jaane kyaa barsaa thaa raat charaaghon se — Ambar Bahraichi

baahar saare maidaan jiit chukaa thaa vo
ghar lauTaa to pal bhar mein hi TuuTaa thaa

soup ke daane kabutar chug rahaa thaa aur vo
sehn ko mahkaa rahi thi sunnatein paDhte hue

ye sach hai rang badaltaa thaa vo har ik lamha
magar vahi to bahut kaamyaab chehraa thaa

har ik nadi se kaDi pyaas le ke vo guzraa
ye aur baat ki vo khud bhi ek dariyaa thaa

jaane kyaa soch ke phir in ko rihaai de di
ham ne ab ke bhi parindon ko tah-e-daam kiyaa

meraa karb miri tanhaai ki zinat
main chehron ke jangal kaa sannaaTaa huun

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shor din ko nahin sone detaa
shab ko sannaaTaa jagaa detaa hai

aaj bahut din baa'd main apne kamre tak aa niklaa thaa
juun hi darvaaza kholaa hai us ki khushbu aai hai

itni siyaah-raat mein itni si raushni
ye chaand vo nahin miraa mahtaab aur hai