phir baalon mein raat hui — Adil Mansuri

mere TuuTe hausle ke par nikalte dekh kar
us ne divaaron ko apni aur unchaa kar diyaa

kis tarah jamaa kijiye ab apne aap ko
kaaghaz bikhar rahe hain puraani kitaab ke

vo kaun thaa jo din ke ujaale mein kho gayaa
ye chaand kis ko DhunDne niklaa hai shaam se

koi khud-kushi ki taraf chal diyaa
udaasi ki mehnat Thikaane lagi

jo chup-chaap rahti thi divaar par
vo tasvir baatein banaane lagi

allaah jaane kis pe akaDtaa thaa raat din
kuchh bhi nahin thaa phir bhi baDaa bad-zabaan thaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

vasl ki raat ke sivaa koi shaam
saath le kar sahar nahin aati

aankhon mein nahin silsila-e-ashk shab-o-roz
tasbih paDhaa karte hain din raat tumhaari

ham kis ko dikhaate shab-e-furqat ki udaasi
sab khvaab mein the raat ko bedaar hamin the