main ne samjhaa thaa ki lauT aate hain jaane vaale — Ahmad Nadeem Qasmi

aaghosh mein mahkoge dikhaai nahin doge
tum nikhat-e-gulzaar ho ham parda-e-shab hain

gham-e-jaanaan gham-e-dauraan ki taraf yuun aayaa
jaanib shahar chale dukhtar-e-dahqaan jaise

zindagi shama ki maanind jalaataa huun 'nadim'
bujh to jaaungaa magar subah to kar jaaungaa

kis tavaqqoa pe kisi ko dekhein
koi tum se bhi hasin kyaa hogaa

ik safina hai tiri yaad agar
ik samundar hai miri tanhaai

aakhir duaa karein bhi to kis muddaaa ke saath
kaise zamin ki baat kahein aasmaan se ham

tumhaare jaane ke baad ham ne sukun DhunDaa kuchh is tarah se
bichhaDne vaalon ke paanv paDnaa unhein judaai se baaz rakhnaa

shab-e-firaaq kuchh aisaa khayaal-e-yaar rahaa
ki raat bhar dil-e-gham-dida be-qaraar rahaa

vo mil gayaa to bichhaDnaa paDegaa phir 'zarrin'
isi khayaal se ham raaste badalte rahe

tiri talaash mein nikle to itni duur gae
ki ham se tai na hue faasle judaai ke

dastur hi alag hai tiri bazm-e-naaz kaa
ilzaam de ke kah diyaa ilzaam hi to hai

bahan kaa pyaar judaai se kam nahin hotaa
agar vo duur bhi jaae to gham nahin hotaa