inhi gham ki ghaTaaon se khushi kaa chaand niklegaa — Akhtar Shirani

kis ko fursat thi zamaane ke sitam sahne ki
gar na us shokh ki aankhon kaa ishaaraa hotaa

ab to miliye bas laDaai ho chuki
ab to chaliye pyaar ki baatein karein

zindagi kitni masarrat se guzarti yaa rab
aish ki tarah agar gham bhi gavaaraa hotaa

yaad aao mujhe lillaah na tum yaad karo
meri aur apni javaani ko na barbaad karo

muddatein ho gaiin bichhDe hue tum se lekin
aaj tak dil se mire yaad tumhaari na gai

jo bhi buraa bhalaa hai allaah jaantaa hai
bande ke dil mein kyaa hai allaah jaantaa hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

jhaaD kar gard-e-gham-e-hasti ko uD jaaungaa main
be-khabar aisi bhi ik parvaaz aati hai mujhe

darogh ke imtihaan-kade mein sadaa yahi kaarobaar hogaa
jo baDh ke taaid-e-haq karegaa vahi sazaavaar-e-daar hogaa

tanhaai mein karni to hai ik baat kisi se
lekin vo kisi vaqt akelaa nahin hotaa