fareb-e-abr-e-karam bhi baDaa sahaaraa hai — Yagana Changezi

parda-e-hijr vahi hasti-e-mauhum thi 'yaas'
sach hai pahle nahin maalum thaa ye raaz mujhe

jaras ne muzhda-e-manzil sunaa ke chaunkaayaa
nikal chalaa thaa dabe paanv kaarvaan apnaa

ajab kyaa hai ham aise garm-raftaaron ki Thokar se
zamaane ke buland-o-past kaa hamvaar ho jaanaa

vatan se kyaa ki havaa-e-vatan se hain bezaar
lipaT rahe jo bagulon se dasht-e-ghurbat ke

maut maangi thi khudaai to nahin maangi thi
le duaa kar chuke ab tark-e-duaa karte hain

nai zamin nayaa aasmaan nai duniyaa
ajiib shai ye tilism khayaal hotaa hai

hujum-e-naaz mein jalva-farebiyon ke sivaa
'kalim' aur koi haadisa huaa to nahin

dil liyaa aur bevafaai ki
daad detaa huun dilrubaai ki

adaavatein thin, taghaaful thaa, ranjishein thiin bahut
bichhaDne vaale mein sab kuchh thaa, bevafaai na thi

dhoka hai ik fareb hai manzil kaa har khayaal
sach puchhiye to saaraa safar vaapsi kaa hai

shikaayat us se nahin apne-aap se hai mujhe
vo bevafaa thaa to main aas kyuun lagaa baiThaa

us bevafaa kaa shahr hai aur vaqt-e-shaam hai
aaise mein aarzu baDi himmat kaa kaam hai