zakhmon ko ashk-e-khun se sairaab kar rahaa huun — Ahmad Mahfuz

dil ne lagaa diyaa hai jo ik kaam se mujhe
har dam laDaai rahti hai aaraam se mujhe

jaantaa huun in dinon kaisaa hai dariyaa kaa mizaaj
is liye saahil se thoDaa faasla rakhtaa huun main

apne hi aks kaa chakkar to nahin chaaron taraf
ki nazar aate hain ab khud ko hamin chaaron taraf

zehn par zor bhi Daalo to na yaad aauun main
is tarah parda-e-nisyaan mein chhupaa lo mujh ko

chaDhaa huaa thaa vo dariyaa agar hamaare liye
to dekhte hi rahe kyuun utar nahin gae ham

daaman ko zaraa jhaTak to dekho
duniyaa hai kuchh aur shai nahin hai

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

aae kuchh abr kuchh sharaab aae
is ke baa'd aae jo azaab aae

khuli zabaan to zarf un kaa ho gayaa zaahir
hazaar bhed chhupaa rakkhe the khamoshi mein

chashme ki tarah phuTaa aur aap hi bah niklaa
rakhtaa bhalaa main kab tak aankhon mein nihaan paani

tire is phuul se chehre ne ab ke
mire zakhmon ko mahkaayaa bahut hai