chashme ki tarah phuTaa aur aap hi bah niklaa — Anwar Sadeed

khaak huun lekin saraapaa nuur hai meraa vajud
is zamin par chaand suraj kaa numaainda huun main

khuli zabaan to zarf un kaa ho gayaa zaahir
hazaar bhed chhupaa rakkhe the khamoshi mein

jaagti aankh se jo khvaab thaa dekhaa 'anvar'
us ki taabir mujhe dil ke jalaane se mili

pankh hilaa kar shaam gai hai is aangan se
ab utregi raat anokhi yaadon vaali

chalaa main jaanib-e-manzil to ye huaa maalum
yaqin gumaan mein gum hai gumaan hai poshida

shikva kiyaa zamaane kaa to us ne ye kahaa
jis haal mein ho zinda raho aur khush raho

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

aae kuchh abr kuchh sharaab aae
is ke baa'd aae jo azaab aae

ye khamoshi miri khamoshi hai
is kaa matlab mukaalima liyaa jaae

kisi tarah to ghaTe dil ki be-qaraari bhi
chalo vo chashm nahin kam se kam sharaab to ho

kaam ko imaan se anjaam detaa chal bashar
jaane kis surat mein teraa mehnataana aaegaa