baDaa viraan mausam hai kabhi milne chale aao — Adeem Hashmi

faasle aise bhi honge ye kabhi sochaa na thaa
saamne baiThaa thaa mere aur vo meraa na thaa

ik khilaunaa TuuT jaaegaa nayaa mil jaaegaa
main nahin to koi tujh ko dusraa mil jaaegaa

kaTi hui hai zamin koh se samundar tak
milaa hai ghaao ye dariyaa ko raasta de kar

kyuun parakhte ho savaalon se javaabon ko 'adim'
honT achchhe hon to samjho ki savaal achchhaa hai

huaa hai jo sadaa us ko nasibon kaa likhaa samjhaa
'adim' apne kiye par mujh ko pachhtaanaa nahin aataa

mire hamraah garche duur tak logon ki raunaq hai
magar jaise koi kam hai kabhi milne chale aao

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

duur rahti hain sadaa un se balaaein saahil
apne maan baap ki jo roz duaa lete hain

aab-dida huun main khud zakhm-e-jigar se apne
teri aankhon mein chhupaa dard kahaan se dekhun

khaak ke zarron se uf uf ki sadaa aati hai
meraa afsaana-e-gham qissa-e-maazi na huaa