ik husn-e-mukammal hai to ik ishq-saraapaa — Akhtar Ansari Akbarabadi

kuchh andhere hain abhi raah mein haail 'akhtar'
apni manzil pe nazar aaegaa insaan ik roz

abhi bahaar ne sikhi kahaan hai dil-jui
hazaar daagh abhi qalb-e-laala-zaar mein hain

zulm sahte rahe shukr karte rahe aai lab tak na ye daastaan aaj tak
mujh ko hairat rahi anjuman mein tiri kyuun hain khaamosh ahl-e-zabaan aaj tak

dushmani ko buraa na kah ai dost
dekh kyaa dosti hai ghaur se dekh

ajiib bhul-bhulayyaan hai shaahraah-e-hayat
bhaTakne vaale yahaan justuju ki baat na kar

bachaa bachaa ke guzarnaa hai daaman-e-hasti
sharik-e-khaar bhi kuchh jashn-e-nau-bahaar mein hain

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

un ko ulfat hi sahi aghyaar se
ham se kyon aghyaar ki baatein karein

aur bhi dukh hain zamaane mein mohabbat ke sivaa
raahatein aur bhi hain vasl ki raahat ke sivaa

vahshat-e-dil ke kharidaar bhi naapaid hue
kaun ab ishq ke baazaar mein kholegaa dukaan

maanaa jivan mein aurat ik baar mohabbat karti hai
lekin mujh ko ye to bataa de kyaa tu aurat zaat nahin