log kahte hain du'aaon mein asar hotaa hai — Andaleeb Shadani

uff vo tufaan-e-shabaab aah vo siina teraa
jise har saans mein dab dab ke ubhartaa dekhaa

jigar mein Tiis lab hansne pe majbur
kuchh aisi hi hamaari zindagi hai

der lagi aane mein tum ko shukr hai phir bhi aae to
aas ne dil kaa saath na chhoDaa vaise ham ghabraae to

dil par choT paDi hai tab to aah labon tak aai hai
yuun hi chhan se bol uThnaa to shishe kaa dastur nahin

jhuuT hai sab taarikh hamesha apne ko dohraati hai
achchhaa meraa khvaab-e-javaani thoDaa saa dohraae to

chaahat ke badle mein ham bech dein apni marzi tak
koi mile to dil kaa gaahak koi hamein apnaae to

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

ishvon ki hai na us nigah-e-fitna-zaa ki hai
saari khataa mire dil-e-shorish-adaa ki hai

ham ne sab ko muflis paa ke toD diyaa dil kaa kashkol
ham ko koi kyaa de degaa kyuun munh-dekhi baat karein

main dastaras se tumhaari nikal bhi saktaa huun
ye soch lo ki main rasta badal bhi saktaa huun