aankh jhapkin to itne arse mein — Anjum Khayali

koi tohmat ho mire naam chali aati hai
jaise baazaar mein har ghar se gali aati hai

kahaan milaa main tujhe ye savaal baa'd kaa hai
tu pahle yaad to kar kis jagah ganvaayaa mujhe

andheri raat hai saaya to ho nahin saktaa
ye kaun hai jo mire saath saath chaltaa hai

mire mazaar pe aa kar diye jalaaegaa
vo mere baa'd miri zindagi mein aaegaa

kuchh tasaavir bol paDti hain
sab ki sab be-zabaan nahin hotin

jaan qarz hai so utaarte hain
ham umr kahaan guzaarte hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

ridaa-e-sang oDh kar na so gayaa ho kaanch bhi
harim-e-zakhm laazmi hai khair-o-shar ki jaanch bhi

ik bahaana hai tujhe yaad kiye jaane kaa
kab saliqa hai mujhe varna ghazal gaane kaa