teri jaanib aa rahaa huun ruuh ki taskin ko main — Adeel Zaidi

de hausle ki daad ki ham tere gham mein aaj
baiThe hain mahfilon ko sajaae tire baghair

kahaan ke maahir-o-kaamil ho tum hunar mein 'adil'
tumhaare kaam to parvardigaar kartaa hai

miraa dil TuuT jaane par miyaan hairat bhalaa kaisi
agar rasta badal jaae sitaare TuuT jaate hain

tu mujh se duur chali jaae ain mumkin hai
magar vo aks jo meri nazar mein rahtaa hai

judaa jo ho gae tasbih-e-roz-o-shab se 'adil'
main zindagi mein vo daane piro nahin saktaa

aazaadiyon ke shauq o havas ne hamein 'adil'
ik ajnabi zamin kaa qaidi banaa diyaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

ye dil ki raah chamakti thi aaine ki tarah
guzar gayaa vo use bhi ghubaar karte hue

Dar to nahin magar kahin patton ke shor se
dil ko gumaan hai aaj koi haadisa na ho

ghar ghair ke jo yaar miraa raat se gayaa
ji siine se nikal gayaa dil haat se gayaa

is dil ko kisi dast-e-adaa-sanj mein rakhnaa
mumkin hai ye mizaan-e-kam-o-besh jalaa de