makaan ujaaD thaa aur laa-makaan ki khvaahish thi — Amir Hamza Saqib

ye gard hai miri aankhon mein kin zamaanon ki
nae libaas bhi ab to puraane lagte hain

tumhaari zaat havaala hai surkh-rui kaa
tumhaare zikr ko sab shart-e-fan banaate hain

teri khushbu tiraa paikar hai mire sheron mein
jaan yunhi nahin ye tarz-e-misaali meraa

meri duniyaa isi duniyaa mein kahin rahti hai
varna ye duniyaa kahaan husn-e-talab thi meraa

khabar bhi hai tujhe is daftar-e-mohabbat ko
jalaane jalne mein kyaa kyaa zamaane lagte hain

meri barhana pusht thi koDon se sabz o surkh
gore badan pe us ke bhi niilaa nishaan thaa

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

teri khvaahish bhi na ho tujh se shikaayat bhi na ho
itnaa ehsaan miri jaan nahin karnaa thaa

mujh ko thi mahfilon ki bahut aarzu magar
tanhaaiyon ke khauf se tanhaa rahaa huun main

ek hasrat ne hamein rab kaa muqarrab rakhaa
ham agar 'ishq nahin karte to kaafir hote

gaamzan hain ham musalsal ajnabi manzil ki samt
zindagi ki aarzu mein zindagi khote hue