ashk daagh jigar mein labon pe aah — Abr Ahsani Ganauri

vahshiyon ko ye sabaq deti hui aai bahaar
taar baaqi na rahe koi garebaanon mein

ishq mein aur bhi divaana banaa deti hai
meri aavaaz mein mil kar tiri aavaaz mujhe

palaT aataa huun main maayus ho kar un maqaamon se
jahaan se silsila nazdik-tar hotaa hai manzil kaa

tum kyon udaas ho gae maidaan-e-hashr mein
kah do to dil ki dil mein miri daastaan rahe

shaayad is baat pe lab mere siye jaate hain
aah ke saath nikal jaae na armaan koi

kaun ab kashmakash-e-zist se de mujh ko najaat
kar chukaa hai miraa qaatil nazar-andaaz mujhe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi