koi tohmat ho mire naam chali aati hai — Anjum Khayali

aankh jhapkin to itne arse mein
jaane kitne baras guzar jaaein

kahaan milaa main tujhe ye savaal baa'd kaa hai
tu pahle yaad to kar kis jagah ganvaayaa mujhe

andheri raat hai saaya to ho nahin saktaa
ye kaun hai jo mire saath saath chaltaa hai

mire mazaar pe aa kar diye jalaaegaa
vo mere baa'd miri zindagi mein aaegaa

kuchh tasaavir bol paDti hain
sab ki sab be-zabaan nahin hotin

jaan qarz hai so utaarte hain
ham umr kahaan guzaarte hain

khaak uchhaalo jo zamin par to falak par gir jaae
ab khulaa ye ki bahut past hai himmat meri

har ek baat ko chup-chaap kyuun sunaa jaae
kabhi to hausla kar ke nahin kahaa jaae

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

khudaa kare ki vahi baat us ke dil mein ho
jo baat kahne ki himmat juTaa rahaa huun main

aziiz gar thaa ta'alluq to kis liye toDaa
jab ikhtilaaf kiyaa to mufaahamat kaisi

ghurur-e-husn na kar jazba-e-zulekhaa dekh
kiyaa hai ishq ne yusuf ghulaam aashiq kaa