jo reza reza nahin dil use nahin kahte — Ahmad Zafar

kaun Dubegaa kise paar utarnaa hai 'zafar'
faisla vaqt ke dariyaa mein utar kar hogaa

ang ang se rang rang ke phuul baraste dekhe kaun
rang rang se shole barse kaise barse soche kaun

un se meri baat na puchh
un se meri an-ban hai

main makin huun na makaan shahr-e-mohabbat kaa 'zafar'
dil musaafir na kisi ghair ke ghar jaaegaa

kyuun tirgi se is qadar maanus huun 'zafar'
ik sham-e-rah-guzaar ki sahar tak jali bhi hai

main baDaa ho gayaa huun magar bachpanaa
mere dil se kabhi bhi gayaa hi nahin

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

chaand ne taan li hai chaadar-e-abr
ab vo kapDe badal rahi hogi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein