vo meri raah mein kaanTe bichhaae main lekin — Ahmad Hamdani

na jaane aaj ye kis kaa khayaal aaya hai
khushi kaa rang liye har malaal aaya hai

kyuun hamaare saans bhi hote hain logon par giraan
ham bhi to ik umr le kar is jahaan mein aae the

kis ko bataaein ab ki na chal kar tamaam umr
ham ne khud apne aap mein kitnaa safar kiyaa

tu mayassar thaa to dil mein the hazaaron armaan
tu nahin hai to har ik samt ajab rang-e-malaal

ajiib vahshatein hisse mein apne aai hain
ki tere ghar bhi pahunch kar sakun na paaein ham

ab ye hogaa shaayad apni aag mein khud jal jaaeinge
tum se duur bahut rah kar bhi kyaa paayaa kyaa paaeinge

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

tum miraa naam-o-nasab puchh rahe ho sab se
ishq ho jaae to shajara nahin dekhaa jaataa

tumhaare gham ki udaasi qalil karte hue
main ji rahaa huun mohabbat tavil karte hue

bandishein ishq mein duniyaa se niraali dekhein
dil taDap jaae magar lab na hilaae koi