isi liye to ye duniyaa dhuli dhuli si lage — Afroz Alam

har khvaab shikasta hai taamir-e-nasheman kaa
har subh ke maathe par baazaar ki garmi hai

ye khulaa jism khule baal ye halke malbus
tum nai subh kaa aaghaaz karoge shaayad

tumhaari guftugu se aas ki khushbu chhalakti hai
jahaan tum ho vahaan pe zindagi maalum hoti hai

gum-sum saa khaDaa hai koi darvaaza-e-dil par
is shaam kaa manzar to dil-aavez bahut hai

main zehni taur pe aavaara hotaa jaataa huun
mire shuur mujhe apni had ke andar khinch

sataati hai tumhaari yaad jab mujh ko shab-e-hijraan
mujhe khud apni hasti ajnabi maalum hoti hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

koi makin thaa na mehmaan aane vaalaa thaa
to phir kivaaD khulaa kis ke intizaar mein thaa

aakhir huaa hai hashr bapaa intizaar mein
subh-e-shab-e-firaaq hui maarvaaD mein

tu bevafaa hai tiraa e'tibaar kaun kare
tamaam umr tiraa intizaar kaun kare

tamaam umr rahe meraa muntazir tu bhi
tamaam umr mire intizaar ko tarse