koi khud-kushi ki taraf chal diyaa — Adil Mansuri

phir baalon mein raat hui
phir haathon mein chaand khilaa

mere TuuTe hausle ke par nikalte dekh kar
us ne divaaron ko apni aur unchaa kar diyaa

kis tarah jamaa kijiye ab apne aap ko
kaaghaz bikhar rahe hain puraani kitaab ke

vo kaun thaa jo din ke ujaale mein kho gayaa
ye chaand kis ko DhunDne niklaa hai shaam se

jo chup-chaap rahti thi divaar par
vo tasvir baatein banaane lagi

allaah jaane kis pe akaDtaa thaa raat din
kuchh bhi nahin thaa phir bhi baDaa bad-zabaan thaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

itne ghane baadal ke pichhe
kitnaa tanhaa hogaa chaand

us pe qurbaan ki jis ne tiri aavaaz suni
sadqe us aankh ke jis ne tiraa jalva dekhaa

vahshat-e-hijr bhi tanhaai bhi main bhi 'anjum'
jab ikaTThe hue sab ek ghazal aur kahi