ye bhi ejaaz mujhe ishq ne bakhshaa thaa kabhi — Ahmad Khayal

tu jo ye jaan hatheli pe liye phirtaa hai
teraa kirdaar kahaani se nikal saktaa hai

mahakte phuul sitaare damaktaa chaand dhanak
tire jamaal se kitnon ne istifaada kyaa

havaa ke haath pe chhaale hain aaj tak maujud
mire charaagh ki lau mein kamaal aisaa thaa

ye bhi tiri shikast nahin hai to aur kyaa
jaisaa tu chaahtaa thaa main vaisaa nahin banaa

main thaa sadiyon ke safar mein 'ahmad'
aur sadiyon kaa safar thaa mujh mein

kisi darvesh ke hujre se abhi aayaa huun
so tire hukm ki taamil nahin karni mujhe

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

husn jalva dikhaa gayaa apnaa
ishq baiThaa rahaa udaas kahin