ghamon ki dhuup mein milte hain saaebaan ban kar — Afzal Allahabadi

main chaahtaa thaa ki us ko gulaab pesh karun
vo khud gulaab thaa us ko gulaab kyaa detaa

abhi to us kaa koi tazkira huaa bhi nahin
abhi se bazm mein khushbu kaa raqs jaari hai

teri nisbat mili mujhe jab se
main koi aarzu nahin kartaa

mein iztiraab ke aalam mein raqs kartaa rahaa
kabhi ghubaar ki surat kabhi dhuaan ban kar

ab to har ek adaakaar se Dar lagtaa hai
mujh ko dushman se nahin yaar se Dar lagtaa hai

yuun ilaaj-e-dil bimaar kiyaa jaaegaa
sharbat-e-did se sarshaar kiyaa jaaegaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

hanste hue chehron se hamein hoti hai vahshat
ham log udaasi ke shajar DhunD rahe hain

rakh na aansu se vasl ki ummid
khaare paani se daal galti nahin

aansu jo bahein surkh to ho jaati hain aankhein
dil aisaa sulagtaa hai dhuaan tak nahin aataa