band rahte hain jo alfaaz kitaabon mein sadaa — Aleena Itrat

dil ke gulshan mein tire pyaar ki khushbu paa kar
rang rukhsaar pe phulon se khilaa karte hain

husn-o-jamaal-o-zist ki aaraaishein fuzul
ishq-o-junun ki aag jo dil mein javaan na ho

lo hamaaraa javaab le jaao
ye mahaktaa gulaab le jaao

Thiik hai jaao ta'alluq na rakheinge ham bhi
tum bhi vaada karo ab yaad nahin aaoge

jin ke mazbut iraade bane pahchaan un ki
manzilein aap hi ho jaati hain aasaan un ki

khvaahishein khvaab dikhaati hain tire milne kaa
khvaab se kah de ki taabir ki surat aae

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

vo bhalaa kaise bataae ki gham-e-hijr hai kyaa
jis ko aaghosh-e-mohabbat kabhi haasil na huaa

izhaar-e-gham kiyaa thaa ba-ummid-e-iltifaat
kyaa puchhte ho kitni nadaamat hai aaj tak